Ads by Google Ads by Google

KRUSE: E tutusa uma pagota i le silasila a le fa’amasinoga


Le afioga i le Fa’amasino Sili, Lealaialoa Michael Kruse. [ata AF]
ausage@samoanews.com

Na fa’amanino e le afioga i le Fa’amasino Sili ia Lealaialoa Michael Kruse i le taimi o le iloiloga a Jennifer Tofaeono i le amataga o le vaiaso nei e fa’apea, e tutusa uma lava pagota o loo taofia i le toese mo le tuliina o a latou fa’asalaga, ma i latou ua magalo i tua ae o loo fa’anofovaavaaia i latou i le silasila a le fa’amasinoga.

 

O se vaega lea o le ulua’i saunoaga a le ali’i fa’amasino sili, i le taimi na amata folasia ai e le ali’i loia ia Marcellus Tala Uiagalelei itu e lagolagoina ai le talosaga lea ua i luma o le fa’amasinoga, mo se poloaiga e fa’ataga ai Tofaeono ona ia tuua le atunu’u ae malaga atu e auai i ni fonotaga mo mataupu e fa’atatau i lana galuega o loo galue ai i le taimi nei, lea o le faia i Amerika i le ogatotonu o le masina lenei o Mati, ma fa’asolo atu ai ia Aperila ma Me o le tausaga nei lava.

 

Na taua e Uiagalelei i lana folasaga e fa’apea, o Tofaeono e galue i se tasi o Fa’alapotopotoga i le atunu’u e le galulue mo ni tupe faasili (Non Profit Organisation), o ia o se tasi o loo fesoasoani i le tusiaina lea o talosaga mo tupe fesoasoani mai le feterale e fa’atupe ai ni isi o auaunaga a le Fa’alapotopotoga, ae mana’omia tele lona auai i fonotaga ia ua fuafua e faia i Amerika.

 

O le fonotaga muamua e faia lea i le aso 3 o Mati e o atu i le aso 17 i le aai o Detroit i Michigan ma Hawaii, ae o le fonotaga lona lua e faia lea i le aso 7 Aperila e oo atu i le aso 1 Me i Hawaii, Virginia ma Nevada.

 

Na fa’amanino atili e Uiagalelei i lana folasaga e fa’apea, o fonotaga e pei ona fuafuaina e fesoota’i uma lava ma le galuega o loo galue ai Tofaeono, ma, talu fo’i ona tatala mai o ia i tua, na te lei soliina lava se tuutuuga o lana nofovaavaaia, ae o loo tausisi pea lava o ia i tuutuuga sa tu’uina atu e le fa’amasinoga, e aofia ai le fa’aauau pea lea o le totogiina o le tupe ua poloaina o ia e toe totogi.

 

Na fesili Kruse ia Uiagalelei i le taua o fonotaga ua fuafua e auai atu i ai Tofaeono, atoa ai ma le mana’omia tele o ia e auai i nei fonotaga, ae na tali le ali’i loia e fa’apea, o se tasi o fonotaga, o le a maua ai le avanoa na te fa’alauiloa ai ni isi o ta’iala o loo fa’atinoina ai galuega i Amerika Samoa, atoa ai ma le fa’aaogaina o tupe fesoasoani mai le feterale.

 

“E le fesiligia le toe fo’i mai o Tofaeono i le atunu’u, ae o le itu o loo atugalu i ai le silasila a le fa’amasinoga, e le o se tulaga e talafeagai mo isi fo’i pagota o loo taofia i le toese i Tafuna le fa’ataga o ia lea e malaga ese atu, ae o loo fa’anofovaavaaia o ia, e tutusa uma lava fo’i ma i latou o loo laei mai i ova lola lanu moli na e i ou tua”, o le saunoaga lea a Kruse ma fa’asino lona aao i pagota o loo nonofo i le nofoa pito lava i luma o le potu fa’amasino, lea o lo o i tua mai o le nofoa o loo alala ai le ali’i loia ia Uiagalelei ma Tofaeono. Saunoa atili Kruse e fa’apea, e tutusa uma lava pagota i le silasila a le fa’amasinoga.

 

Na umi se taimi o fa’amanino e Tofaeono i luga o le nofoa molimau ina ua mae’a ona fa’atauto o ia, le aano moni o malaga ia ua ia talosagaina ai se avanoa e malaga atu ai.

 

O le aano moni o fonotaga uma o loo fuafua e auai atu i ai, o le a talanoaina ai le lumana’i o vaega tupe fesoasoani o loo maua mai e fa’atino ai galuega a le Ofisa, e aofia ai le faia o puipuiga ma tete’e atu i le faia o sau’aga fa’asaga i Tina ma fanau, atoa ai ma le faia o sau’aga fa’asaga i tama’ita’i laiti.

 

Na fesili Kruse ia Tofaeono e fa’amanino le uiga o le Ofisa o le “Alliance” lea o lo o galue ai i Amerika Samoa, ae na tali le molimau e fa’apea, o le Ofisa lea o loo gafa ma le fa’atinoina o polokalame e fesoasoani ai i le fa’amalosia o aiga ua a’afia i sau’aga, lea na fa’avae mai i le tausaga e 2010 i lalo o le ta’ita’iga a le faletua ia Faalu Iuli.

 

O vaega tupe feterale o loo maua mai i le Ofisa o le “Criminal Justice and Planning Agency” (CJPA) fa’apea ai ma le Matagaluega o Tautua ma Auaunaga Lautele (DHSS), e pei ona taua e Tofaeono i lana molimau.

 

Ua taoto atu nei i se fa’aiuga a le fa’amasinoga le talosaga a Tofaeono, mo se poloaiga e fa’ataga ai o ia ona malaga ese atu ma le atunu’u.

 

E 20 masina na taofia ai Tofaeono i le toese i Tafuna, o se tasi lea o tuutuuga o lana nofovaavaaia e 5 tausaga na tu’u atu e le fa’amasinoga maualuga, ina ua ta’usala o ia i le moliaga mamafa o le fesoasoani lea e fa’atino le solitulafono o le gaoi, i se gaioiga na ia gaoia ai le silia i le $50,000 mai teugatupe a le falema’i o le LBJ i Faga’alu.

 

O ni isi o tuutuuga o le nofovaavaaia a Tofaeono e aofia ai lona toe totogiina lea o le tupe sa ia gaoia, ma ia aua fo’i ne’i ona toe solia se tulafono a le malo.