Ads by Google Ads by Google

Lua galuega a le malo ua latalata tatala


[ata: SN]

Ua fa'ailoa e le Matagaluega o Uafu ma Malaeva'alele, ua latalata ona tatala aloa'ia le vaega mo va’alaiti i le uafu tele i Fagatogo, lea sa toe fausia ia malosi lelei, ma ua mae'a nei.

 

O lenei galuega, i le sauniga sa suaina ai le eleele ina ia amata lona fausaga, sa fa'ailo ai e mae'a lelei ia Novema 4, 2016 a'o loma ai le Palotaga o le faigamalo lea ua tutula'i nei. Peita'i ona o le tele fo'i o fa'aletonu na lutia ai lea galuega, lea ua tatou o'o mai ai pea i lenei taimi, ua fa'ato'a mae'a lelei ma ua agava'a e tatalaina aloaia.

 

O le aso Lulu o le vaiaso fou e tatala aloa'ia ai mo le maimoaga ma le fa'aaogaina atoatoa o lea vaega tele o le uafu.

 

Ua fa'apena fo'i ona fa'ailoa mai e le Pulega o le Mea Toso Va'a i Satala, o le latou fale fogafalelua lea e fa'atautaia ai latou galuega tau a'oa'oga ma ua fa'amautu fo'i i ai nisi mea sa fa'afalelemalu solo lava i le lotoa, e tatau ona mae'a lelei i le isi lua vaiaso o soso'o nei, ona fa'alauiloa mai fo'i lea o se latou tatalaga aloa'ia mo le silafia a le atunu'u atoa ma le malo i ona ta'ita'i ma le fa'auluuluga.

 

O le fale fogafalelua lea sa fa'atupeina i le $1 miliona o le tupe na maua mai le fa'atauga o Pone a le malo. O le susuga Moefa'auo Bill Emmsley sa ia fa'ailoa mai, "Ua toeititi lava uma le galuega, ma e tatau fo'i ona fesiligia aua e le o i ai lava nisi o asia le matou galuega, o lo'o pa'o lava i si matou pa'usisi ma ua lelei fo'i ua toe fesiligia mai e nisi o ali'i senatoa o le Maota Maualuga, ae ua toetoe a o'o atu le vala'au e pa'au mai e maimoa ma fiafia ua mae'a le galuega!"

 

Ona o lenei fo'i maota e fou lona fausaga, ina ia fa'aofi i ai nisi o vaega e fa o le latou tautua ma e fai fo'i si taugata o lona fausaga, atoa ai ma le nofoaga o lo'o fausia ai, o eleele e ao ina fa'amautu lelei le fa'avae o se fale e fausia ai.

 

Afai e mae'a lenei galuega, o le fa'ato'a toe fa'atuina lea o fale fou i le Nofoaga o le Mea Toso Va'a talu mai le 60+ tausaga ua te'a, ma o se fale lava ua leva na tatau ona fausia aua e tele fo'i le pisi sami fa'atasi ai ma galuega mamafa e faia ai.

 

I le taimi nei, o lo'o agava'a lava le tupe na fa'asoa atu i ai e fa'amae'a ai le faletele lea. O se fiafiaga fo'i o le aufaigaluega i lea vaega, le va'aia ua toetoe mae'a le latou fale fou, e fa'aosofia ai fo'i le fiafia e faigaluega ona ua fa'afouina mea uma i le va'ai ma le fa'atinoga o tiute fai i aso ta'itasi.

 

O le tele o le fale lea e 360ftX40ft le e fausia e le kamupani lotoifale, PRIMO Builders. O le agatonu fo'i ona tatalaina aloaia i le vaitau o le sisigafu'a o lea fale, ina ia maimoaina fo'i e ta'ita'i o Malo e fai mai i le tatou Fu'a ma fa'ailoa atu i ai nisi o suiga lelei ua mae'a o'o i ai le nofoaga e tautuaina ai va'a fagota, va'a mo femalaga'iga, ina ia avea ma se avanoa fa'amaketi o le latou tautua. Pe afai e le gafatia loa e le tatou Nofoaga o Mea Toso Va'a se galuega toe lipea o le a fa'ao'o atu loa i Fiti po'o Aukilani i Niu Sila mo na ituaiga o tautua.

 

"O le fou o nofoaga e fa'atino ai galuega, o le fa'alagona fo'i lea o le saogalemu i le tagata faigaluega, o lea fo'i ua fa'aosofia ai ma le fia galue mae'ae'a i tiute e fa'atino. E faigata ona fa'atino tiute pe afai e va'ai atu e tuai lava mea ia e tau kulisi atu e fa'atino ai le faiva lena e te mana'o e fa'amae'a. E tutusa lava ma le lagona fo'i lea pe a e oso atu i le ta'avale fou e te tietie ai i le galuega, ma lou oso i le ta'avale ua 60 tausaga talu ona fealua'i, ua tele mea e oia!" O se tala ata lea na fa'ailoa mai e se tasi o ali'i faigaluega i lea nofoaga.

 

O le aso patino ua fa'atulaga e le malo e tatala ai lenei galuega o Aperila i le vaitau o le Sisigafu'a 2018. Ae o le galuega latou, e mae'a lelei lava ia Fepuari 2018.

 

I le taimi nei, e iloga mai e le toe i ai se isi mea e fa'atuai ai le mae'a o le galuega, aua o mea uma e a'afia i le timuga ua mae'a uma, ae o le fa'aleleiga o le anofale lea ua alo atu nei i ai.

 

"O le fale pito i tele o lo tula'i i lenei lotoa, ua le mafai ona toe fa'aaogaina mai le tele o tausaga ona ua fa'aleagaina lava e le vai i taimi e timuga ai. O le mae'a ai o le matou fale fogafalelua lea, o se mea matagofie ua tupu i le matou fo'i vaega i lenei tausaga,” o a Moefa'auo lea.