O le fa’aiuga o le vaiaso na te’a nei na tuua ai e le aufusu a Amerika Samoa le atunu’u, mo le fa’amoemoe e tausinio i se ta’amilosaga fa’avaomalo o loo fa’agasolo i Samoa i le vaiaso nei.

E to’afa ali’i fusu ua filifilia e fai ma ave fu’a a le atunu’u i lenei ta’amilosaga, lea fo’i ua i ai le fa’amoemoega e tatau ona fo’i mai ma se pine mo le tapuaiga a Amerika Samoa. O le sui peresetene o le Asosi Fusu a Amerika Samoa, susuga O T. Malala o loo ta’itaia le au malaga, fa’atasi ai ma le lagolagosua a le Faiaoga sinia o le ‘aufusu, afioga Sala Sanele Etuala.

O sui o le aufusu e aofia ai Falaniko Tauta lea o le a tausinio i le aupega o le 65kg; Kaisa Ioane lea ua fa’amoemoe e tausinio i le aupaga o le 69kg; Jerrerey Tago lea ua fa’amoemoe e tausinio i le aupaga e 81kg; ma le susuga ia George Tanoa Jr, lea ua fa’amoemoe e tausinio i le aupaga o le 79kg.

I se fa’atalatalanoaga ma le Samoa News i le aso Faraile na te’a nei ao lumana’i ai le malaga atu o le au i Samoa, na taua ai e le afioga a Sala le faigata o lenei ta’amilosaga ua sauni alo o le atunu’u e tausinio ai, ona o lo o tausinio fa’atasi ai ma tama fusu lelei mai isi atunu’u e pei o Niu Sila, Ausetalia, Fiti, Tonga, fa’apea ai fo’i ma Samoa.

“E le faigofie lenei ta’amilosaga, e matua faigata lava mo nai a tatou tama fusu, peita’i o le tulaga maualuga lea ua i ai tapenaga a le tatou ‘au, ua mafua ai ona i ai se lagona e tatau lava ona manuia la tatou taumafaiga mo se pine”, o le sauoaga lea a Sala.

O sui o le aufusu lea ua filifilia e fai ma sui o le atunu’u i lenei ta’amilosaga, o ni isi sa auai i isi fo’i taamilosaga fa’avaomalo i tausaga ua mavae, e pei o le susuga ia Tanoa Jr lea fo’i ua tele ta’amilosaga fa’avaomalo e pei o le Boxing World Championship lea sa faia i Ausetalia i le 2015, ta’amilosaga o le Oceania, aemaise ai le Pacific Games sa faia i Papua Niu Kini i le 2015, lea fo’i sa fai ai o ia ma sui o Amerika Samoa.

O Tauta, Ioane ma Tago, o isi ia sui o le aufusu a le atunu’u sa auai i le ta’amilosaga o le Samoa Games sa faia i Samoa i le masina o Tesema o le tausaga na te’a nei, lea fo’i na manumalo uma ai i latou i pine, e pei ona maua ai e le aufusu a Amerika Samoa pine e 9, e aofia ai pine auro e 3, ma le fa’ailoga o le tama fusu o le ta’amilosaga sa maua lea e le susuga a Tago.

Na taua e Sala e fa’apea, e ui i tulaga faigata i le tau sailiina o se vaega tupe e fa’atupe ai le malaga, ae sa mafai lava ona fesoasoani mai ni isi o kamupani ma pisinisi i le atunu’u, atoa ai ma tapena a le Asosi Fusu a Amerika Samoa, lea ua mafua ai ona manuia lenei fa’amoemoe.

O le ta’amilosaga fa’avaomalo lenei a le Pasefika, o loo talimalo ai Samoa ae o loo fa’atautaia e le Kalapu Fusu a Tama Tuai a Malisi.

O le aso To’ona’i o le vaiaso fou lea ua fa’amoemoe e toe taliu mai ai i fanua le aufusu a le atunu’u.