LOLO: E le agava’a maua ma le Lutena Kovana i ‘payout’

 Se tasi o vaaiga i le fonotaga a le Kovana ma lana Kapeneta i le vaiaso nei  [ata AF]
ausage@samoanews.com

Na fa’aaoga e le afioga i le ali’i kovana ia Lolo Matalasi Moliga le fonotaga a lana Kapeneta i le vaiaso nei, e fa’amanino ai se tasi o mataupu na fesiligia i le taimi o le iloiloga a le Komiti Soofaatasi o le paketi a le Fono Faitulafono i le vaiaso ua mavae, e fa’atatau i le agava’a lea o le kovana ma le lutena kovana i totogi fa’ai’u (payout), pe afai o le a latou tuua le Ofisa ma galuega o lo o galulue ai.

 

Saunoa le tofa i le Tootoo ia Lolo e fa’apea, o lo o manino le tulafono, o i latou uma e filifilia ma palotaina mo tofi o le malo, e le agava’a i ni ‘payout’.

 

“O le isi lenei mataupu o lo o fesiligia pea e le to’atele, pe aisea e agava’a ai maua ma le lutena kovana i penefiti o totogi fa’ai’u, ae o le mea moni ou te manatu e fa’amanino, o i latou uma lava sa palotaina e nonofo i nofoa o le malo, e le agava’a i latou i tulaga ia, o totogi o i latou ia ua mae’a ona fa’atulaga fa’aletulafono”, o se vaega lea o le saunoaga a le ali’i kovana.

 

O isi tagata faigaluega a le malo e le agava’a i penefiti nei e pei ona saunoa le ali’i kovana, o ali’i mautofi uma ua mae’a ona fa’atulaga fa’aletulafono o latou totogi, o i latou ia e le agava’a i penefiti pe a latou tuua galuega, “se’i vagana ai i latou uma e tofia e le kovana, pau na o tagata e agava’a i penefiti nei”.

 

E pei ona manino i le vaega o Polokalame Fa’apitoa a le ali’i kovana, lea o lo o i totonu o le paketi a le malo mo le tausaga tupe fou 2017, o lo o taua ai le vaega tupe e $1 miliona, ua fa’amoemoe e fa’aagaga e totogi ai totogi fa’ai’u o i latou uma sa tofia e le kovana e galulue i ofisa o le malo, lea e aofia ai Fa’atonusili, ni isi Sui Fa’atonusili, ma i latou o lo o galulue i le Ofisa o le ali’i kovana.

 

I le taimi o le iloiloga a le Komiti So’ofa’atasi o le paketi a le Fono Faitulafono, na fesiligia ai e le afioga i le ali’i senatoa ia Galea’i M. Tu’ufuli le Ta’ita’i o le Ofisa o le ali’i kovana, tofa Fiu Saelua e fa’atatau i penefiti nei, pe o aofia ai le kovana ma le lutena kovana, ae na tali Fiu “ioe”.

 

I le fa’aalia ai e le afioga a Galea’i o lona le lagolagoina o lea tulaga, sa ia fautuaina ai loa le tofa a Fiu ina ia saili se fautuaga mai le Loia Sili a le malo e fa’atatau i le mataupu lea, ona o lo o manino le tulafono, e le agava’a le kovana ma le lutena kovana i penefiti e pei ona taua, ona o i latou ma isi tagata faigaluega o lo o palotaina e le atunu’u, ua mae’a ona fa’atulaga fa’aletulafono o latou totogi.

 

Na fa’amanino atili e le ali’i kovana i lana kapeneta e fa’apea, o i latou uma sa tofia e le kovana e i ai afioga i Fa’atonusili, e agava’a i latou i penefiti e pei ona fesiligia, ae o le itu e pito sili ona taua, o i latou uma ia o lo o totogi i lalo o konekarate, ina ua mae’a ona saini le konekarate ma malilie i ai laua ma le lutena kovana, o le totogi lea e tatau ona maua e tagata ta’ito’atasi.

 

Saunoa atili le ali’i kovana i lana kapeneta e fa’apea, e le tau fesiligia la penefiti e maua e afioga i Fa’atonu pe a mae’a tausaga e fa o lana auaunaga i le malo, ma afai e mae’a ane le fa tausaga, ae toe 24 itula livi o lo o totoe, pau ia o itula livi e totogi.

 

“Ou te iloa e tele penefiti tou te agava’a i ai, ae o i tatou na tofia e o mai iinei e fesoasoani ma tautua o tatou tagata, o le mafua’aga lena ma te fa’afetaia ai la outou galuega, o le lagolagoina lea o tatou tagata i soo se auala. Ou te iloa o le tele o taimi e le o talafeagai ai totogi tou te maua, ae o le mea moni, o lu’itau na mafua ai ona tatou i ai iinei, ina ia tautua o tatou tagata”, o le saunoaga lea a le ali’i kovana.

Comment Here