O le ripoti na folasia e le Ofisa o Turisi i luma o le Fonotaga a le Kovana ma lana Kapeneta i le 2 vaiaso talu ai, na manino mai ai i le saunoaga a le Sui Pule o le Ofisa o Turisi ia Vaito’a Hans A. Langkildge le si’itia pea i luga o le tulaga ua i ai le atina’e tau turisi i Amerika Samoa i le taimi nei, fa’atusatusa i tausaga ua mavae.

E pei ona taua e Vaito’a, toe 3 va’a meli o lo o totoe mo lenei tausaga, e pei ona mae’a fa’atulaga mai a latou kalena e asia ai Amerika Samoa.

I va’a meli e 2 na fa’atoa mae’a atu nei, e silia i le 5,000 le aofa’i o le pasese ma tagata faigaluega na malaga mai ma le isi va’a meli, ae tusa ma le 4,000 le aofa’i o le pasese ma le au va’a na malaga mai ma le va’a meli lea na fa’atoa mae’a atu i le vaiaso na te’a nei.

O le isi tulaga lea ua maitauina i le taimi nei, ua oo lava fo’i i le aufai pisinisi pasi ma taxi, o lo o fa’aauauina pea le fa’amanuiaina o i latou i le to’atele o turisi fegasoloa’i, ma maua ai tupe e atina’e ai a latou tama’i pisinisi.

Na taua e Vaito’a le fa’aauau pea ona galulue fa’atasi o le Ofisa o Turisi ma le tele o afioaga i vaega eseese o le atunu’u, mo le fa’aleleia o atina’e e aofia ai le teuteuina o matafaga atoa ai ma le fausiaina o faleoo i luga o le sami e aga’i atu i ai maimoaga a turisi pe a tafafao mai i le atunu’u.

Na fa’afetaia e le afioga i le ali’i Kovana ia Lolo Matalasi Moliga le auaunaga a le Ofisa o Turisi o lo o fa’aauauina pea i le taimi nei, i le taumafai lea e fa’atosina mai tagata tafafao mai fafo i le atunu’u.

E ui i le tele o lu’itau o lo o fetaia’i ma le malo i le taimi nei, e le gata i tulaga o seleni e fa’atino ai atina’e eseese, ae o le utiuti fo’i o nofoaga e mafai ona aga’i atu i ai turisi mo maimoaga, ae o lo o taumafai pea le malo e una’i afioaga ina ia fa’atino galuega faigofie e pei o le teuteu fa’amatagofie o nu’u ma itumalo ma teuteu matafaga, ina ia avea o ni nofoaga e fa’atosina mai i ai tagata tafafao mai fafo.

Na fautuaina fo’i e Lolo ofisa eseese a le malo o lo o gafa ma le fa’aleleia o galuega tau atina’e, aemaise lava i le Matagaluega o Fefa’atauaiga ma Alamanuia (DOC), ina ia fa’a faigofie talosaga a ni isi o aiga o lo o fuafua e fausia a latou tama’i pisinisi i luga o matafaga, e afe atu i ai turisi ma nofonofo ai, ae maua ai fo’i sina seleni mo le aiga.

Saunoa Lolo e fa’apea, ua i ai ni isi o afioga ma nuu ua oo atu a latou fa’asea i lona Ofisa, i le teena e le malo a latou talosaga mo le fausiaina o a latou tama’i faleoo i luga o le matafaga, ona o tulaga i tulaga tau i le puipuiga o le gataifale.

“O lo tatou tiute o le fa’a faigofie lea o le soifuaga mo tatou tagata, ae le o le taumafai e fa’a faigata le olaga mo tatou tagata, ma atili ai lava ona leai se aga’i i luma o taumafaiga e atina’e aiga ma afioaga,” o le saunoaga lea a Lolo, ma ia talosagaina ai le Sui Fa’atonusili o le Ofisa o le DOC sa i ai i le fonotaga, ina ia fa’autagia lana fautuaga i auala e fesoasoani ai i aiga o le atunu’u.

O le fa’amatalaga sa tuuina atu i luma o le fonotaga a le Kapeneta, o lo o i ai ni isi o aiga i afioaga tu matafaga i le itu i Sasa’e e pei o le afioaga i Alao, o lo o fuafua e fausia a latou faleoo i luga o le matafaga, e fa’aaoga e aga’i atu turisi ma malolo i ai.

Saunoa Lolo e fa’apea, o ituaiga mafaufauga ia e tatau i tagata o le atunu’u ona mafaufau i ai, o le mafaufau i tulaga e manuia ma atina’e ai aiga ma le atunu’u.