Ads by Google Ads by Google

KRUSE: O le falepuipui lava iuga tagata tagofia fualaau fa’asaina


[ata: foa'i]
ausage@samoanews.com

A o feutana’i ai loia ma afioga i Fa’amasino i se fa’asalaga talafeagai mo le ali’i o Yuseff Carter, lea ua ta’usala i le mataupu na aumai fa’anana ai fualaau oona o le aisa mai le Falemeli i le aso 13 Oketopa 2016, na saunoa ai loa le afioga i le ali’i Fa’amasino Sili ia Michael Kruse e fa’apea, na pau le ituaiga fa’asalaga o lo o mafaufau le fa’amasinoga mo ituaiga tagata fa’apenei, o le ave i le falepuipui ina ia mafai ai ona aveese mai i latou mai le atunu’u lautele.

 

O le aso Faraile na te’a nei na fa’atulaga e lau ai le fa’asalaga a Carter, 44 tausaga le matua o lona soifua, ina ua mae’a ona ta’usala o ia i le moliaga mamafa o lona umia fa’asolitulafono o vaega o fualaau fa’asaina o le aisa, i lalo o se maliliega sa latou sainia ma le malo.

 

Ae talu ai le finau o loia ina ia fa’ataga Carter ona auai i aoaoga fa’a faufautua e fesoasoani ai i le fa’afitauli o le tagofia atoa ai ma lona fa’aaogaina o le pauta oona o le aisa, na finagalo ai loa le Fa’amasinoga e toe tolopo lana matuapu seia aulia le aso 4 Me, ina ia mafai ai e loia ona fa’amatala atili le ituaiga polokalame e mafai ona agava’a i ai Carter.

 

Na faatoese Carter i le fa’amasinoga e tusa ai o lana solitulafono sa faia, ma ia talosagiana ai se isi avanoa e fa’aauau ai pea ona galue e tausi lona aiga aemaise ai lona Tama ua matua.

 

E to’alua molimau na valaau e le loia a Carter, o lona Tama atoa ai ma lona uncle. Na taua e i laua i la molimau suiga ua vaaia ia Carter talu ona mae’a le fa’alavelave e pei ona ta’usala ai o ia.

 

Na taua e le Tama a Carter i le fa’amasinoga lona fautua malosi pea i lona atali’i ina ia fai se suiga i lona olaga ina ia mafai ai ona umi taimi latou te mafuta fa’atasi ai.

 

Na taua e le loia a Carter ia Michael White i le fa’aasinoga e fa’apea, o le ua molia e a’afia o ia i le fa’afitauli o le tagofia o fualaau fa’asaina. O se fa’afitauli e mana’omia se auala e togafiti ai ina ia mautinoa e le toe tula’i mai i lona olaga.

 

Na talosaga White i le fa’amasinoga ina ia fa’asala Carter i se fa’asalaga fa’anofovaavaaia, e aunoa ma le toe tuuina atu o se taimi na te tuliina i le falepuipui. Sa ia talosaga fo’i ina ia fa’ataga o ia ona auai i ni aoaoga fa’a faufautua e fesoasoani ai i le fa’afitauli o le tagofia o fualaau fa’asaina o lo o a’afia ai o ia.

 

Na faailoa atili e White i le fa’amasinoga e fa’apea, e ui e le o i ai ni polokalame fa’apea i le atunu’u, ae o lo o i ai polokalame o lo o avanoa i setete o Amerika e aofia ai Hawaii ma Kalefonia, e ono mafai ona fesoasoani ia Cater.

 

Sa ia faailoa foi i le fa’amasinoga e fa’apea, ua sauni le aiga o Carter e fesoasoani i auala uma e mafai ona latou faia ina ia mafai ai ona auina atu le ua molia e auai i polokalame nei i fafo ina ia fesoasoani ai i le fa’afitauli o loo a’afia ai o ia.

 

Saunoa Kruse e fa’apea, “O le fa’afitauli i tagata e a’afia i fualaau fa’asaina ua fa’atupulaia i Amerika Samoa i le taimi nei, ae laiti lava polokalame o lo o maua i totonu o le atunu’u e mafai ona fesoasoani ai ia tei latou. Pau le auala e mafai e le fa’amasinoga ona faia i ituaiga tagata faapenei, o le taofia lea i le Falepuipui ina ia aveese mai ai i latou mai le autnu’u lautele”.

 

“O a ituaiga polokalame o lo o maua i le atunu’u e mafai ona fesoasoani ia Carter”, o le fesili lea a Kruse ia White.

 

Na tali White, e leai ni polokalame e maua i le atunu’u e fesoasoani ai mo Carter, sei vagana ai polokalame o lo o maua i setete i fafo e agava’a ai o ia, ma ua fesoasoani fo’i lona aiga e lagolago ma fa’atupe tulaga uma mo ia.

 

Na lagolagoina e le loia a le malo ia Woodrow Pengelly le talosaga a White ina ia fa’asala Carter i se fa’asalaga nofovaavaaia, e aofia ai ma le fa’ataga lea o ia e auai i polokalame e fesoasoani ai i le fa’afitauli o le tagofia o fualaau fa’asaina o lo o a’afia ai o ia.

 

O Carter na taofia e Leoleo i le masina o Oketopa 2016 ina ua alu atu e piki mai lana afifi na aumai i le meli ae maua ai fualaau fa’asaina i totonu. Na fa’ailoa e le ua molia i Leoleo e fa’apea, na alu atu e piki mai lana afifi na auami i lona Tama.

 

Sa ia faailoa atili fo’i i Leoleo e fa’apea, o lana afifi na auala mai i le kamupani a le Amazon.com.

 

Ae ina ua faailoa atu i ai o le afifi o lo o fa’atuatusi mai i lona igoa o lo o i ai vaega o fualaau fa’asaina i totonu, na toe fa’ailoa ai loa e Carter i Leoleo e fa’apea, e le o le ituaiga afifi lea na alu atu e piki mai.

 

“Na ou sau e piki atu le afifi o lo o i ai se meaalofa mai lo’u Tama, ae le o fualaau fa’asaina e pei ona taua”, o le tala lea a Carter i Leoleo.

 

O lo o tumau pea tuutuuga o lo o tatala ai Carter i tua e fa’atali ai le aso 4 Me o le vaiaso fou lea ua fa’atulaga e toe tula’i ai mo le lauina o lana fa’asalaga.