Ads by Google Ads by Google

MAGALEI: O ai e sili le taua, o le Teufale po o le Leoleo a le malo

 Le afioga i le ali’i Senatoa ia Magalei Logovi’i  [ata AF]

Na avea le fa’ateia o le afioga i le ali’i Senatoa ia Magalei Logovi’i i le to’atele o tagata faigaluega fou ua fuafua le Matagaluega o le Soifua Maloloina e fa’a faigaluega i le tausaga tupe 2017, e aofia ai ma Teufale e to’alua ma auala na ia fa’atula’i ai le fesili, po o ai tagata faigaluega e sili atu ona taua i le malo, poo le Teufale po o le Leoleo a le malo.

 

Na mafua le fesili a le afioga i le Sa’o, ona o le vaiaso na te’a nei ina ua fesiligia e le Komiti So’ofa’atasi o le Paketi a le Fono Faitulafono le paketi a le Ofisa o Leoleo, na ta’utino ai le afioga i le ali’i Komesina i luma o le Komiti Soofa’atasi e fa’apea, ua mafua ona leai ni Leoleo fou e fa’a faigaluega e le matagaluega mo le tausaga tupe fou, ona e le o lava tupe lotoifale a le malo e fa’atupe ai lea manaoga taua.

 

Na taua atili e le afioga i le Komesina ia Save Liuato Tuitele e fa’apea, e ui e le o i ai se tupe lotoifale a le malo o avanoa e fa’a faigaluega ai ni isi Leoleo fou, ae o le manaoga o lo o i ai i le taimi nei, o lo o matua mana’omia lava e le Matagaluega ni Leoleo fou.

 

I totonu o le paketi a le Matagaluega o le Soifua Maloloina mo le tausaga tupe fou 2017, o lo o taua ai tagata faigaluega fou e to’a 12 o lo o fuafua e fa’a faigaluega, ae totogi i lalo o tupe lotoifale.

 

E tusa ma le $358,000 le tupe o lo o fa’atulaga mai e totogi ai tagata faigaluega fou nei e to’a 12, lea o lo o aofia ai i lea vaega tupe e fa’aagaga mo a latou totogi fa’aopoopo (increment).

 

O ia tagata faigaluega fou o lo o aofia ai Leoleopo e to’a 3 i le totogi e ta’i $15,000 a le tagata e to’atasi i le tasuaga ma Teufale e to’alua i le totogi e $12,000 a le tagata e to’atasi i le tausaga.

 

Na fesili Magalei ia Motusa poo ni tagata faigaluega fou uma nei ua fuafua lana matagaluega e fa’a faigaluega i le tausaga tupe fou, lea fo’i na tali le afioga i le Fa’atonusili, “o lea lava”.

 

Na vaaia le ofo o le afioga ia Magalei i le tali a le ali’i Fa’atonusili, ma ia toe fesiligia ai loa le mafua’aga ua mana’omia ai nei Leoleopo e to’atolu, atoa ai ma nei Teufale e to’alua.

 

“Ua mafua ona ou fesili atu i le fesili lea, ona o lea ua ou vaai atu e to’atolu Leoleopo ae to’alua Teufale ua fuafua e totogi i tupe lotoifale i le tausaga tupe fou, ae o lea e tagi mai le Komesina i le mana’omia lea o ni Leoleo fa’aopoopo e fesoasoani i le tausiaina o le saogalemu lautele o le atunu’u, ma ua tula’i mai ai loa le fesili i lo’u mafaufau, po o fea o galuega nei e pito sili ona taua, pe taua atu le galuega fa’a Teufale, pe sili atu le taua o le galuega fa’a Leoleo”, o le fesili lea a Magalei.

 

Na fa’amanino e Motusa e fa’apea, e matua taua lava le i ai o ni Leoleopo e to’atolu pe sili atu fo’i, atoa ai ma ni Teufale e to’alua pe sili atu foi, e galulue i le tausiaina o le Falema’i e tu’u ma tausi i ai latou uma e a’afia i le gasegase o le mafaufau.

 

Na fa’amanino atili e Motusa e fa’apea, o le taimi nei o lo o fa’atupe uma e le falema’i o le LBJ le fa’atautaiga o le falema’i o lo o tausia ai i latou e a’afia i le gasegase o le mafaufau ma le fa’amoemoe, o le masina lenei e fa’amuta ai ona toe fa’atupe e le LBJ le fa’atautaiga o le falema’i lea, ae o le a taoto atu loa i lalo o le vaavaaiga a le Matagaluega o le Soifua Maloloina, o le mafua’aga lena ua mana’omia ai tagata faigaluega fou nei e to’a 12, e galulue mo le fa’atinoina o le auaunaga mo lea falema’i.

 

O le tupe la lea ua fa’aopoopo i le paketi a le Soifua Maloloina mo le tausaga tupe fou 2017, e fa’atupe ai le fa’atautaiga o le falema’i e pei ona taua.