Ads by Google Ads by Google

Le manuia taumafaiga au kirikiti mai Samoa ma NZ siamupini Mosooi


Taumafai sui o le a’u kirikiti a Tama o le Malaka mai Niu Sila e sapo le polo i le latou ta’aloga ma Masefau i le vaiaso na te’a nei. [ata AF]
ausage@samoanews.com

Ua le manuia taumafaiga a ‘au masi’i e lua na valaaulia e auai i le ta’amilosaga o Kirikiti Fa’a Samoa mo le Mosooi a Amerika Samoa i lenei tausaga, ina ua le mafai e ia ‘au e lua ona ausia le aofa’i o manumalo e tatau ai ona maua so laua avanoa e tausinio ai i le sailiga o le siamupini i lenei vaiaso.

 

I le mae’a ai o ta’aloga ta’i 5 a le ‘au a le Tanifa o le Vao mai Sili, Savai’i ma le ‘au o Tama o le Malaka mai Niu Sila i le ulua’i vaiaso o le ta’amilosaga, na tula’i mai ai e na o le ta’i tasi a laua malo sa maua.

 

Na taua e sui  o le Komiti o le Ta’amilosaga Kirikiti i le Samoa News e fa’apea, ua mae’a ta’aloga e 5 a le ‘au a Niu Sila, e na o le tasi le malo na maua ae 4 faiaina. O le manumalo a le ‘au a Niu sila na maua lea i la ta’aloga ma le ‘au mai Vaitogi.

 

Ae mo le ‘au a le Tanifa o le Vao mai Sili, Savai’i, e tasi le latou malo ua maua, ae 3 faiaina ua i ai, ma le latou ta’aloga mulimuli ma le ‘au malosi mai Alofau i le vaiaso nei, ona manino ai loa lea o le fa’aiuga o ana ta’aloga o le a i ai. Na manumalo le ‘au mai Sili i le ‘au mai Niu Sila i le la ta’aloga i le vaiaso na te’a nei.

 

Ae mo le ta’amilosaga a le Mosooi, e 3 ‘au o lo o tutusa i le taimi nei i le ta’i tasi faiaina, o le ‘au a Tama o le Mosiula mai Masefau, La’u Samoa mai Faleniu, ma le ‘au mai Alofau, ma o lo o fa’atali le komiti i le fa’aiuga o le ta’aloga a Alofau ma le ‘au mai Sili lea ua fa’amoemoe e faia i le vaiaso nei (afiafi ananafi), ona iloa tonu ai loa lea o le tulaga e tatau ona i ai ‘au latou te sailia le siamupini.

 

“Afai e faiaina Alofau ia Sili, lona uiga ua lua faiaina a Alofau ae ta’i tasi faiaina a Masefau ma Faleniu, ona taoto mai ai loa lea o ‘au e lua e la te sailia le siamupini, o le ‘au a Masefau ma le ‘au a Faleniu, ae afai e manumalo Alofau ia Sili, ona tutusa ai loa lea o ‘au e 3 i le ta’i tasi faiaina, o le ‘au lea a Alofau, Masefau ma Faleniu, o ‘au fo’i ia e tolu o le a latou sailia le siamupini o le Ta’amilosaga a le Mosooi o lenei tausaga”, o le saunoaga lea a le sui o le Komiti.

 

MASEFAU VS NIU SILA

 

O se tasi o ta’aloga mataina sa mafai ona molimauina e le atunu’u i le aso Faraile o le vaiaso na te’a nei, o le ta’aloga lea i le va o Masefau ma Niu Sila, lea sa fa’ataunu’uina i le malae i Fagaalu.

 

Na muamua tata Niu Sila ae talitua’aa Masefau, ma maua ai ‘ai e 103 a Niu Sila ae 19 a latou pe. O se tasi o tulaga sa molimauina i le ta’aloga lea, e le gata i le lelei o le tata a Niu Sila, ae sa matua mataina fo’i le talitua’a a Masefau.

 

E 20 ‘ai o Niu Sila na maua ae ua 6 a latou pe ua i ai, lea na maua mai ina ua sapoia e Masefau ni isi o ta maualuluga a Niu Sila, peita’i i le ogatotonu o le ta’aloga, na vaaia ai loa le tau faigata o le ta’aloga, ina ua faigata ona toe maua ni pe a Niu Sila, ae ua vaaia le fa’aopoopo pea o a latou ‘ai i luga, ma vaaia ai loa le fesuia’i o fa’ate’a a Masefau i le afa fa’ai’u o le ta’aloga, ma vaaia ai loa le toe maua mai o isi pe fa’aopoopo a Niu Sila.

 

E lei avea le malosi o le toulu o timuga ma itu na fa’avaivai ai tama o le Mosiula mai Masefau i le latou talitua’a, ae sa vaaia le to’a o le ‘au atoa ai ma le lelei o le sapo, lea na mafai ai ona latou sapoia isi ta e 3 na fa’atu sa’o i luga, ma maua ai isi pe fa’aopoopo e 3 mo Niu Sila ma tula’i mai ai loa ‘ai fa’ai’u a Niu Sila i le 103 ae 19 a latou pe.

 

E na o le 15 pe a Masefau na maua ae atoa loa ‘ai e 104 a Niu Sila sa latou tuliina, ma manumalo ai loa Masefau i le la ta’aloga finau ma le mataina. I le amataga o le ta’aloga, na fa’atoa maua le pe muamua a Masefau ina ua 24 a latou ‘ai na maua. O le fa’aletonu o le fa’ate’a a Niu Sila i le afa muamua o le latou ta’aloga na vaaia ai le oso i luga o ‘ai a Masefau, ma faigata ai e Niu Sila ona maua ni pe o le ta’aloga, peita’i ina ua oo atu i le ‘afa lona lua o le ta’aloga, na amata ai loa ona taia lelei le fa’ate’a a Niu Sila ma amata ai loa ona sosoo pe a Masefau, e aofia ai ma isi pe e 5 na maua i le lelei o le sapo a le talitua’a a Niu Sila.

 

Na toe taumafai mai lava Niu Sila i le vaega fa’ai’u o le afa lona lua o le latou ta’aloga i le tuliina lea o ni isi pe fa’aopoopo mo Masefau, ae sa vaaia fo’i le malosi o le puipui a Masefau atoa ai ma le lelei o le latou ta, ma tula’i mai ai loa ‘ai fa’ai’u a Masefau i le 104, ae na o le 15 pe, ma manumalo ai loa Masefau i le la ta’aloga ma Tama o le Malaka mai Niu Sila, o le ta’aloga mulimuli fo’i lea a le ‘au mai Niu Sila, ma ua sauni atu nei i latou e toe fo’i atu i laufanua o Aoteroa i Niu Sila.