Ads by Google Ads by Google

Le fa’amaonia moliaga fasioti tagata pa’ivalea fa’asaga ia Leasiolagi

ausage@samoanews.com

E lei mafai e le malo ona latou tu’uina atu mau fa’amaonia e lagolago ai le moliaga mamafa o le fasioti tagata pa’ivalea sa latou tu’uaia ai le ali’i o Glen Leasiolagi, e mafua mai i le fa’alavelave lea na tula’i mai i le 2 tausaga talu ai i Fagatogo, lea na tu’uaia ai o ia i lona fa’ao’o o manu’a i le ali’i o Eteuati Fatu i le po, ma i’u ina maliu ai o ia i le taeao ana soso’o ai.

 

O le mae’a ai ona fa’afofoga o le fa’amasinoga i le molimau a se ali’i foma’i litaea mai le setete o Georgia sa tula’i mo le itu a Leasiolagi, na faia ai loa le fa’aiuga a ali’i fa’amasino e fa’aleaoga ai tu’uaiga sa faia fa’asaga ia Leasiolagi.

 

O moliaga e 3 na tu’uaia ai e le malo ia Leasiolagi e aofia ai moliaga mamafa e lua o le fasioti tagata pa’ivalea ma le fa’atamala fa’aletulafono ua mafua ai ona oo le maliu i se isi tagata, atoa ai ma le moliaga mama o le fa’atupu vevesi i nofoaga faitele.

 

O ali’i fa’amasino sa iloiloina le fa’amasinoga autu a Leasiolagi (bench trial) e aofia ai le afioga ia Elvis P. Patea, Tunupopo Faleafaga ma Satele Lili’o. O le ali’i loia ia Bob Pickett na tula’i mo le itu a le malo ae o le ali’i loia ia Michael White na tula’i mo le itu a le malo.

 

E pei ona taua i le ulua’i folasaga a le malo e uiga i lenei mataupu e fa’apea, o le po o le aso 14 Mati 2014 i Fagatogo na tula’i mai ai le fa’alavelave e pei ona tu’uaia ai le ua molia, ina ua ia fa’ao’olima i le ali’i na a’afia i se inugapia sa faia ma i’u ina a’afia ai lona ulu i se manu’a tuga, ma o le manu’a lava lea na finau le malo sa i’u ina maliu ai le na a’afia.

 

Na taua e le malo i se vaega o le latou tagi e fa’apea, sa i ai le taimi na tula’i mai ai se fusuaga i le va o le ali’i ua maliu ma le ua molia, ina ua leotetele le inugapia a le na a’afia ma se tasi o ana uo, ma mafua ai loa ona tula’i mai le vevesi i le va o ia ma le ali’i ua molia.

 

Na taua atili e le itu a le malo i le latou tagi e fa’apea, o le mae’a ai o le inugapia ma le fa’alavelave na manu’a ai le ua maliu pe tusa o le itula e 12:00 i le vaveao, na fo’i ai o ia i lona fale ma taoto ai, ae o se taimi o le taeao o le aso na sosoo ai naua atu ai e lona uncle o ia i le vaega sa taoto ai ua maliu o ia.

 

O ni isi o molimau sa valaauina e le malo e aofia ai Leoleo sa gafa ma le su’esu’eina o lenei mataupu, fa’apea ai ma le ali’i foma’i ia Dr. Armour Gonzales (Pathologist) sa faia le taotoga e saili ai le mafu’aaga o le maliu o le na a’afia.

 

Na taua e Dr. Gonzales i se vaega o lana molimau e fa’apea, o le manu’a tuga lea na a’afia ai le itu taumatau o le ulu o le ali’i na a’afia, o le manu’a lea na mafua ai ona maliu o ia, ina ua a’afia ai lona fai’ai ma mafua ai loa ona piliki le toto i totonu o lona ulu ma i’u ina maliu ai. Sa ia taua atili fo’i e fa’apea, o le manu’a na a’afia ai le ulu o le ali’i ua maliu, na mafua mai ina i se manu’a sa a’afia ai o ia i le taimi ae lei maliu.

 

E ui ua lata i le 200 taotoga e saili ai le mafu’aaga o le maliu o se tasi na taua e Dr. Gonzales i lana molimau sa ia faia, talu mai tausaga sa saili ai lona fa’ailoga fa’afoma’i e aofia ai ma tagata sa ia galue ai fa’afoma’i, peita’i sa ia taua e fa’apea, o se taimi muamua lea ua ia molimauina ai se ituaiga manu’a uiga ese fa’apea ua mafua ai ona oo le maliu i se tagata.

 

Ina ua fesiligia e le loia a Leasiolagi ia Dr. Gonzales poo ia o se foma’i e i ai agava’a fa’apitoa i le su’esu’eina o fa’alavelave e aofia ai le maliliu o tagata (forensic pathologist), na taua ai e Dr. Gonzales e fa’apea, e le o ia o se foma’i fa’apitoa e pei ona fesiligia, ae o ia o se foma’i e i ai le tomai lautele (general pathologist).

 

O se tasi o molimau na valaau e le itu tete’e, o se ali’i foma’i litaea mai le aai o Georgia susuga Kris Sperry, MD, ua tele tausaga o lona tomai i le faia o suesuega i tagata maliliu i fa’alavelave eseese (forensic pathologist).

 

I lana molimau i luma o le fa’amasinoga, sa ia fa’ailoa ai e fa’apea, o le manu’a lea na mafua ai ona maliu Fatu, e lei mafua mai i se tu’i o se lima, ae na mafua mai ina ua tau lona ulu i se mea faitino malo e aofia ai se tulimanu o se nofoa poo se laulau.

 

Na taua atili e Sperry i lana molimau e fa’apea, e le mafai e le malosi o se tu’i mai se lima o tagata soifua ona fa’atupu le ituaiga manu’a lea na mafua ai ona maliu Fatu.

 

Na fa’afetaia e White le fesoasoani a Sperry i le sailiina o le mea amiotonu i le mataupu e pei ona tu’uaia ai e le malo ia Leasiloagi, lea ua mafua ai ona tu’uina mai le fa’aiuga a le fa’amasinoga e le fa’amaonia ai tu’uaiga sa faia fa’asaga ia te ia.