Ads by Google Ads by Google

Mae’a toe fa’aleleia laina telefoni Bluesky ae o loo galulue pea ASTCA


[ata: foa'i]
ausage@samoanews.com

Ua mae’a ona toe fa’aleleia laina telefoni a le Kamupani Telefoni a le Bluesky Communications i totonu o le motu atoa, se’i vagana ai laina telefoni a le Ofisa o Fesootaiga a le malo o Amerika Samoa (ASTCA) o lo o galulue pea le aufaigaluega e fa’aleleia.

 

O se iloiloga sa fa’ataunu’uina i luma o le Komiti o Fesootaiga a le Maota o Sui i le vaiaso nei, na mafai ai ona fa’afofoga afioga i Faipule i le tulaga ua i ai le toe fa’aleleia o fesootaiga tau telefoni atoa ai ma le initaneti mai nei kamupani telefoni e lua i le atunu’u.

 

O le afioga i le tama’ita’i faipule ia Fialupe Fiaui Lutu na ta’ita’ia le iloiloga, lea na maua ai le avanoa o afioga i Faipule e fesiligia ai molimau e tusa ai o mataupu o lo o atugalu i ai le atunu’u.

 

O le Pulesili o le ASTCA ia Puleleiite Li’amatua Tufele Jr na fai ma sui o le Ofisa o Fesootaiga a le malo, atoa ai ma sui o le Bluesky na malaga atu e tali fesili ma atugaluga o Faipule, e aofia ai le susuga a Faimanifo Joe Tuiteleleapaga ma le susuga Stuart Fong.

 

O ni isi o atugaluga mai afioga i Faipule, o le tele lea o vaiaso talu ona mae’a le ‘afa o Gita ae o lo o tumau pea le fa’aletonu o fesootaiga tau telefoni i ni isi o vaega o le atunu’u i le taimi nei. E oo lava fo’i i le tautua tau initaneti ma le cable, o lo o maitauina pea le tuai ma fa’aletonu.

 

Na taua e Tuiteleleapaga i lana molimau e fa’apea, ua 100% le atoatoa ona toe fa’aleleia o fesootaiga tau telefoni feavea’i a le Bluesky, ae 93% mo le auaunaga a le cable. O le vaiaso lenei o lo o galulue ai le aufaigaluega i le fa’aleleia o fesootaiga i totonu o Seetaga ma le fa’asolo atu i Amanave i tulaga o le cable, ona atoatoa loa lea ona lelei lea tautua mo le atunu’u.

 

Ina ua fa’atoa mae’a le ‘afa o Gita, na taua e Tuiteleleapaga le tele o ni vaega o laina tetele o fesootaiga a le Bluesky sa fa’aleagaina, o le mafua’aga lea o le fa’aletonu o fesootaiga tau telefoni ma le cable i vaega eseese o le atunu’u.

 

Ae na taua e Puleleiite e faapea, o le fa’aletonu i laina telefoni a le ASTCA, ona o le mafuaaga ua ala ai ona tumau pea le tele o vaega o le atunu’u o lo o fa’aletonu ai fesootaiga tau telefoni, ona ua fa’aleagaina pou autu o fesootaiga a le ASTCA sa i Aunu’u ma Lauli’i.

 

O le taimi nei, ua mae’a ona oka pou fou e lua ma ua fa’amoemoe e tatau ona taunu’u mai i se taimi o Iuni poo Iulai, ona amata ai loa lea ona fa’apipi’i ma toe fa’aleleia laina telefoni mo fesootaiga.

 

O le taimi nei, e na o le 47% o laina telefoni i le atunuu ua mafai ona toe fa’aleleia i nofoaga o lo o mafai ona ‘au atu i ai fesootaiga, se’i vagana ai lava nofoaga ua fa’aletonu ai a latou pou tetele mo fesootaiga, pau lea o vaega o le atunu’u o lo o tumau pea ona fa’aletonu.

 

Saunoa le afioga i le ali’i faipule ia Kitara Vaiau mai le itumalo o Saole e fa’apea, o se tasi o fa’afitauli sa ia maitauina talu ona mae’a le ‘afa, o le tele o laina telefoni e tautau solo i luga o le auala, ma ua avea ma popolega i ni isi o le atunu’u, ina ne’i aafia ai se soifua o se isi.

 

Saunoa atili Vaiau e fa’apea, o ni isi o taimi ua avea uaea nei e fa’alalava solo ma itu e fa’alavelave ai i ave ta’avale.

 

Saunoa ni isi o afioga i Faipule e fa’apea, talu lava ona mae’a le ‘afa o Gita e le ola atu lava le tautua o laina telefoni a le ASTCA atoa ai ma le initaneti.

 

E ui i fa’asea ma atugaluga e pei ona fa’aalia, ae na fa’afetaia ia Puleleiite ona o le auaunaga a lana aufaigaluega, o lo o mafai ai ona maua e le atunu’u fesootaiga tau telefoni i le tele o taimi.