Le maua se tasi a Aua ma Leloaloa mo so latou Senatoa fou


[ata: archive]
ausage@samoanews.com

E o o mai lava i le taimi nei o lo o fefaloa’i pea lava afioaga o Aua ma Leloaloa/Atu’u, i le tau sailia lea o so latou Senatoa i totonu o le maota maualuga a le Senate mo le isi 4 tausaga o lo o lumana’i nei.

 

I le fonotaga a le Itumalo o le Maoputasi i le vaiaso nei, lea na usuia i le malae i Gagamoe, le afioaga e afio ai le afioga i le Maoputasi ia Mauga Tasi Asuega, na manino ai le tulaga o lo o i ai le mataupu i le taimi nei, i le leai lea o se tasi ua maua i le va o Aua ma Leloaloa/Atu’u mo se tasi na te nofoia le nofoa o le itumalo.

 

E pei ona silafia e le atunu’u, o le itumalo o le Maoputasi, e to’atolu ona sui i totonu o le maota maualuga a le Senate, o lea la ua mae’a ona filifilia sui e to’alua, toe to’atasi le sui o lo o fa’atalitali lona fa’amautuina i le taimi nei.

 

Mo le afioaga i Pago Pago, o le tofa Tuaolo M. Fruean lea ua toe filifilia e avea ma Senatoa, ae o le afioga i le Maopu ia Fano M. Shimasaki lea ua fai ma sui o Fagatogo, Fagaalu, Utulei/Gataivai.

 

Na fa’aalia e le tofa a Iulogologo J. Pereira i le fono a le Itumalo i le aso Gafua na te’a nei e fa’apea, ina ua fono Aua ma Leloaloa e saili so latou sui, na tasi ai le afioaga i Aua i le afioga ia Tilo Vasaga Tilo e avea ma o latou sui, peita’i sa toe fa’aoloolomaau fo’i le afioga i le Maopu ia Uti Petelo o lo o ia nofoia le nofoa o le itumalo i le taimi nei, mo se avanoa e toe fa’aauau ai lana tautua mo le isi 4 tausaga.

 

Ae i le fa’aiuga o lea fonotaga e pei ona saunoa atili Iulogologo, na saunoa aloaia ai Uti, o ia o le a toe nofoia le nofoa o le itumalo, ae malolo le afioga ia Tilo.

 

E pei ona masani ai le itumalo o le Maoputasi, afai e le maua se tasi i le sailiina o le tofa i tulaga o tofi a le Itumalo i le Senate, ona taoto atu loa lea i se fa’aiuga mai le afioga i le Maoputasi ia Mauga.

 

Na toe fa’amanatu e Tuaolo i le itumalo le fautuaga e masani ona tu’uina atu i soo se taimi e saili ai le tofa i tulaga o tofi, ina ia aua ne’i fa’amoemoe le itumalo e taoto mai a latou mataupu e fai atu e Mauga se fa’aiuga, ona o ni isi o fa’aiuga e fiafia ai, ae o isi taimi e fa’anoanoa ai.

 

“O tulaga o tofi a le itumalo e tumau, ae o le itu taua o le nonofo fealofani ma le galulue fa’atasi o le itumalo atoa, afai fo’i tatou te pepese i aso uma e lelei le Atua, e le tatau la ona faigata le sailiina o se tofi mo Aua ma Leloaloa, o le mafua’aga lea ua ala ai ona pisapisao tupulaga i le tatau lea ona palota sui o le maota maualuga a le atunu’u, ona o tulaga fa’apenei o lo o tutupu mai ai”, o le saunoaga lea a Tuaolo.

 

Na fa’aalia e sui o le afioga i Aua e fa’apea, e le toe suia le latou fa’aiuga ua mae’a ona tasi i ai le afioaga, o le a avea le afioga a Tilo ma o latou sui i le senate, ona o Aua lea ua o o atu i ai le fa’asologa o le tofia le itumalo.

 

E to’atele sui o le itumalo na maua le avanoa e fa’aalia ai o latou finagalo e fa’atatau i lenei mataupu.

 

Saunoa le tofa a Ta’amu Vaigafa e fa’apea, e le o se taimi muamua lenei ua tula’i mai ai se tulaga fa’aletonu faapea i le tofi o Aua ma Leloaloa, lea fo’i na fai ai loa e Mauga le fa’aiuga i ni tausaga ua mavae, e avea ai o ia ma o latou sui i le Senate.

 

Na fa’amanino atili e Ta’amu e fa’apea, sa manino le saunoaga a Mauga i le aso lea, afai e mae’a le nofoaiga lea ua ia fa’aauauina, ona toe fa’asolo lelei loa le latou tofi, amata mai i Aua ona sosoo ai loa lea ma Leloaloa.

 

“Ina ua mae’a le taimi na tauave mai ai e Mauga le nofoa a Aua ma Leloaloa, na tula’i mai ai loa le afioga ia Faumuina Tagisiaali’i e fai ma sui o Leloaloa i le nofoa, ae talu ai ua valaau le Atua i le afioga ia Faumuina, o lea na tofia ai loa le afioga i le Maopu ia Uti na te fa’aauauina le tofi, o lo’u la taofi, o Aua lea ua o o atu i ai le fa’asologa o le tofi”, o le saunoaga lea a Ta’amu.

 

I le ogatotonu o le fono, na talosaga ai Iulogologo ia Mauga mo se avanoa e toe fa’aauau ai le tautua a le afioga i le Maopu ia Uti.

 

O le fa’aiuga lea ua faia e le Itumalo, o le aoauli o le aso Lulu e toe fono ai le itumalo mo le fa’ailoaina o le tofi Senatoa a Aua ma Leloaloa, ae afai e o o atu i ai e le maua lava se tasi, ona taoto atu loa lea o le mataupu e fai e le afioga i le Maoputasi ia Mauga le fa’aiuga.

Comment Here