Ads by Google Ads by Google

Leai ni fa’alavelave matuia na tutupu i le aso o le Lotu a Tamaiti


Ni isi o matua ma aiga o fanau a le Ekalesia EFKAS i Taputimu i le mae’a ai o sauniga o le Lotu a Tamaiti o lenei tausaga. [ata AF]
ausage@samoanews.com

Na i’u manuia le fa’amanatuina o le Aso Sa Pa’epa’e mo le fanau i totonu o le atunu’u i lenei tausaga, e aunoa ma ni fa’alavelave matuia na tutupu mai ai e ono a’afia ai se soifua o se tasi, e pei ona fa’amaonia mai e le afioga i le ali’i Komesina o Leoleo i le Samoa News.

 

Sa fa’amaonia mai fo’i e se tasi o Leoleo Sinia o le Matagaluega o Leoleo e fa’apea, na pau i latou na taofia e Leoleo i le fa’aiuga o le vaiaso, o i latou na ripotia o lo o tagofia le ‘ava malosi ma taumafai e faia ni uiga e lepeti ai le nonofo filemu o tagata lautele.

 

Talu mai le taeao o le aso Gafua nanafi, e le atoa se to’a 10 o tagatanu’u na taofia a Leoleo i le toese i Tafuna, ona o tu’uaiga i le fa’atupu vevesi i nofoaga faitele, atoa ai ma le ave ta’avale ‘ona.

 

O le taeao nei i le itula e 8:30 lea ua fa’amoemoe e tutula’i uma ai i latou nei i luma o le fa’amasinoga fa’aitumalo, mo le tu’uina atu o a latou tali e tusa ai o tu’uaiga fa’asaga ia te i latou, ma fa’atulaga ai loa le aso e toe valaau ai a latou mataupu i luma o le fa’amasinoga.

 

E ui o ia vaaiga i ni isi o Tama sa taofia i le toese ona o le tagofia o le ‘ava malosi, ma latou le mauaina ai le avanoa e molimauina ai tapenaga a fanau i le latou aso fiafia, peita’i sa molimauina e le Samoa News i Malumalu Tapua’i i le tele o afioaga, le lanupa’epa’e fa’asoloatoa o laei a fanau atoa ai ma latou teuga, i le taimi na sauni ai e fa’atino a latou tala fa’a le Tusi Paia atoa ai ma pese faigata.

 

O ni isi o Ekalesia na fa’atoa fa’atino a latou polokalame o le Lotu a Tamaiti i le afiafi, ona sa tu’u le avanoa i sauniga o le taeao mo le au matutua, ae o ni isi fo’i o Ekalesia, sa fa’atinoina polokalame a le fanau i le taimi o le sauniga i le taeao.

 

E pei ona taua e le afioga i le ali’i kovana ia Lolo Matalasi Moliga i lana feau fa’amanuia mo le aso fa’apitoa o le fanau i lenei tausaga e fa’apea, o le fa’aalia o le alofa moni o matua aemaise ai o le atunu’u atoa i fanau, e le gata o le fa’amanatu lea o lo latou aso faapitoa, ae manatua ai fo’i ma ni isi o fanau o lo o a’afia i sauaga, fanau ua maliliu, atoa ai ma fanau ua matua oti, o lo o latou mana’omia fo’i se fesoasoani.

 

Na fa’ai’u le feau fa’amanuia a le afioga i le ali’i kovana i lona talosagaina lea o le atunu’u atoa ina ia tutu fa’atasi e lagolago ma fa’ataua le aso fa’apitoa mo fanau i le atunu’u ma lalolagi i lenei tausaga.