Ads by Google Ads by Google

Leai se fa’amatalaga fa’atatau taunu’u mai sui su’esu’e a le Feterale

ausage@samoanews.com

Ua faamaonia mai e le Komesina o Leoleo, tofa Le’i Sonny Thompson i le Samoa News, le leai o se fa’amatalaga ua taunu’u atu i lona Ofisa, e fa’atatau i ni sui o le Feterale ua taunu’u mai i le atunu’u, ona o le mataupu e pei ona tu’uaia ai ni tagata se to’atolu i le fa’aaoga fa’agaoi o tupe mai le feterale o lo o fa’atupe ai le polokalame a le Food Stamp.

 

Ina ua fa’atoa alia’e mai le mataupu e pei ona molia ai Vincent Toava, Jane Vasa ma Liren Zhang poo Kevin fo’i e pei ona iloa ai i le 2 vaiaso talu ai, na taua ai e ni isi o sui sinia o le malo i le Samoa News, o le vaiaso na te’a nei e taunu’u mai ai sui o le Feterale i le atunu’u, e vaavaai ma mulimulita’i i le tulaga o lo o fa’agasolo ai le su’esu’eina e le Ofisa o Leoleo a le atunu’u o lenei mataupu.

 

Na faamaonia mai e Le’i i le Samoa News i le vaiaso na te’a nei, le leai o se fa’amatalaga ua oo atu i lona Ofisa e fa’atatau i le malaga mai lea o ni sui o le Feterale i le atunu’u ona o lea mataupu.

 

Na fesiligia fo’i e le Samoa News le Loia Sili a le malo, tofa Talauega Eleasalo Ale e tusa ai o lenei mataupu, lea fo’i sa ia taua ai, na te le o iloa se fa’amatalaga e faatatau i ni sui o le Feterale ua aga’i mai i le atunu’u.

 

Ina ua fesiligia e le Samoa News le ofisa o le FBI i Honolulu, sa latou fa’ailoa mai, e leai se su’esu’eg a le FBI  i le mataupu o le food stamp i Amerika Samoa.

 

Na taua e se tasi o sui sinia o le malo e fa’apea, na pau lava le mafua’aga e ala ai ona aapa mai sui o le Feterale e taulima mataupu e aafia ai tupe mai le feterale i Amerika Samoa, pe afai e le lelei ona taulima e le Ofisa o Leoleo le su’esu’eina o ia mataupu.

 

E oo fo’i i ripoti e fa’atatau i le ono i ai lea o le avanoa e toe molia ai ni isi tagata e uiga i le mataupu a le Matagaluega l Auaunaga ma Tautua Lautele (DHSS) o lo o fa’agasolo i le taimi nei, e le i mafai fo’i e le Loia Sili poo le Komesina ona talanoa mai i lea tulaga.

 

O lo o tumau pea ona i ai i luma o le Fa’amasinoga Fa’aitumalo mataupu a i latou e to’atolu ua tu’uaia i lenei mataupu.

 

O le aso Faraile o le vaiaso nei lea ua fa’amoemoe e toe valaau ai le mataupu a Vasa. O Toeava ua faatulaga e toe tula’i i le aso Tofi o le vaiaso fou, sosoo atu ai ma le mataupu a Kevin i le aso Faraile e sosoo ai.

 

O iloiloga a i latou nei e to’atolu o le a sosoo ai, o le a fa’atoa iloa ai pe fa’ataunu’u a latou ulua’i iloiloga, pe finagalo fo’i e tu’u sa’o atu loa a latou mataupu i luma o le Fa’amasinoga Maualuga e fa’agasolo ai a latou iloiloga autu.

 

E tasi le moliaga mamafa o lo o tu’uaia ai Vasa, 17 moliaga mamafa fa’asaga ia Kevin, ae 19 moliaga mamafa o lo o tu’uaia ai Toeava.

 

O lo o taofia pea i latou uma nei i le toese i Tafuna, ina ua le mafai ona latou totogi tupe sa fa’atulaga e le fa’amasinoga e tatala ai i latou i tua mai le toese i Tafuna. E $10,000 le tupe ua faatulaga e tatala ai Vasa i tua, ae ta’i $450,000 ia Toeava ma Kevin.