Leai ni moliaga fa’asaga ave Loli na maliu ai se ali’i Pago Pago

ausage@samoanews.com

O le mae’a ai o le su’esu’ega sa fa’atautaia e le Vaega o le Traffic Division a le Matagaluega o Leoleo, e tusa ai o le fa’alavelave lea na maliu ai se ali’i e 25 tausaga le matua mai Pago Pago i le aoauli o le aso Faraile na te’a nei, ua fa’ai’uina ai i le ripoti a Leoleo le leai o ni moliaga e faia fa’asaga i le ave ta’avale o le Loli na a’afia i le fa’alavelave.

 

Na taua e se Leoleo Sinia mai le Matagaluega o le Puipuiga o le Saogalemu Lautele e fa’apea, o le ripoti lea na fa’amoemoe e tatau ona tauaao atu i le Ofisa o le Loia Sili i le aso ananafi, o lo o taoto ai le tulaga lea o le “tapunia o le ripoti”, ona o lea ua mae’a su’esu’ega ma manino ai, e lei i ai se gaioiga e atagia mai ai na silafia e le ave ta’avale le taimi na tula’i mai ai le fa’alavelave.

 

E pei ona taua e le Samoa News i lana ripoti i le aso Gafua na te’a nei, ao fa’agasolo mai su’esu’ega a Leoleo e uiga i le fa’alavelave sa tula’i mai i Pago Pago, i luma tonu o le nofoaga o Pago Pago Youth Center, sa faigata ai ona manino le mafua’aga tonu o le fa’alavelave.

 

Ae ina ua maua e Leoleo se ata sa pu’eina i le masini pu’e ata a se tasi o Faleoloa e latalata ane i le nofoaga na tula’i mai ai le fa’alavelave, na mafai ai lona manino le tulaga atoa o le fa’alavelave na tula’i mai.

 

I totonu o le ata sa pu’eina, o lo o vaaia ai le taimi na aga’i mai ai le Loli na a’afia i le fa’alavelave mai sisifo e aga’i atu i le itu i sasa’e o le motu, na fa’afuase’i ai ona vaaia le oso o le ali’i ua maliu i tua o pa’u o le Loli.

 

Na taua e le Leoleo Sinia e fa’apea, o le gaioiga sa molimauina i totonu o le ata, ua mafai ai ona faia le fa’aiuga e tusa ai o le mataupu e pei ona tula’i mai.

 

Na taua e se molimau le mae’a lea ona fa’atalatalanoa e Leoleo le ali’i ave Loli e tusa ai o lenei fa’alavelave, ma ua atagia mai ai, e leai ni moliaga e faila fa’asaga ia te ia i le taimi nei.

 

Saunoa atili fo’i le molimau e fa’apea, o ripoti na mafai ona maua mai e Leoleo i le falema’i sa taua ai, sa i ai fo’i ni fa’alavelave se lua na a’afia ai fo’i le ali’i ua maliu i se taimi ua te’a, lea fo’i na ripotia ai ana taumafaiga e fa’aoo manu’a i lona tino, e atagia mai ai se taumafaiga ina ia pule ai i lona soifua.

Comment Here