Ads by Google Ads by Google

Lapataia Faipisinisi o le solitulafono le si’i fa’afuase’i o le tau o oloa


[ata: SN]
ausage@samoanews.com

Ua fautuaina e le malo le mamalu o le Aufai Pisinisi uma i le atunu’u, o le solitulafono le faia fa’afuase’i o ni si’itaga i le tau o ni isi o a latou oloa, aemaise lava oloa o lo o sili ona mana’omia i le taimi o lo o fetaia’i ai le atunu’u ma tulaga pagatia ona o a’afiaga o le ‘afa o Gita na a’afia ai le atu Samoa i le vaiaso na te’a nei.

 

A o fa’agasolo mai lapataiga i le atunu’u ina ia fa’ailoa meatotino sa fa’aleagaina i le ‘afa o Gita, na tu’uina fa’atasi mai ai e le malo ma le fautuaga i tagatanu’u uma, ina ia silasila toto’a ma fa’ailoa atu ni pisinisi latou te maitauina le fa’afuase’i ona i ai o ni si’itaga i le tau o a latou oloa.

 

O le ali’i loia sili lagolago ia Jedidiah Bigelow o lo o gafa ma le taulimaina o mataupu savili i le Ofisa o le Loia Sili, lea e aofia ai mataupu tau i le tau o oloa, sa ia fa’amaonia mai le vaega o le tulafono e fa’asa ai pisinisi ona si’i i le 10% le tau o a latou oloa, i le taimi e mae’a ai ona fa’alauiloa e le Kovana le i ai o le atunu’u i tulaga pagatia o a’afiaga o matagi ma ‘afa malolosi.

 

O le aso 9 Fepuari na fa’alauiloa aloaia ai e Kovana Lolo Matalasi Moliga le i ai lea o Amerika Samoa i tulaga pagatia ona o aafiaga i matagi ma lologa, ma ua aloaia ai loa le faamalosia o tulafono e mafai ai ona puipuia pisinisi mai le soli o le tulafono.

 

O oloa e pei ona mata’ituina le le tatau lea ona vave faia i ai ni suiga i o latou tau e aofia ai vai, oloa fau fale, ma isi lava ituaiga oloa o loo matua moomia e le atunu’u i le taimi pagatia lenei.

 

Ua fautuaina malosi le atunu’u fa’atau ina ia vave fa’afesootai le Ofisa o le Loia Sili i le telefoni 633-4163 mo le faailoaina o ni pisinisi ua masalomia lo latou soli o le tulafono. E matua taua tele fo’i le tatau lea ona i ai ni faamaoniga e pei o lisiti o lo o tusia ai le igoa o le faleoloa, atoa ai ma isi lava faamaumauga ina ia fesoasoani i le malo i le faamalosia o le tulafono.

 

Na maitauina e le Samoa News i ni isi o vaega o le atunu’u na matua aafia le uumi o laina o tagata fa’atau i fafo o faleoloa, mo le faia o fa’atauga i oloa e manaomia e le aiga. Na taua e se tasi o tagata fa’atau i le Samoa News e fa’apea, talu ai le motusia o le eletise, na le mafai ai ona soona o to’atele tagata fa’atau i totonu, ae auaua’i ta’ito’atasi ina ia mafai ai e le le faipisinisi Asia e ana le faleoloa ona vaavaai gaioiga uma a le tagata fa’atau e faia.

 

O ni isi o taumafa ua molimauina le to’atele o tagata ua latou fa’atauina e aofia ai taumafa tupu apa faapea ai ma taga alaisa mo le fofoga taumafa o aiga.