E 2 vaiaso lea ua tu’u atu e le afioga i le Fa’amasino Sili ia Michael Kruse i le loia a le malo ma le Pule o le Ofisa o Femalagaaiga, latou te sailia mai ai le faila o lo o i ai pepa (form) sa talosaga ai le pemita 30 aso na ulufale mai ai Joeita Fa’aaliga i totonu o le atunu’u i le masina o Setema 2012, ina ia mafai ai ona silafia e le Fa’amasinoga poo ai moni le igoa o le sponsor sa ia talosagaina le pemita mo lenei ali’i.

Ma faailoa e Kruse i le loia a le malo ia Robert Morris ma le Pule o le Ofisa o Femalagaaiga a le malo, afioga Peseta Dennis Fuimaono i le vaiaso na te’a nei e fa’apea, afai e o o atu i le aso 15 Aprila lea ua toe tolopo i ai le mataupu a Fa’aaliga e le i maua atu lava le faila o loo fesiligia e le Fa’amasinoga, e i ai le tagata o le a fa’asala i lona gau pule i le poloaiga a le Fa’amasinoga, a le o lena fo’i, e ono taofia uma le Ofisa o Femalagaaiga i lo latou le usitaia o le poloaiga a le Fa’amasinoga.

E mafua ona naunau le Fa’amasinoga ina ia maua atu le faila o lo o i ai le talosaga o le pemita a Fa’aaliga, ina ia iloa lelei ai poo ai moni lana sponsor. E tusa ai ma ripoti e 2 sa auina atu e le Ofisa o Femalagaaiga i le Fa’amasinoga, o lo o taua ai tagata eseese e to’alua fai mai o sponsor ia a Fa’aaliga.

O ripoti uma ia e pei ona saunoa Kruse, o lo o sainia e le afioga a Peseta. O ia ripoti sa talosagaina e le Ofisa Fa’anofovaavaaia ina ua sauni le fa’amasinoga e tuuina atu lana fa’asalaga ia Fa’aaliga i le 2013 ma le 2014, o taimi ia na lau ai ana fa’asalaga mai mataupu eseese e lua na molia ma ta’usala ai o ia e le malo.

I le ripoti muamua sa tuuina atu e le Ofisa o Femalagaaiga i le Fa’amasinoga i le 2013, o lo o taua ai le igoa o Pine Lauoletolo, o le igoa lea o le sponsor a Fa’aaliga. Ae i le ripoti na tuuina atu i le 2014, o lo o taua ai le igoa o Misipele Liaina fai mai o le sponsor lea a Fa’aaliga.

O Fa’aaliga na ulufale mai i le masina o Setema 29, 2012 i le pemita e 30 aso, ma nofo faasolitulafono ai lava i Amerika Samoa e le i toe fo’i i lona atunu’u i Samoa. A o nofo faasolitulafono ai o ia i totonu o le atunu’u, na molia ai o ia i le mataupu o le talepe fale ma le gaoi, e mafua mai i le faalavelave lea na ia osofaia ai se faleoloa i Pava’ia’i i le aso 21 Iuni 2013.

A o fa’asala ai Fa’aaliga i le toese i Tafuna, na fa’atoa maua mulimuli ane ai e Leoleo ia Mati 2014, o ia lea sa osofaia le isi faleoloa i Faleniu i le masina o Me 2013, ma faila ai loa e le malo le tagi lona lua fa’asaga ia Fa’aaliga.

A o tuli ai fa’asalaga fa’a falepuipui e Fa’aaliga i le toese, e fa’alua ona ia sola ese mai le falepuipui i Tafuna. O le isi ana solaaga na ia gaoia ai le ato tupe a se fafine sa nofonofo i totonu o lana ta’avale i luma o le Ofisa o le Eletise ma le Suavai (ASPA) i Tafuna i le aso 30 o Iuni 2016.

Ana leai le mataupu lea na sola ai Fa’aaliga i tua ma ave faagaoi le ato tupe a se fafine mai totonu o lana ta’avale, e le iloa lana solaaga muamua i le aso 19 Iuni 2016, lea na ia osofaia ai se faleoloa Asia i se taimi o le po ma ave faagaoi le tinoitupe e $1,500.

E taua tele i le Fa’amasinoga le faila o lo o i ai le pepa na talosaga ai le pemita a Fa’aaliga, o iina e iloa ai poo ai lea o lo o ia olegia le Fa’amasinoga.

Afai ae tu’u fa’atasi uma fa’asalaga fa’a falepuipui e tatau ona tuli e Fa’aaliga mai mataupu uma e pei ona tu’uaia ai o ia e le fa’amasinoga, e ono mafai ona taofia o ia i le toese i Tafuna mo le umi e 34 tausaga.

O le fesili tele o lo o tula’i mai i le Fa’amasinoga, o le a fa’apefea nei ona tausi e le malo lenei ali’i, ae o le a fo’i se ituaiga fa’asalaga e tatau i le Fa’amasinoga ona faia ina ia mautinoa ai e le a’afia tupe a le atunu’u mai le solitulafono a lenei ali’i.