Ads by Google Ads by Google

KRUSE: O oe sui malo o Amerika Samoa i luma o le Fa’amasinoga


Le afioga i le Fa’amasino Sili ia Michael Kruse [ata AF]
ausage@samoanews.com

Na fa’amalamalama e le afioga i le ali’i fa’amasino sili ia Michael Kruse i le ali’i loia sili lagolago sa fai ma sui o le malo, i le taimi na valaauina ai le mataupu a le ali’i o Iose Liaina Jr i luma o le fa’amasinoga maualuga i le vaiaso na te’a nei, e le tatau ona ia tu’uina atu le tali “leai” i soo se taimi e fesiligia ai o ia e le fa’amasinoga, ona o ia o loo fai ma sui o le malo o Amerika Samoa i soo se taimi e faia ai iloiloga i luma o le fa’amasinoga.

 

Na fesili Kruse i le ali’i loia ia Gerald Murphy i lona fiamalamalama atili lea i le uiga o le molimau a le ali’i o Liaina e fa’apea, talu ai e le o lelei ona pepa e galue ai i le konekarate a lona uncle sa galue ai, o le mafua’aga lea e ala ai ona laititi lona totogi e maua i le vaiaso, na faigata ai loa ona totogi lana sala sa tu’uina atu e le fa’amasinoga, ona e alu lana siaki e tausi ai lona to’alua ma lana fanau e to’alua.

 

Na fesili Kruse ia Murphy pe fa’afefea ona galue Liaina ae le o lelei ona pepa, ae na tali le ali’i loia “ou te le iloa”.

 

“E fa’afefea ona e tali mai e te le iloa o oe lea e fai ma sui o le malo, o oe foi o le sui o le Ofisa o Femalagaaiga i luma o le fa’amasinoga, e tatau la ona e malamalama i tulaga ia”, o le saunoaga lea a Kruse sa tu’uina atu ia Murphy i le aso Faraile na te’a nei, ma foliga mai ai ua si’isi’i i luga lona si’ufofoga.

 

Ae na toe saunoa le susuga a Murphy e fa’apea, e le o se galuega lea a le malo e fai, o le fa’aleleia lea o pepa a le ua molia, aua e 3 vaiaso lea sa tu’u atu e le fa’amasinoga e fa’aleleia ai ana pepa faigaluega, ae foliga mai e leai ma se galuega sa faia i ai.

 

Na umi se taimi o nofo le afioga i le ali’i fa’amasino e aunoa ma sana saunoaga, mulimuli ane tu’uina atu lana poloaiga ia Murphy ma le loia a Liaina ia Michael White, ina ia la o e saili mai le tali o le fesili o loo atugalu i ai le fa’amasinoga, ona fa’atoa toe valaau ai lea o le mataupu a Liaina mo le tu’uina atu o se fa’asalaga a le fa’amasinoga.

 

O le aso Faraile na te’a nei na fa’atulaga e tu’uina atu ai se fa’aiuga a le fa’amasinoga maualuga fa’asaga ia Liaina, e mafua mai ina ua ia le usitaia se tasi o tuutuuga o lana nofovaavaaia sa tu’uina atu e le fa’amasinoga, o le totogiina lea o lana salatupe.

 

Ina ua fesiligia e Kruse le ali’i ua ta’usalaina nei i le mafua’aga ua le totogiina ai lana sala, ae na tali le ua molia e fa’apea, e moni lava sa i ai lana galuega na galue ai ma maua lona totogi, peita’i e le o se galuega mautu lana galuega sa i ai, e na o le $100 lona totogi e maua i le vaiaso, lea e alu uma i le tausiga o si ana fanau e to’alua ma lona aiga.

 

“Lau afioga, pe maua se isi avanoa ou te fo’i atu ai i tua e toe fa’alelei o’u pepa faigaluega, ina ia mautu ai sa’u galuega e maua ma lelei ai lo’u totogi e totogi ai la’u sala ma tausi ai lo’u aiga, ona e na o a’u lava o lo’u aiga e faigaluega”, o le fa’atoesega lea a le ua molia.

 

Na fa’ailoa atili e Kruse i ali’i loia e fa’apea, o le isi lea fa’afitauli o loo fetaia’i ma le fa’amasinoga i mataupu fa’apenei, o le faigata ona totogi e tagata o loo nofovaavaaia o a latou salatupe, ona avea ai lea ma auala e toe a’afia ai i latou i lalo o le tulafono.

 

Na finau le ali’i loia ia White i le fa’amasinoga ina ia talia le fautuaga a le Ofisa Fa’anofovaavaaia o loo taua i le latou ripoti, ina ia toe tatala le ua molia e alu e saili sana galuega tumau ma lelei ai sona totogi, e totogi ai lana salatupe ma tausi ai lona aiga.

 

Ua fautuaina fo’i le itu a le malo ina ia silasila toto’a i tulaga o fa’amaumauga a le Ofisa o Femalagaaiga, i tulaga o galuega o loo galulue ai i latou o loo fa’anofovaavaaia, ina ia mautinoa e le o tula’i mai ai se fa’aletonu.