LOLO: Ulua’i nofoaiga lenei ua galulue vava lalata ma le Initeria


Sui o le Ofisa o le Initeria i Amerika Samoa, Lydia Faleafine-Nomura i le taimi na tula’i ai i le fono a le Kapeneta e fa’afetaia le kovana ona o le avanoa sa latou galulue fa’atasi ai i le 4 tausaga ua tuana’i atu. [ata AF]
ausage@samoanews.com

O le fonotaga mulimuli a le afioga i le ali’i kovana ia Lolo Matalasi Moliga ma lana Kapeneta i le vaiaso na te’a nei, na fa’afetaia fa’apitoa ai e le ali’i kovana le sui o le Ofisa o le Initeria i Amerika Samoa ia Lydia Faleafine-Nomura, i le tu’uina mai lea o lona tauau e fesoasoani ai i le fa’aleleia o le sootaga i le va o Amerika Samoa ma le Ofisa o le Initeria.

 

“Ou te fa’apea atu i luma o le Kapeneta, o le ulua’i nofoaiga lenei ua sili atu ona galulue vava lalata ma le Ofisa o le Initeria, o le mafua’aga fo’i lena o le tele o suiga lelei ma le aoga ua mafai ona tatou maua mai ai”, o le saunoaga lea a le ali’i kovana i luma o le Kapenta.

 

Na fa’afetaia fa’apitoa e le ali’i kovana le faletua ia Faleafine-Nomura i galuega lelei e tele sa ia fa’atinoina i lona tulaga o le sui o le Initeria i Amerika Samoa, lea ua mafua ai ona fa’a faigofie le tele o atina’e ma galuega tetele ua mafai ona fa’atinoina i totonu o le atunu’u.

 

“O le 4 tausaga ua tuana’i atu o la tatou nofoaiga, sa tatou maitauina ai le tele o lu’itau sa tatou fetaia’i i le itu tau tupe, peita’i o le tatou galulue vava lalata ma le sui o le Initeria i Amerika Samoa, e le gata ua vave ai feutanaiga ma taumafaiga, ae ua fa’a faigofie ai ona fa’amatu’u mai e le Initeria vaega tupe e fesoasoani ai i le atina’eina o le malo”.

 

E lei mafai e le ali’i kovana ona ia tolaulauina galuega ta’itasi ua mafai ona fa’atupe e le Initeria mo Amerika Samoa, peita’i sa ia saunoa e fa’apea, “Afai e silasila le atunu’u fa’apea ai le malo i le tele o galuega tetele ua molimauina i soo se vaega o le atunu’u e aofia ai faleaiga, taligalu, auala ma soo se atina’e, o fua na o le tatou galulue vavalalata ma le Initeria”.

 

E le gata na fa’afetaia e Lolo ia le faletua ia Faleafine-Nomura, ae sa ia fa’afetaia fo’i isi tama fanau a Amerika Samoa o loo galulue i le Ofisa o le Initeria e aofia ai ma le susuga ia Nikolao Pula, fa’apea ai ma le Sui Failautusi o le Initeria ia Esther Kia’ina, e ui e le o se tagatanu’u o Samoa, ae na taua e le ali’i kovana le avea o ia o se totino o Amerika Samoa, ona o lea ua fa’aee i ai e ta’ita’i o le atunu’u le suafa matai ia Lupesinaosamoa.

 

Na fa’afetaia e le faletua ia Faleafine-Nomura le afioga i le ali’i kovana ma lana kapeneta i le avanoa na mafai ai ona latou galulue soosootauau i lenei 4 tausaga ua mavae atu.

 

Na taua e Faleafine-Nomura e fa’apea, e ui e le o ia o se totino o le Kapeneta a le Kovana, ae ua avea le avanoa maualuga na auai atu ai i soo se fonotaga ma auala ua ia lagona ai le fa’atauaina o ia, aemaise ai o le a’oa’oina o isi auala fou e fa’aleleia atili ai lana tautua mo Amerika SAmoa.

 

I le fa’aiuga o lana saunoaga, sa ia ta’utino ai lona fiafia pea e fa’aauau lana tautua ma le kapeneta fou a le ali’i kovana mo le isi 4 tausaga o loo lumana’i nei.

Comment Here