MAIAVA:E le o Leoleo o le toese mafua’aga vevesi o pagota

ausage@samoanews.com

Na teena e le Sui Komesina o le Matagaluega o Leoleo tu’uaiga e fa’apea, o le le lava o Leoleo o lo o galulue i le toese i Tafuna, o le mafua’aga autu lea o le tula’i soo mai o vevesi i le va o ali’i pagota, e pei ona maitauina ai ni fa’alavelave se 2 na tutupu i le lua vaiaso talu ai, ina ua fa’ao’olima isi pagota i isi pagota.

 

“O le va lava o ali’i pagota lea o loo mafua ai ona tutupu fa’alavelave e pei ona tula’i mai i totonu o le toese, ae le faapea ua mafua ona o le le lava o Leoleo o loo galulue i totonu o le falepuipui i Tafuna”, o se saunoaga lea mai le afioga i le Sui Komesina o Leoleo ia Vaimaga Maiava, i se fa’atalatalanoaga ma le Samoa News i le taeao ananafi.

 

Saunoa atili Maiava e fa’apea, e le mafai e Leoleo o loo galulue i le falepuipui ona iloa manatu o loo i totonu o loto o pagota, se’i vagana ai lava le pagota latou ia.

 

“E faigata ona malamalama Leoleo i manatu o loo i totonu o loto i ali’i pagota, o le mafua’aga la lena e tutupu ai faafitauli faapea, ona e fa’aputuputu lava e le pagota lona ita i le isi pagota se’i maua le avanoa e feiloa’i ai, ona fa’atino loa lea, ae o le tulaga i le tautua a le aufaigaluega i le toese i Tafuna, o loo atoatoa ma lelei, e ui o loo i ai lava le manaoga i le toe fa’aopoopo lea o ni isi Leoleo e fesoasoani i le fa’aleleia atili o le tautua i totonu o le toese”, o le saunoaga lea a Maiava.

 

Ina ua fesiligia le tulaga ua i ai suesuega a le Ofisa o Leoleo i fa’alavelave e 2 na tula’i mai i le toese i Tafuna i le 2 vaiaso talu ai, na fa’amaonia mai ai e le Sui Komesina le mae’a lea ona faia i ai o suesuega a Leoleo, ma ua tu’uina atu la latou ripoti i le Ofisa o le Loia Sili mo le failaina lea o moliaga fa’asaga i pagota o loo a’afia.

 

O le mataupu muamua na tula’i mai i le 3 vaiaso talu ai, ina ua fa’ao’olima ni ali’i pagota se to’alua i le isi ali’i pagota ma manu’a ai o ia.

 

E 2 aso talu ona tuana’i lea fa’alavelave ae faila loa e le malo moliaga faasaga i ali’i pagota e to’alua na a’afia i lea mataupu, le ali’i o Samuel Wright ma Manu Lefatia, lea ua tu’uaia uma i laua i le moliaga mama o le fa’ao’olima i le tulaga tolu, ma ua fa’amoemoe o le ulua’i iloiloga o le la mataupu ua fa’atulaga e faia i le masina fou o Ianuari.

 

Ae o le fa’alavelave lona lua lea na tula’i mai i le vaiaso na te’a nei, lea fo’i na manu’a ai se isi ali’i pagota ina ua fa’ao’olima i ai ni ai’i pagota se to’alua, ua mae’a ona tu’uina atu le ripoti a Leoleo i le Ofisa o le Loia Sili, ma o loo fa’atalitali le taimi e faila ai moliaga fa’asaga i ali’i pagota o loo a’afia.

 

O le fa’alavelave lona lua lea na manu’a tigaina ai foliga a le ali’i o Muaiga Siatiu poo Povi e pei ona silafia ai o ia e le to’atele, lea ua mafua ai ona taofia Povi i le potu taofia i le Ofisa o Leoleo i Fagatogo, i lalo o se poloaiga mai le fa’amasinoga fa’aitumalo, ina ia taofia ai le toe tula’i mai o se isi fa’alavelave i le lumana’i.

 

“O lea ua aloaia e le Matagaluega o Leoleo le poloaiga a le fa’amasinoga ina ia taofia le ali’i na a’afia i le potu taofia i Fagatogo, ma o loo tatala fo’i le avanoa i aiga o le ali’i pagota e aga’i mai ai e asi o ia i taimi ua fa’atulaga e le Ofisa, e fa’atalitali ai taualumaga o lana mataupu lea o loo fa’agasolo i luma o le fa’amasinoga”, o le saunoaga lea a Maiava.

 

Na taua atili e Maiava le malu puipuia o Povi i lalo o le vaavaaiga a le Ofisa o Leoleo i le taimi nei, ona o lo latou talitonuga, tusa lava poo i latou nei o tagata ua tu’uaia i solitulafono eseese, o i latou fo’i o tagata soifua e pei lava fo’i o tagata uma na faia e le Atua.

Comment Here