Ads by Google Ads by Google

Leai ni fa’alavelave matuia na tutupu i aso malolo Kerisimasi


Ni isi o ali’i na taofia faapagota e Leoleo i aso malolo o le Kerisimasi na te’a nei, i le taimi na aga’i atu ai i le fale fa’amasino i le taeao ananafi. [ata AF]

Tama’ita’i e to’afa sa taofia e Leoleo i aso malolo o le Kerisimasi na mavae atu nei. [ata AF]
ausage@samoanews.com

Mai le to’a 16 o ali’i ma tama’ita’i na taofia fa’apagota e Leoleo i le fa’aiuga o le vaiaso, e aofia ai ma le aso o le Kerisimasi na se’i mavae atu nei, e leai ma se isi o i latou na tu’uaia i ni solitulafono mamafa poo ni fa’alavelave matuia, se’i vagana ai lava moliaga mama e mafua mai i le ‘ona ma le fa’atupu vevesi i nofoaga lautele i le atunu’u.

 

O i latou sa taofia fa’apagota i le fa’aiuga o le vaiaso na te’a nei e aofia ai ali’i e to’a 12 ma tama’ita’i e to’a 4, lea ua tu’uaia e le malo i moliaga eseese e aofia ai le fa’atupu vevesi i nofoaga faitele, fa’atupu vevesi i totonu aiga, fa’apea ai ma le fa’ao’olima ma le fa’aleaga meatotino i le tulaga tolu.

 

E tusa ai ma fa’amaumauga a le fa’amasinoga fa’aitumalo, o le afioaga i Pago Pago e pito to’atele tagata na taofia mai ai e Leoleo i le aso Gafua na te’a nei, lea e to’a 5 i latou na taofia mai ai e Leleo, e aofia ai ali’i e to’atolu ma ni tama’ita’i se to’alua, lea na taofia mai i ni fa’alavelave se lua na tula’i mai i Pago Pago.

 

O ali’i e to’alua na taofia fa’atasi i laua e Leoleo ona o tu’uaiga i le pisapisao atoa ai ma le faia o uiga e ono save’u ai le nonofo filemu o tagata lautele, ae o le isi ali’i e to’atasi ma tama’ita’i e to’alua sa taofia fa’atasi i latou i le fa’alavelave e tasi.

 

Na taua i fa’amaumauga a le fa’amasinoga e fa’apea, o tama’ita’i e to’alua na taofia mai Pago Pago, o loo tu’uaia i laua i le fa’atupu vevesi i nofoaga faitele, e mafua mai i le lafo o upu mataga ma le laulauvavale, lea na mafua ai loa ona fa’ao’olima i ai se ali’i i le isi tama’ita’i, ma ua molia nei e le malo lea ali’i i le moliaga mama o le fa’ao’olima i le tulaga tolu.

 

E to’alua isi ali’i na taofia mai e Leoleo i Tafuna i le po o le aso To’ona’i na te’a nei, ma la fai kerisimasi ai i totonu o le toese, e mafua mai ina ua la ‘onana ma i’u ina la fa’aleagaina ai le ta’avale a se isi ali’i sa latou taupu.

 

O se inugapia sa faia a ni ali’i se to’afa i Tafuna, lea na tula’i mai ai loa se vevesi ina ua tau upu ai i latou, ma i’u ina fa’aleaga ai e ali’i e to’alua le ta’avale a le ali’i sa latou tau upu ma fa’aleagaina ai le tioata.

 

E to’alua isi ali’i na taofia mai e Leoleo i Leone ma ua tu’uaia nei i le fa’atupu vevesi i nofoaga faitele, e mafua mai ina ua lafo upu mataga i le leva o le po ma laulauvavale i luma o se faleoloa, i le mae’a ai lea o se latou inugapia sa faia ma ni isi o a latou uo.

 

Na teena e i latou ua molia tu’uaiga a le malo fa’asaga ia te i latou, ma ua toe tolopo a latou fa’amasinoga e toe valaauina lea i le masina fou o Ianuari, ae ua tatalaina nei i latou i tua i lalo o poloaiga a le fa’amasinoga e fa’atalitali ai taimi ma aso ia ua fa’atulaga e toe valaau ai a latou mataupu.

 

O le to’afa o i latou na taofia i le fa’aiuga o le vaiaso, o loo fa’anofovaavaaia i latou i luma o le fa’amasinoga fa’aitumalo, ae o le to’alua o i latou e le o tulaga lelei a laua pepa nofomau, ma ua toe taofia nei i laua ia e to’alua i lalo o le vaavaaiga a le Ofisa o Femalagaaiga, e fa’atali ai le aso lea ua fa’atulaga e toe valaau ai le la mataupu.

 

Na taua e le Sui Komesina o Leoleo i le Samoa News le saogalemu o le atunu’u i le aso Kerisimasi na mavae atu nei, e le gata e leai se soifua na ma’imau ae leai fo’i se fa’alavelave matuia na a’afia ai ni isi o le atunu’u.

 

“Sa tulaga lelei lea le tautua a le Ofisa o Leoleo i le fa’aiuga o le vaiaso atoa ai ma le aso o le Kerisimasi na mavae atu nei, e laiti lava nai fa’alavelave na tutupu mai i vaega eseese o le atunu’u, e mafua mai i le ‘ona ma le fa’atupu vevesi i nofoaga lautele, lea fo’i sa tali atu i ai ali’i ma tama’ita’i Leoleo mo le fa’a to’afilemuina o le vevesi sa tula’i mai”, o le saunoaga lea a Vaimaga Maiava.

 

Na fa’afetaia e le sui komesina le atunu’u atoa i lo latou fa’autagiaina mai o le talosaga a le Matagaluega o Leoleo, ina ia fesoasoani i le fa’a faigofieina o le latou galuega e ala i le taofi o le soliina o le tulafono ae fa’amuamua le saogalemu i taimi uma.

 

“E toe talosagaina ai le mamalu lautele o le atunu’u ina ia tatou galulue fa’atasi i le tausiaina o le filemu aemaise ai o le fa’amalosia o tulafono, ao tatou aga’i atu ai i le fa’amanatuina o le aso o le tausaga fou i le fa’aiuga o le vaiaso nei. O fautuaga masani lava mo le atunu’u, afai e te tagofia le ‘ava malosi ia nofo lelei i le fale, aua e te fa’afoeina se ta’avale, afai fo’i e te tafao i le fa’aiuga o le vaiaso, tu’u le ta’avale i le fale ae vili sau taxi e te malaga ai ina ia mautinoa e saogalemu oe, saogalemu fo’i le mamalu o le atunu’u lautele o loo feafioa’i i luga o le auala”.