Ads by Google Ads by Google

Laisene Ursula Te'o Martin

O se va'aiga lea i le papatua o le tama'ita'i o Ursula i le taimi na fa'aalia ai lona tino i le aofai na potopoto i le nofoaga sa faia ai le sailiga siamupini o le Teuteu Tino a le Pasefilka i saute i Honiara i Solomona. O le fa'aaliga a le tama'ita'i Samoa na malaga e fa'amasino le Sailiga Siamupini o le Teuteu Tino i le Pasefika i Solomona ia Oketopa 26-29, 2017 ma sa vala'aulia ai e fa'aalia lona tino lalelei i lea tauaofiaga.  [ata: foa'i]
Avea ma fa'amasino Tauvaga Teuteu Tino SPBF
tusia Leua Aiono Frost

Ina ua tu'ua e Ursula Filimaleafa Te'o Martin lana galuega sa tautua ai i le Wellness Center i le Land Grant a le ASCC, sa ia manatu ina ia taumafai atili e fa'aleleia le Asosi Teuteu Tino ua avea ai o ia ma ta'ita'i, le American Samoa Body Building Association.

Manatua o lenei le vaega o a'u ta'a'alo sa auina atu i Papua Niu Kini i Ta'aloga o le Pasefika, ma sa taliu mai Te’o Martin ma Pine Auro mo Amerika Samoa i le vaega a le 55kg le mamafa. O ia fo'i o se ulua'i tama'ita'i lea ua tauva i lea fa'agatama, ae ua fa'aeaina lona atunu'u i, ae o lo'o fou fo'i ia i tatou iinei ona tauva ai tama'ita'i i le Teuteu Tino.

Ua taliu mai nei o ia, sa taumafai ina ia maua lona Laisene e Fa'amasino ai tauvaga Teuteu Tino i le vasega o ali'i ma tama'ita'i. I lana taumafaiga na ia fa'aofi ai le Asosi Teuteuino a Amerika Samoa i le South Pacific Bodybuilding Federation (SPBF) - lea ua avea fo'i ma totino o le Olympic Sports Federation of Oceania [OSFO], Pacific Games Council [PGC], Oceania National Olympic Committee [ONOC] ma le World Bodybuilding & Physique Sports Federation [WBPF].

Ona o le naunau ina ia maua se avanoa e fa'aulu ai alo o le atunu'u o le a tauva i lenei fa'agatama ma lauiloa ai le igoa pele o Amerika Samoa, o lea ua taumafai ai o ia e feso'ota'i lelei le ASBBA, ma ia maua avanoa lelei e ulufale ai nisi e lautogia i tauvaga a le Olimipeka.

Ua le sopoloa le la'asaga a le Pasefik i Saute, ua ia feso'ota'i ma ua tatau fo'i ona lautogia se tasi e avea ma Fa'amasino. O lana taumafaiga muamua o se fa'amasino, ua vala'aulia ai e auai i le 23rd South Pacific Bodybuilding Championships sa fa'atautaia i Honiara, Atu Solomona ia Oketopa 26 - 29, 2017.

O sana saunoaga e tusa ma ana taumafaiga ina ia si'itia le tulaga o lea fa'agatama i le atunu'u, sa ia fa'apea ai, "Ou te fiafia tele aua ua iloga mai, e matua agava'a tino o tama ma teine Samoa i lenei fa'agatama. Ia teuteu lelei fo'i tino ma fa'atauva ai ma isi talavou mai tatou atumotu tuaoi, ma aga'i atu ai taumafaiga i atunu'u tetele lea e matua to'atele fo'i i latou ua auai i lea fa'agatama."

O sana tala e tusa o le fa'ato'a auai o tama'ita'i o le vasa pasefika i le Teuteu Tino, "Ou te iloa o a'u lea ua la'asia lea la'asaga fou. Ou te iloa fo'i o le tulaga o la'ei e ofu e alo tama'ita'i ina ia tauva ai, o lo'o avea ma fili i alo tama'ita'i o loo fia tauva i lea fa'agatama. O lea la ua mae'a ona fa'aulu fo'i sau talosaga, ina ia suia le la'ei e tauva ai tama'ita'i o atumotu, fa'atasi ai ma nisi tama'ita'i e le o fia ofuina nai ofu laiti nei mo le tauvaga."

Ua ofi atu nei le ASBBF i le asosi lea i le Pasefika i Saute, ae maise fo'i ua ofi fo'i i le Pacific Games lea sa malaga atu ai tauva mo le ulua'i taimi i Papua Niu Kini. Peita'i, o ta'aloga a le Pasefika lea e faia i Samoa i le tausaga fou, ua le aofia ai ma le Teuteu Tino i ta'aloga e tauva ai atumotu o le Pasefika o le a auai.

Mai lona tiute sa fa'atino i Solomona ua taua'ao aloaia ai nei ma lona Laisene Fa'amasino i le mae'a ai o le tauvaga. Ae na tula'i fo'i o ia e fa'aalia lona tino matagofie, o se fa'aaloalo i lona vala'aulia fa'atasi ai ma lona fiafia i le fa'agatama Teuteu Tino ua mautu ai sana pine auro mo lona malo pele o Amerika Samoa.

Na patiapatia lona lea avanoa ma ia fa'ailoa atu, "E taua le galulue fa'atasi o atumotu o le Pasefika ina ia fa'aleleia atili tino o latou tama'ita'i. Fa'afetai i le South Pacific Bodybuilding Federation ua fa'aofi fa'atasi Malo fa'a-atumotu e avea ma totino, ina ia atili ai ona malosi le taumafaiga e fa'aa'e tatou talavou tama ma teine i lea fa'agatama e fa'atauva ai ma atunu'u tetele o le lalolagi."

Ua ia fa'ailoa mai fo'i nisi o mea e ao ina mautinoa e fanau talavou o le atunu'u. "Afai o oe lea e 200+ ou pauna, fai lava si mamafa tele o lou tino ae ua e fia pa'e'e ma matagofie lou tino, o le fa'agatama tonu lava lea e te asiasi mai i ai ma e fa'amasani i ana koleni fa'apitoa ina ia fa'aoso ai maso ma fa'apa'e'e lelei ai lou manava ae maise o le fefete sa'o ai o lou fatafata."

Ua mafai ona maua Ursula Martin Teo i le itula e 12:00 i aoauli ta'itasi i le TJ's Gymnasium ina ia fetufa'i ma ia ma fa'atonutonu ai le faiga o lau fa'amalositino e teuteu ai lou tino ia sa'o lelei, ae maise fo'i o lau mea'ai e ao ina fa'atele ma le ituaiga e fa'aitiitia.