Ads by Google Ads by Google

Le fiafia Afalava i le le talia Fa’atonusili o Galuega talosaga Faipule


Le afioga i le Tama’ita’i Fa’atonusili o le Ofisa o Galuega Lautele a le malo ia Faleosina Voigt i le taimi na molimau ai i luma o le maota o sui i le taeao ananafi. [ata AF]

Le affoga i le ali’i Faipule ia Gafatasi Afalava. [ata AF]
ausage@samoanews.com

Na fa’aalia e le afioga i le ali’i Faipule mai le itumalo o Leasina/Atiulagi ia Gafatasi Afalava lona finagalo le fiafia fa’asaga i le Fa’atonusili o le Matagaluega o Galuega Lautele a le malo, i le tele o tausaga o talosagaina e afioga i Faipule mai itumalo ta’itasi galuega e fia fa’aleleia i totonu o latou itumalo, ae o o mai lava i le taimi nei o lo o maitauina pea le tele o tulaga fa’aleteonu.

 

“Ua fai si o’u leva i le Fono, ae o mataupu lava nei o lo o talanoaina, o le mea ua tupu, ua sau lo’u le toe fia talanoa i nei mataupu, sau ai fo’i ma lo’u le toe talitonuina o le faigamalo ma lau matagaluega, o le taula atoa na ou mana’o ai e te toe tula’i mai i le tofi, ia fai oe ma leo o afioga i Faipule i mea matou te manana’o i ai, e vava lalata atu le lua mafutaga ma le Kovana nai lo matou, ma faigofie ai ona e tago e tulei mea matou te manana’o ai i le Kovana, ae o le upu moni, e taua galuega nai lo le fai o folafolaga”, o se vaega lea o le saunoaga a Gafatasi ia Faleosina.

 

“Ua ou fiu e talosaga atu, ua sau fo’i lo’u musu ou te toe alu atu, tele tausaga o fesili atu i galuega e fia fa’ataunu’uina, ae foliga mai tou te fa’alagolago lava i konekarate, a o fea Inisinia a lou Ofisa e tatau ona faia galuega nei. Sina, e le o se galuega a Afalava ma Faipule le o atu soo e talosaga atu, e le valea fo’i a’u, ua tiga ai lo’u ulu, fiu e o atu, talosaga atu, talosaga atu, ae leai lava se mea, ua taunu’u ai le upu, ua fa’apito manu ia tasi, ae ese lava galuega ia e fai, pe tou te fai mai o tupe a le malo na aumai i fea ma fea, o la’u tala, o tupe uma lava na a le atunu’u”.

 

“Aua tou te taumafai e fa’apogisa mai le atunu’u ma le Fono i mea nei, e iloa e a’u o lo o fai galuega i tua e ese mai i galuega a le malo, fa’apea ai ma galuega ia e talosaga atu ai matou, pule oe pe e te alu e ta’u i le Kovana ma le faigamalo la’u tala lea, ae ou te le toe alu atu e fai atu se talosaga, ua ou le fiafia lava, ou te le toe fia fa’alogo atu fo’i i sau tala e fai mai, I’m done”.

 

O ni isi ia o vaega o le saunoaga a Gafatasi na tu’uina atu i le tama’ita’i Faatonusili ia Faleosina, ina ua tu’u atu le avanoa ia te ia mo se saunoaga e fa’ai’u ai le iloiloga sa faia.

 

O le iloiloga sa ta’ita’ia e le afioga i le Ta’ita’i o le Komiti o Galuega Lautele a le maota o sui ia Vui Florence Saulo, mo le fesiligiaina lea o le tulaga ua oo i ai le galuega mo le fa’aleleia o le vai o lo o to’a i le auala i Ottoville, atoa ai ma isi lava mataupu tau i galuega tetele o loo fiamalamalama i ai afioga i Faipule.

 

Na atagia i saunoaga a afioga i Faipule le tele o tausaga o latou talosagaina pea galuega o auala, taligalu fa’apea ai ma faleaoga i totonu o latou itumalo, ae foliga mai lava e le o i ai se tulaga o tino mai, peita’i na fa’amanino e Faleosina i lana saunoaga e fa’apea, o ni isi o galuega o lo o aofia i polokalame fa’ataoto a le malo mo le isi 5 tausaga, ae o loo fa’alagolago le fa’ataunu’uina i le taimi e maua mai ai se alagatupe e fausia ai.

 

Mo le galuega o le auala i Ottoville e pei ona fesiligia e Vui, na taua ai e Faleosina le mae’a ona tu’uina atu o le galuega i le Konekarate ua manumalo, mo le fausiaina lea o tane sima e fa’aalu i ai le vai, ma o lo o i ai le fa’amoemoe o totonu o le 240 aso ua fa’atulaga e mae’a ai le galuega lea, amata mai i le masina o Me o le tausaga lenei e oo atu i le masina o Ianuari 2018.

 

I galuega mo faleaoga e pei ona fesiligia e le afioga i le Faipule ia Veevalu M. Mageo ma Vailoata E. Amituana’i, o lo o fa’agasolo pea tulaga o galuega e moomia e pei o pemita ma le fa’atanaga e mafai ai ona fa’atinoina e le Ofisa o Galuega a le malo ia galuega.

 

Na talosagaina e le afioga i le ali’i faipule ia Fagaoatua D. Salave’a, se galuega e fa’aleleia ai fa’aletonu i le vai o lo o to’a i le vaega e paka ai ta’avale i totonu o le aoga maualuga a Leone, ae o le afioga i le ali’i faipule ia Timusa T. Lam Yuen na ia talosagaina le fa’aauauina pea lea o galuega mo le fa’aleleia o auala i totonu o lona itumalo.

 

I tulaga o galuega o auala, na taua ai e le afioga ia Vui le tatau lea ona silasila toto’a le matagaluega, i le sailia lea o ni auala tumau e foia ai fa’afitauli o loo a’afia ai auala i le atunu’u aemaise lava i totonu o lona itumalo o Tualauta, nai lo le tanu i uta mo se taimi le tumau, ma ma’imau ai le tele o tupe ae uma ane lava ua toe leaga.

 

Na taua e le afioga a Vailoata le tatau lea ona silasila toto’a le Ofisa o Galuega aemaise ai le Komiti o lo o pasia pemita mo fale, i nofoaga talafeagai e fausia ai maota ma laoa o aiga, ina ia taofia ai le tula’i soo mai o le fa’afitauli o le poloka ai o vaega o lo o tafe ai le suavai.

 

Na talosagaina fo’i e le sui fofoga fetalai ia Fetui Fetu Jr le fa’aleleia o le auala o lo o i tua o le falepuipui i Tafuna, ona e le mafai ona sopoia e le atunu’u pe a malosi le tafe o le vaitafe o lo o i ai.

 

I le fa’aiuga o le iloiloga, na fa’amalulu ai le tama’ita’i fa’atonu i le mamalu o le maota, e tusa ai o tulaga fa’aletonu e pei ona maitauina i le tautua a le matagaluega, peita’i i lona talitonuga, e mana’omia le galulue fa’atasi o le fono ma le matagaluega i auala e fa’aleleia ai la latou tautua i le lumana’i.