LISA TUATOO - fa’au’u ma le Masters Homeland Security


Ms Lisa Tuatoo ma lona fa’ailoga Masters in Homeland Security. [ata: Leua Aiono Frost]

I le fa’au’uga a le Kolisi Tu’ufa’atasi o Amerika Samoa i le aso Faraile ua te’a, sa fa’alauiloa ai le ausia e le ulua’i tama’ita’i ua umia le fa’ailoga maualuga o le “Masters of Homeland Security,” o ia lea o Lisa Tuatoo mai Alofau.

 

Na fesiligia fo’i o ia, pe aisea ua ia manatu ai e sailia lea fa’ailoga e taua tele mo le aufaigaluega a lea fo’i matagaluega a malo.

 

“Ona o lo’o ou faigaluega i le tasi o vaega o lenei matagaluega o se tasi e va’aia toto’a tulaga o alagatupe e fa’atupea ai lea matagaluega, ua ou manatu ai e ao ina fa’alautele ma ia anoa fo’i so’u iloa i tulaga uma o le tausia o le saogalemu fa’alotoifale o le tatou atunu’u ma le Malo tele. Ou te mautinoa fo’i e ao ina maua se isi e ausia a’oa’oga ma fa’ailoga maualuluga tau le saogalemu fa’alotoifale o Amerika ma ona teritori uma,” o lana tali lea.

 

E lua tausaga na sailia ai le Masters mai le American Military Public University Systems, ina ua le mafai ona tuua le aiga i lea vaitaimi e lua tausaga le umi, ona o le a’oga a le fanau ma tiute faalotoifale fo’i tau le tina o le aiga.

 

Ina ua fesiligia le agatonu o lona tusi pasi e tusa ai o le galuega ma le matagaluega o lo’o faigaluega ai, ae fa’ailoa e Tuatoo, “O le ala fo’i lea na taumafai ai, aua e tatau ona fa’alautele ma ia loloto lou silafia i lea fo’i matata, ala uma e tatau ona fa’atulafonoina ai le galuega, ae maise o le taumafai ia fa’atautaia le galuega e tusa o mea ua a’oa’oina ai ma ia fesoasoani atu i isi ia fa’atautaia le galuega i ala fou ua a’otauina ai.”

 

I le aotelega o mea na a’otauina ai o ia, ma ua mae’a fa’amauina lea i le tusi pasi ua ia umia. Ua mae’a pasia e ia a’oa’oga tau tulafono e fa’atatau i le saogalemu fa’alotoifale o le atunu’u, tulafono tau le puipuiga o le malo fa’alotoifale, aoaoga i ala e ono o’o mai ai faiga fa’aterarisi, soligatulafono ma Fuala’au Fa’asaina, Tulafono tau Femalaga’iga, Aoaoga fa’a-Leoleo ma Tulafono Tau le Falepuipui ma ala e a’afia ai le saogalemu fa’alotoifale o le atunu’u. [Homeland Security and Defense, Security Risk Management, Domestic Terrorism & Extremist groups, Intelligence & Homeland Security, Homeland Security & the Law, Transnational Crime & Narcotics, Immigration Law, Policing & Corrections in Homeland Security, Criminal Law.]

 

E i ai fo’i a’oa’oga o loo fa’aauau pea lava ona fa’atula’ia e le Matagaluega o le Homeland Security ina ia mafai ona iloa patino e tagala faigaluega i lea Matagaluega, a’o taumafai i latou e fa’atautaia tiute pe a o’o i taimi e lutia ai le atunu’u i fa’alavelave fa’afuase’ia fa’anatura.

 

I le sailiga o lona Masters, ua fa’afetaia ai e Tuatoo ana faia’oga sa nafa ma le tele o ana aoaoga, Mr. David Turner ma Mr. David Nichols.

 

O lana pepa mulimuli mo lona fa’ailoga sa ia tapena ai le fa’atulagaga o le “FEMA Region 9 Pacific Grants Assessment System.”

 

O lona fa’ailoga ua ia ofoina atu lea ma lona agaga alofa i nai ona matua, Tuatoo Tautalatasi ma lona tina o Apomatagi Tuatoo o Alofau, “Fa’afetai mo la oula tausia, fautuaga ma le tatalo mo i matou uma la oulua fanau ma matou aiga. O lenei taumafaiga ua na’o sina mea itiiti e fa’afo’i atu ai le lua galuega tele ua faia mo i matou uma le fanau ma matou aiga ma fanau.”

 

O nisi o tofi o lo’o ia umia i lenei vaitau e aofia ai le avea ma se tasi o le Komiti Fa’afoe a le Boys and Girls Club of Pago Pago, Sui Peresetene o le Lions Club 2016-17; ma ua filifilia nei e avea ma Peresetene o le Lions Club of Pago Pago pe a oo atu i le masina o Iulai, 2017-18. E i ai fo’i lana auaunaga i le Atua e ala i lona tofi Failautusi o le Laulii  Firm Foundation Worship Center o Amerika Samoa; ma o se tina mo lana fanau e to’alua: Heranihilani BrenJuLynn ma Maximus Tony.

Comment Here