O le tulaga tau fa’asoasoa i le tamaoaiga o le malo, atoa ai ma le naunau e ave le fa’amuamua i fesoasoani mo aiga na pagatia i le ‘afa o Gita na pagatia ai le atunu’u i le masina na te’a nei, o ni isi ia o mafua’aga ua mafua ai ona faia le fa’aiuga, o le a leai ni tuuga fautasi mo le fu’a o lenei tausaga.

E le gata i le taofia o tuuga fautasi, ae ua tasi fo’i le finagalo o le Komiti o le Fu’a, i lalo o se fautuaga mai le afioga i le ali’i Kovana ia Lolo Matalasi Moliga, o le a taofia uma atu ai ma isi uma polokalame fa’aalu tupe sa masani ona fa’atinoina i le taimi o le sisiga fu’a i tausaga ta’itasi, e pei o le ta’amilosaga o Kirikiti Fa’asamoa, faapea ai ma Fusuaga Fa’avaomalo i le va o le au fusu mai Samoa ma Amerika Samoa nei.

I se fonotaga faapitoa a le Komiti o le Fu’a ma Kapeteni o fautasi uma i le atunu’u i le aso Faraile o le vaiaso na te’a nei, na fa’amautuina ai loa lenei fuafuaga.

O le afioga i le Maoputasi ia Mauga Tasi Asuega, o le isi lea Ta’ita’ifono o le Komiti o le Fu’a na fai ma sui o le Komiti e fa’alauiloa le fa’aiuga.

Saunoa Mauga e fa’apea, ua a’e se finagalo o le ali’i Kovana o le malo, ina ia fa’asao tupe fa’aalu a le malo i lenei taimi, ae ave le fa’amuamua e fesoasoani ai i aiga na mafatia i le ‘afa, atoa ai ma le tau toe fa’aleleia o meatotino a le malo sa fa’aleagaina i le malosi o le matagi.

“Ua tatou molimauina tulaga pagatia ua i ai le tamaoaiga o si o tatou atunuu, ma ua manatu ai le Kovana ma le Komiti, o le a taofia tuuga fautasi mo le fu’a o lenei tausaga, atoa atu ai ma isi uma faagaioiga fa’aalu tupe e pei o kirikiti Faasamoa ma fusuaga, ina ia faasao mai ai le tupe e fa’atino ai fuafuaga taua a le malo”, o le saunoaga lea a Mauga.

Sa ia taua fo’i le i ai o se manatu e fa’ataunu’u pea tuuga fautasi, ae ave le avanoa i fanau aoga latou te ‘aloina Sa a afioaga ta’itasi, peita’i ua toe taofia lea fuafuaga, ona o le fautuaga mai le Fa’atonusili o Aoga a le malo, i le le lava lea o aso e tapena ai fanau aoga mo suega faai’u o lenei tausaga.

Pau polokalame o le fu’a o lo o fa’amoemoe e fa’ataunu’uina pea, o le sauniga lotu ma le sisiina o le fu’a, atoa ai ma fa’afiafiaga i pese ma siva fa’asamoa.

O loo tumau pea le i ai o le valaaulia mai Samoa, e pei ona i ai le afioaga e tasi ua filifilia e le alii Palemia e fai ma sui o Samoa, atoa ai ma aoga e tolu ua filifilia i totonu o le atunu’u latou te fa’atinoina fa’afiafiaga. O ia aoga e aofia ai Fagaitua, Malisi Fa’asao, faapea ai le Kolisi Tuufaatasi.

Na lagolagoina e le afioga i le Maopu ia Soliai T. Fuimaono le finagalo o Mauga ma le Komiti o le Fu’a, ina ia taofia tuuga fautasi o lenei tausaga, ona o tulaga pagatia e pei ona tula’i mai.

Saunoa Soliai e fa’apea, ua uma ona tasi le finagalo o le afioaga o Nuuuli, e le tausinio ana Sa e 2 o le Manulele Tausala 1 & 2 pe ana faapea e taunuu se tuuga fautasi o lenei tausaga, ae talu ai o lea ua folasia le finagalo o le Komiti, ua lagolagoina fo’i e le latou afioaga.

Saunoa le sui o le Sa o le Matasaua mai Manu’a, tofa Malaepule Saite Moliga e fa’apea, afai o le finagalo lea o le Kovana ia taofia tuuga fautasi, sa tatau fo’i la ona taofia uma isi fa’afiafiaga e alu ai tupe e pei o pese ma siva.

Na faailoa e Malaepule e fa’apea, soo se sisigafu’a lava, o tuuga fautasi, o le i’oimata lea o polokalame o le fu’a, ona o iina o loo taoto i ai lagona fiafia o le atunu’u e tulimata’i i ai la latou silasila i le taimi o faigamea i le tai.

Na toe saunoa Mauga e fa’apea, sa toe fesootai le Komiti o le Fu’a i le ali’i Palemia, ia Tuilaepa Sailele Malielegaoi, e logo i ai le fuafuaga ua faia, e taofia uma polokalame fa’afiafia o le fu’a, peita’i na fa’ailoa mai e le Palemia, ua mae’a ona tapena le afioaga mai Samoa ua lautogia mo le pese ma le siva, ma o le mafua’aga lena ua toe fa’aauau ai loa fa’afiafiaga i pese ma siva.

I le fa’aiuga o le fonotaga, na lagolagoina uma ai e sui o isi Sa uma sa auai le finagalo o le Komiti, ina ia taofia tuuga fautasi mo le fu’a o lenei tausaga.