Ads by Google Ads by Google

Lagolago Faipule le toe filifilia Savali avea ma Fofoga Fetalai


Le afioga i le Fofoga Fetalai o le maota o sui ia Savali Talavou Ale, lea fo’i ua lagolagoina e faipule uma o le maota o sui le toe filifilia o ia e avea ma ta’ita’i o le maota mo le isi nofoaiga o le a sosoo nei. [ata AF]

Se vaaiga i lau fofoga fiafia o sui o le Nofoaiga lona 34 a le maota o sui i le aso mulimuli na tapunia ai galuega a le Fono mo lenei tausaga 2016. [ata AF]
ausage@samoanews.com

O se fonotaga fa’apitoa sa faia a afioga i Faipule ua filifilia e fai ma sui o latou itumalo i le nofoaiga lona 35 a le Fono Faitulafono o le a sosoo nei, lea sa usuia i le maota o le tofa Savali Talavou Ale i le lua vaiaso talu ai, na fa’aalia ai le lagolagoina uma e Faipule sa auai le toe filifilia o le tofa i le Tautootoo na te toe tauaveina le tofiga o le Fofoga Fetalai o le Maota o Sui.

 

O lea mataupu sa mafai ona fa’amaonia mai e le to’atele o afioga i Faipule sa mafai ona auai i lenei fonotaga i le Samoa News i le vaiaso nei.

 

E pei ona manino i le Fa’avae Toe Teuteu a Amerika Samoa, o le itula e 12:00 i le aoauli o le aso 3 Ianuari 2017, o le taimi lea ua atofaina e fa’atauto ai Faipule ma Senatoa mo le isi nofoaiga fou, atoa ai ma le fa’atautoina o le Kovana ma le Lutena Kovana o le faigamalo ua filifilia e ta’ita’ia le atunu’u mo le isi 4 tausaga.

 

A o lumana’i ai le fa’atautoina o Faipule ma Senatoa, e muamua saili e maota ta’itasi se tasi e avea ma o latou ta’ita’i, sosoo ai loa ma le palotaina o se Failautusi ma le Satini na te fa’amamaluina galuega a maota ta’itasi.

 

Na taua e ni isi o Faipule sa auai i le fonotaga sa faia i le 2 vaiaso talu ai e fa’apea, o le a faigofie galuega a le maota o sui i le aso e fa’atauto uma ai Faipule, aua o lea ua tasi le fa’aiuga e toe filifilia ai le tofa Savali e avea ma Ta’ita’i, pau le vaega e fa’atinoina i le aso o le Fa’atoina o Faipule, o le fa’atu lea e se sui o le maota o le suafa o Savali ma fa’aluaina uma loa e le maota.

 

I le fa’aigoaina ai e se tasi o afioga i ali’i faipule o lea fonotaga, “o se fonotaga to’afilemu ma le loto gatasi” uma o Faipule sa auai, sa ia taua ai le taua tele o le fa’aiuga ua mafai ona autasi i ai afioga i Faipule ua filifilia mo le isi nofoaiga o le a sosoo nei, ina ia le toe faia ni sailiga tofi i totonu o le maota e pei ona masani ai, ae o le a tu’u tasi le galuega i se tasi ua filifilia e fai ma ta’ita’i.

 

“E le faigofie le faaiuga ua faia e sui filifilia o itumalo ta’itasi, o le autasi lea o le tofa ma le fa’autaga i le tofa i le Tautootoo ia Savali e fai ma ta’ita’i o le maota mo le isi nofoaiga o lo o sosoo nei, aua ou te iloa e i ai fo’i isi afioga i Faipule o lo o i ai le agava’a e avea ai ma Ta’ita’i o le maota fono a le atunu’u, peita’i ua mafua ona tasi lenei fa’aiuga ina ua tasi lo latou talitonuga atoatoa i le tofa Savali, o ia lava e tatau ona fai ma ta’ita’i”, o le saunoaga lea a se tasi o Faipule sa auai i le fonotaga e le i finagalo e fa’ailoa lona suafa.

 

Ae na taua e le afioga i le ali’i Faipule mai le Itumalo o Manu’a #2 ia Toeaina Faufano Autele, lea fo’i ua toe filifilia e fai ma sui o le Itumalo mo le isi 2 tausaga e fa’apea, o le taua o le fa’aiuga ua faia e le maota, ua atagia mai ai le le toe i ai o se va i le taimi e fa’atino ai galuega a Faipule i totonu o le maota.

 

“O le mea sa tupu i tausaga ua mavae pe a oo ina mae’a ona saili se Ta’ita’i o le maota, e toeititi lava mae’a tausaga e 2 o le nofoaiga e le o lelei le va o ni isi o Faipule ma le Ta’ita’i, e mafua mai i tulaga o sailiga tofi, ma o se tasi lea o itu e le lelei ai le auala lea o le fa’atutu o sui e to’alua e saili mai ai se Ta’ita’i, ona e foliga mai ai ua 2 itu o le maota fono a le atunu’u i le maota o sui, peita’i o le fa’aiuga lea ua faia nei, ua atagia mai ai, o le a le toe i ai ni va o Faipule ma le Ta’ita’i o le maota, ae o le a lelei mea uma ma fai fiafia galuega na mafua ai ona tofia i matou e fai ma sui o Itumalo ta’itasi”, o le saunoaga lea a Toeaina.

 

Na taua atili fo’i e le afioga a Toeaina le tatau lea ona silafia e le afioga i le Fofoga Fetalai le fa’aaloalo maualuga ua tu’uina atu e le maota, e ala i le lagolagoina o le toe filifilia o ia e avea ma ta’ita’i mo le isi 2 tausaga.

 

“I le avea ai o a’u o se tasi o Tama matua o le maota, ua lagona ai lava lo’u fiafia ina ua mafai ona tasi le loto o afioga i Faipule, e ala i lo latou lagolagoina o Savali e avea ma Ta’ita’i, o le a le toe vaaia fo’i la ni vevesi po o ni uiga le manuia i le va o Faipule, aua o lea ua tasi i matou uma i le fa’aiuga ua mae’a ona faia”, o le saunoaga lea a Toeaina.

 

E na o le afioga i le ali’i Faipule ia Faimealelei Anthony Fu’e Allen e le i auai i le ulua’i fonotaga na saili ai le tofa ma le fa’autaga loloto a le maota, ona sa malaga o ia i ni isi o fonotaga i atunu’u i fafo, peita’i ina ua toe taliu mai i fanua le faigamalaga a le afioga i le ali’i faipule i le vaiaso na te’a nei, na maua ai loa lona avanoa i le fonotaga lona lua sa toe valaauina, e momoli atu ai ana fa’amanuiaga i le afioga Savali e tusa ai o le toe filifilia o ia.

 

E le o se taimi muamua lenei ua tula’i mai ai le tulaga lea i le maota o sui, o le leai o se isi e tausinio ma le tofa Savali i le sailiina o se Ta’ita’i o le maota, ae sa tula’i mai fo’i i le nofoaiga lona 34 fa’atoa mae’e atu nei, ina ua malilie uma fo’i afioga i Faipule e filifilia Savali e avea ma Fofoga Fetalai, ma vaaia ai le tofu uma o afioga i Faipule ma tofiga o le Ta’ita’ifono i Komiti eseese a le maota, ae o tausaga uma e to’alua ai sui e saili mai ai le Fofoga Fetalai o le maota, e tofia ai e Savali na o afioga i Faipule sa lagolagoina o ia e avea ma Ta’ita’ifono o Komiti eseese a le maota.

 

O ni isi fo’i o nofoaiga e i ai afioga i Faipule e leai ma se Komiti e avea ai i latou ma totino, e mafua mai lava ona o le vaeluaina o le tofa ma le fa’autaga i le taimi e saili ai se tasi e avea ma ta’ita’i o le maota.