Malaga au lakapi Leone puipui Ipu o le siamupini i le Hawaii 7’s

Le au lakapi mai le afioaga i Leone, fa’atasi ai ma le afioga a Faiivae Godinet i se latou ata sa pu’eina i le fa’aiuga o le tausaga na te’a nei, a o lumana’i ai le malaga atu o le ‘au e tausinio i le ta’amilosaga ta’ito’a 7 sa faia i Hawaii i le masina o Tesema 2015.  [ata AF]
ausage@samoanews.com

Ua fa’amaonia mai e le faiaoga o le au lakapi ta’ito’a 7 a le afioaga i Leone, le afioga ia Leota Patu le sauni o le au ta’ito’a 7 a le afioaga mo lana valaaulia mai le Iuni Lakapi a Hawaii, ina ia toe malaga atu e auai i le ta’amilosaga ta’ito’a 7 a le Hawaii International 7’s Tournament i lenei tausaga, mo le puipuiina lea o le Ipu sa ia umia mai i le tausaga na te’a nei.

 

E pei ona silafia e le atunu’u, o le au lakapi mai le afioaga i Leone sa fai ma sui o Amerika Samoa i le ta’amilosaga ta’ito’a 7 a le Hawaii International 7’s Tournament, lea sa talimalo ai Hawaii i le masina o Tesema 2015, fa’atasi ai ma ‘au ma isi atunu’u o le Pasefika e aofia ai Niu Sila, Ausetalia, Samoa, Fiti, Tonga, Tahiti, fa’apea ai ma Amerika, Hawaii ma Amerika Samoa.

 

I le fa’aiuga o lea ta’amilosaga, na sola mai ai le Leone White Rugby Club ma le Ipu o le siamupini, ina ua latou fa’ato’ilaloina ‘au uma sa latou ta’aalo i le taimi o le ta’amilosaga sa fa’agasolo.

 

I se fa’atalatalanoaga ma le faiaoga o le ‘au a Leone i le vaiaso na te’a nei, na taua ai e le afioga a Leota le sauni atu o lana ‘au mo lenei ta’amilosaga taua, e fai ai ma sui o Amerika Samoa i lenei tausaga, aemaise ai lava o le toe puipuiina lea o lona tulaga siamupini sa i ai i le tausaga na te’a nei.

 

Sa ia saunoa atili fo’i e fa’apea, e le faigofie le tulaga lea o le a sauni atu i ai le ‘au a Leone White, ona o lea o le a latou aga’i atu e puipui le tulaga siamupini, lona uiga fo’i, o le mamafa atoa o le tapenaga mo le ta’amilosaga o le a i luga o le ‘au ma le pulega, aemaise ai, e le o i ai se ‘au e fa’atamala i le ta’amilosaga.

 

Na taua atili e le afioga a Leota le leva ona tapena o lana ‘au mo lenei fa’amoemoe, ma ua i ai fo’i le talitonuga ua atoatoa tapenaga mo le malaga atu Hawaii.

 

O le agaga fa’afetai o le pulega ma le ‘au atoa mai le afioaga i Leone, ona o tapenaga uma a le au lakapi o lo o i ai fa’atasi ma le lagolagosua a le afioaga atoa i Leone, fa’apea ai uo ma aiga o lo o lagolagoina lenei fa’amoemoe.

 

Na taua e le afioga a Faiivae i le Samoa News i le taimi na sauni ai le ‘au lakapi a le afioaga e malaga atu i Hawaii i le tausaga na te’a nei e fa’apea, o le agaga atoa o le afioaga i Leone, ia maua e tupulaga talavou avanoa fa’apenei e fa’aaoga ai le taleni i le atina’eina o ta’aloga, ina ia mafai ai ona taumamao i latou mai le a’afia atu i ni isi o fa’afitauli e pei o le ‘ava malosi ma fualaau fa’asaina.

 

O lo o aofia ai i le au lakapi a le afioaga i Leone ni isi o alo o le atunu’u sa ta’aalo i le au fili ta’ito’a 7 a le Talavalu, atoa ai ma le au fili ta’ito’a 15.

 

O le ta’amilosaga ta’ito’a 7 lenei a le Hawaii International 7’s tournament na amata mai i le tausaga e 2012.

 

Na taua e se sui o le ta’amilosaga i le Samoa News e fa’apea, o le autu ma le fa’amoemoe ua mafua ai ona fa’avaeina lenei ta’amilosaga o lakapi fa’avaomalo, ina ia mafai ai ona maua se avanoa e mafuta fa’atasi ai tagata ta’aalo i le Pasefika, ma galulue fa’atasi ai i le atina’eina o le ta’aloga lakapi i le Pasefika.

Comment Here