Ads by Google Ads by Google

Lagolago Senatoa uma le toe filifilia Gaoteote avea ma Peresetene

ausage@samoanews.com

Na lagolagoina e afioga i Senatoa filifilia mai itumalo eseese le toe tofia o le afioga i le Tama’ita’i o le Ao ia Gaoteote Palaie Tofau, e avea ma Peresetene o le Senate mo le isi 4 tasuaga o loo lumana’i nei.

 

O le mae’a ai ona fa’aalia e le maota maualuga o le tofa fa’atamali’i e ala i le leai o se isi na fia tauva mo le nofoa, ae ave uma la latou fa’atuatuaga ia Gaoteote mo le ta’ita’ia o le maota, na saunoa ai loa le afioga i le Peresetene toe filifilia ma ia fa’aigoa le fa’aiuga a afioga i Senatoa o le tofa fa’atamali’i ua matua e tua i ai le atunu’u.

 

O le afioga ia Gaoteote na ta’ita’ia le sauniga o le fa’atautoina o afioga i Senatoa e to’a 18, ua filifilia e o latou itumalo e fai ma o latou sui i totonu o le maota maualuga.

 

O le afioga i le Fa’amasino Sili ai Michael Kruse na fa’ataunu’uina le fa’atautoina o afioga i Senatoa, ina ua mae’a ona faitau se tusi fa’amaonia mai le Ofisa o Mataupu Tau Samoa, e aloaia ai le filifilia atoa ai ma le fa’amaonia o senatoa uma e to’a 18 na fa’atauto e avea ma sui o latou itumalo i totonu o le Senate.

 

Ina ua oo i le taimi e sailia ai tofi a le maota, na fa’atula’i ai e le afioga i le ali’i Senatoa matua ia Galea’i M. Tu’ufuli le suafa o Gaoteote e toe avea ma peresetene o le maota, lea fo’i na lagolagoina e le maota atoa e aunoa ma se tasi na manatu e fa’atula’i se isi sui, ma fa’ailoa ai loa e afioga i Senatoa lo latou lagolagoina o lea fa’aiuga e ala i le palota si’ilima.

 

O le Failautusi o le maota ua toe filifilia i ai le tofa Leo’o Va’a Ma’o, ae o le Satini ua toe filifilia i ai le tofa Vaifale Akeli Alosia.

 

I le mae’a ai o le sauniga o le fa’atautoina o afioga i Senatoa, na fa’afetaia ai loa e le afioga Gaoteote le tofa fa’aalia a le maota, e ala i lo latou toe lagolagoina o ia e avea ma ta’ita’i mo le isi 4 tausaga.

 

E le gata na momoli lana fa’amanuiaga i afioga i senatoa uma ua filifilia e o latou itumalo, ae sa ia fa’aalia fo’i le mana’omia o le galulue fa’atasi mo se manuia o le atunu’u i le lumana’i.

 

Mai senatoa e to’a 18 ua mae’a ona fa’atautoina, o le to’a 4 o i latou sa avea ma sui o latou itumalo i le nofoaiga lona 34 ua mae’a atu, ao lea ua toe filifilia e fa’aauau la latou tautua i le nofoaiga fou lenei.

 

O sui tuai e to’afa e aofia ai le afioga a Galea’i M. Tu’ufuli, Tuaolo M. Fruean, Alo Fa’auuga ma Magalei Logovi’i, ae pei ona silafia, o le tofa Tuaolo lea ua filiflia e le kovana ia Lolo Matalasi Moliga e avea ma Komesina o Leoleo mo le isi 4 tausaga.

 

O senatoa fou e to’a 14 o loo aofia ai ni isi o sui sa avea muamua fo’i ma sui o latou itumalo i nofoaiga ua mavae, e pei o le afioga a Fa’amausili Mau Jr, Levu Solaita, ma le afioga i le Tama’ita’i Senatoa e to’atasi mo le nofoaiga lenei a le maotamaualuga ia Fonoti T. Aufata.

 

E ui o lo o i ai pea se tulaga fesiligia o le isi nofoa mo le itumalo o Manu’a #1, le nofoa lea o loo nofoia e le afioga a Nuanuaolefeagaiga S. Nua, ae sa aloaia lava le fa’atautoina o ia i le aso ananafi e avea ma le isi sui filifilia o le itumalo.

 

O le aso Gafua o le vaiaso fou i le itula e 10:00 lea ua fa’amoemoe e tatala aloaia ai galuega a le Fono Faitulafono mo lana nofoaiga lona 35.