Maea poloketi - Fa’ato’aga Toto i le Vai Jeannette Chang


O se va’aiga i le fa’ato’aga ua totoina ia vai, o le fa’ato’aga a le aiga o Chang lea fo’i ua sauni e fa’atau atu a latou kapisi sa totoina i le vai. [ata: Leua Aiono Frost]

O se vaaiga i nisi sa fesoasoani i le galuega tau fa’atuina o le fa’ato’aga ale aiga o Jeannette Chang, o se fa’ato’aga e toto i le vai. [ata: Leua Aiono Frost]

O sui o le American Samoa Hydroponics Development ma o i latou fo’i nei e matua tele so latou sao i le fesoasoani malosi i tulaga tau le talosagaina o le fesoasoani tau tupe mai le USDA e fa’atupe ai le taumafaiga a faifa’ato’aga e totoina i le vai. [ata: Leua Aiono Frost]

O le aiga ua maea fa’amautu le latou fa’ato’aga e toto ai fualaau aina i le vai, le tama’ita’i talavou o Jeannette Chang ma lona aiga atoa, na tatalaina le latou poloketi mo le maimoaga a le mamalu o i latou o lo’o fa’atautaia fa’atasi latou fa’ato’aga, ae maise le mamalu na vala’aulia fa’apitoa mo fa’asalalauga, ina ia tima’ia nisi i lenei fo’i ituaiga o fa’ato’aga e aoga tele mo aiga e itiiti laueleele.

 

I le saunoaga a le tama o Terry Chang, sa ia saunoa ai, “O lenei taumafaiga e na’o se teineititi aoga, Jeannette Chang sa ia lesitala lona igoa ma lona fa’anaunauga ina ia fa’atautaia mo le matou aiga. Fa’afetai e le o iinei o ia, ae ua tatala aloa’ia e i matou lenei galuega tele, aua o le matua tele o le suiga o lo’u iloa, ma ala e fa’ato’a ai fa’ato’aga ua suia nei, talu lenei poloketi.”

 

“O fea e aga’i i ai lenei galuega? O le a  taumafai atoa le matou aiga, e fa’aauau pea le fa’ato’aga lenei, ua matua tele se iloa fou o ala e fa’atautaia ai fa’ato’aga e fa’aaoga ai le vai, ua matou maua mai ai, talu ona faia lenei fa’ato’aga. O o’u atali’i ua latou fiafia fo’i e galulue i ai, ua sili atu lo latou naunau i lenei poloketi nai lo a’u nei le tama!”

 

I ana toe upu sa ia fa’ailoa mai ai, “Peita’i e lalamua i le taumafaiga, o le ola fesoasoani o nisi o i latou sa avea ma matou faifa’ato’aga e aoaoina i matou i so’o se vaega o le poloketi. E le tu’ua e i latou se mea e matou te mana’omia. O le fesoasoani fo’i i le faatuina o le fale ma ona totoga eseese uma, e i ai lava i latou mo le fa’asinomaga o mea uma. E i ai fo’i ma le sao o i latou e fesaosoani sa matou sailia mai, ina ia lava tagata e matou te fausia fa’atasia lenei fa’ato’aga i lona atoaga ua tula’i mai ai nei. Fa’afetai mo le sapaia o le fa’amoemoe.”

 

Na tula’i fo’i le ali’i o Dustin Snow mo le laua fa’ato’aga ua fa’atautaia nei, “Super Star Produce” ua vasaia nisi o tatou fuala’au aina mata o lo’o tusia ai lea igoa, o le latou fa’ato’aga lea. Na ia fa’ailoa mai, e i ai se suiga itiiti ua saunia e ia i le totoga o lana fa’ato’aga, ua ia fa’aaogaina le pulu popo e fa’aola ai ana tamato ma ana pepa i luga.

 

Peita’i o le isi vaega uma lava, ua tutusa lelei ma le fa’ato’aga lea ua maimoaina lona mae’a lelei ma ua saunia e fa’aaoga nisi o fua o le fa’aeleeleaga mo le fa’atau atu pe faia ai fo’i mea’ai.

 

Mai le to’alima sa mua’i fa’atalosagaina nei ituaiga fa’ato’aga e a’o’oga ai ina ia mafai ona fa’atautaia, lea ua na’o le to’atolu lea ua mae’a lelei, a’o le’i mae’a lenei tausaga lona lua o le taumafaiga ia toto la’au ‘aina i le vai.

 

O i latou nei e aofia ai: Teleiai Semi Puni i lana fa’ato’aga ua fa’aigoaina “Collin’s Green”  Super Star Produce a Tumua’i ma Dustin Snow, ma le tamaita’i loa o Jeannette Chang lea ua tatala aloaia nei.

 

O faifa’atoaga sa avea ma faiaoga mo i latou nei e aofia ai Larry Hirata, Avegalio Farms po’o le susuga Edward Kuki  Avegalio ma Tutuila Greens a le tama’ita’i o Brooke Gurr. O lo’o fa’asolo mai pea le isi vasega i le tausaga lona lua o lenei taumafaiga e aofia ai Allen Snow mai Iliili, Isaiah Hunkin mai Leone, Fofoga Nelson mai Aunuu, Nonu Tuisamoa mai Leone, Oscar Nelson mai Iliili, Tupua Roy Fua mai Aasufou ma le DDW Cafe mai Tafuna.

 

O lenei vaega o fa’ato’aga ua mae’a latou fa’ato’aga ma ua fa’atau atu fua o latou fa’aeleeleaga, o se pisinisi o le a avea fo’i i latou ma nisi e fesoasoani i nisi sui fou e fia auai i le a’oa’oga mo lenei ituaiga o fa’ato’aga.

 

Pe afai e te naunau e te fia fa’atautaia se fa’ato’aga fa’apenei, e mafai ona e fa’afeso’ota’i i se tasi o i latou o auai i lenei sosaiete o faifa’ato’aga e toto i le vai, “Hydrofarming” ona e mautinoa lea e a’oa’oina lelei oe mo le 6 masina ina ia e silafia lelei uma le tausiga lelei o lau fa’ato’aga.

 

Pe a uma e fa’atuina fo’i le fale mo le fa’ato’aga ma o nei mea uma e mafai ona  maua ai le fesaosoani tau tupe e fa’atuina ai, e fa’atupea lea e le USDA, e fa’auia mai i le talosaga e fa’aulu e le American Samoa Community Hydroponics Development Project, o se lala o le Pacific Youth and Community Development lea e ala ai ona fa’atupe e le USDA.

 

MASI _ Fa’ailoga lona Iupeli Siliva:

 

O Setema o lenei tausaga o le a fa’apea ona fa’ailoga ai le Iupeli Siliva o le Asosi o le Masi, e so’oso’o tau’au fa’atasi ai ma le tauvaga o le lalelei o Amerika Samoa lea e fa’moemoe e fa’ataunu’uina lea i le aso 15 o Setema.

Comment Here