Ads by Google Ads by Google

KRUSE: 3 nofoaiga sosoo o tupu pea fa’aletonu Ofisa o Femalagaaiga

Moeiini fofoga o le Fa’amasino Sili ia Michael Kruse a o fa’afofoga ma le toto’a i le lauga a le ali’i kovana ia Lolo Matalasi Moliga, i le tatala aloaiaina o le Fono Faitulafono i lana tauaofiaga lona 3 i le masina o Iulai na te’a nei i le Fale Laumei.  [ata AF]
tusia Ausage Fausia

“ .. e le o se taimi muamua lenei ua maitauina ai e le Fa’amasinoga tulaga fa’aletonu i le Ofisa o Femalagaaiga, na tupu i le nofoaiga a Tauese, na tupu i le nofoaiga a Togiola, lea fo’i o lo o tupu i le nofoaiga a Lolo, pau le manatu lea ua oo mai ia te a’u, o le loka i le falepuipui o sui o le Ofisa o Femalagaaiga i le taimi latou te le aloaiaina ai poloaiga a le fa’amasinoga”, o le saunoaga lea a le afioga i le Fa’amasino Sili ia Michael Kruse ma lona si’ufofoga ua si’isi’i i luga, i le taimi na fa’afofoga ai le fa’amasinoga i le molimau a se sui sinia o le Ofisa o Femalagaaiga, e fa’atatau i le mafua’aga o le i ai pea lea i le atunu’u o se ali’i mai Samoa na malaga mai i se pemita e 30 aso i le tausaga e 2012.

O le ali’i o Joeita Fa’aaliga na ulufale mai i se pemita e 30 aso 29 Aokuso 2012, ma nofo faasolitulafono ai lava ina ua mae’a le aoga o le pemita na malaga mai ai, seia oo i le taimi na pu’e fa’apagota ai o ia e Leoleo ma molia i moliaga o le talepe fale ma le gaoi i le ogototonu o le tausaga na sosoo ai e 2013, ma fa’asala ai loa o ia e le fa’amasinoga maualuga ina ua ta’usala o ia i le moliaga o le talepe fale ma le gaoi i le tausaga lava lea e 2013.

O le fiamalamalama o le fa’amasinoga i le mafua’aga o le i ai pea o Fa’aaliga i le atunu’u e ui ua mae’a le pemita e 30 aso na malaga mai ai, na mafua ai loa ona faia le poloaiga a le fa’amasinoga e aami ai le Pule o le Ofisa o Femalagaaiga, mo le tu’uina atu o fa’amaumauga o lo o moomia e le fa’amasinoga, peita’i e le i mafai ona o o atu le Pule o le Ofisa o Femalagaaiga, se’i vagana ai le Ta’ita’i o le Vaega Suesue (Supervisor for the Investigating Division) ia Paelo Puni na oo atu e moliau.

O se tasi o itu na mafua ai ona le fiafia le afioga i le Fa’amasino Sili, o le le amanaia lea e le Ofisa o Femalagaaiga o le poloaiga a le fa’amasinoga e saili mai ai fa’amaumauga fa’asaga ia Fa’aaliga, ina ua taumafai le Ofisa Fa’anofovaavaaia e fa’afesoota’i le Ofisa o Femalagaaiga mo le tu’uina mai o fa’amatalaga uma e fa’atatau i le ali’i ua molia, ae sau le tali i luga o le telefoni, “e leai se faila”.

O le mafua’aga na le maua ai le faila a Fa’aaliga i le ulua’i taimi na tu’uina atu ai le talosaga a le Fa’amasinoga e pei ona taua e Puni i lana molimau, o le eseese lea o igoa sa tu’uina atu e le Ofisa Faanofovaavaaia ma le igoa o loo maua i faila a le latou Ofisa.

O le igoa o loo i fa’amaumauga a le Ofisa o Femalagaaiga o “Joeita Fa’aaliga”, ae o le igoa sa tu’uina atu e le Ofisa Fa’anofovaavaaia o “Joyita Fa’aaliga”, peita’i na fa’ailoa e Kruse ia Puni, o le igoa o loo i fa’amaumauga a le Fa’amasinoga, o le igoa na ave e le ua molia i Leoleo, ona ave lea e Leoleo i le Ofisa o le Loia Sili, ma avatu ai e le Ofisa a le Loia Sili le igoa lena i le fa’amasinoga.

Na fiamalamalama atili Kruse i le mafua’aga e le aloaia ai e le Ofisa o Femalagaaiga poloaiga e tu’u atu e le Fa’amasinoga, i soo se taimi e mana’omia ai faila o tagata mai fafo o lo o a’afia i solitulafono, ae na fa’atoese Puni ma ia taua e fa’apea, o lo o aloaia e le Ofisa o Femalagaaiga soo se poloaiga e tu’uina atu e le fa’amasinoga, sei vagana lava ua le maua le igoa sa’o o le tagata o loo molia ona faigata lea ona saili lona igoa i luga o le latou ‘computer system’.

“E fa’apefea ona taofia le tula’i soo mai o le fa’aletonu lenei i le lumana’i, o le fiu o la outou Ofisa e su’e faila o tagata mai fafo e ulufale mai i le atunu’u”, o le fesili lea a Kruse.

“Talu mai tausaga e tele na ou nofo mai ai i le nofoa lenei, o le tele o tagata o lo o molia i le faia o uiga mataga i fanau teine laiti, o tagata e ulufale mai i pemita ta’i 30 aso ma nonofo fa’asolitulafono ai lava i le atunu’u e aofia ai ma le ali’i lea ua molia nei, ae sa tatau ona avea o ia ma turisi e tafao i le atunu’u mo le umi e na o le 30 aso”.

“E fa’apefea la ona e fai mai ua leiloa le faila a le ua molia ae o la outou Ofisa lea na sainia le pemita ma tu’u atu i ai le fa’atanaga e ulufale mai ai i le teritori, lea fo’i la ua fesili atu le fa’amasinoga e fa’amanino mai le mafua’aga e le i toe fo’i atu ai o ia ina ua mae’a le pemita e 30 aso, ae sau lau tali e na o mea pogisa e le manino i le fa’afofoga a le fa’amasinoga”.

“Ua tula’i soo mai lenei fa’afitauli, e le o se taimi muamua lenei ua maitauina ai e le Fa’amasinoga tulaga fa’aletonu i le Ofisa o Femalagaaiga, na tupu i le nofoaiga a Tauese, na tupu i le nofoaiga a Togiola, lea fo’i o lo o tupu i le nofoaiga a Lolo”.

Na koma teisi Kruse ina ua mae’a lana gasugasu i le molimau, ona maua lea o le avanoa o le Loia a le malo ia Robert Morris e fa’aauau ai ana fesili, ma ia fesiligia ai Puni poo le tiute a ai le mautinoa lea e tatau ona toe fo’i le tagata mai fafo pe a mae’a le aoga o le pemita na ulufale mai ai, ae na tali Puni, “O le sponsor”.

Na ata fa’amaele Kruse i le taimi na mae’a ai le tali lea a Puni ma ia fa’apea atu i le loia a le malo, “O le tali lava lea e tu’u mai e le Ofisa lea i soo se taimi e fesiligia ai i le mataupu lea, e tau tu’ua’i solo le leaga i isi tagata, ae o le matafaioi tonu lava lena a le Ofisa lea”, o le saunoaga lea a Kruse ma ia toe fa’apea atu ai i le loia a le malo, “Alu e fai lau fesili lena i le Loia Sili, o ia tonu lena o loo pule i le Ofisa lea e vaavaaia le Ofisa o Femalagaaiga”.

Na sa-o uma totonu o le potu fa’amasino i le taimi na alala ai lava Kruse i lona nofoa ma tu’u lona lima i lona muaulu, ma foliga mai o lo o tau to manatu i se isi mataupu, ae o le taimi lea o lo o tau fai punonou ai ana Fa’amasino Lagolago ia Fa’amausili Pomele ma Muasau T. Tofili e faitau tusitusiga a le Failautusi a le Fa’amasinoga o lo o i luga o masini computer o loo i o la luma.

“O le poloaiga lenei a le fa’amasinoga, soo se taimi e tu’uina atu ai e le fa’amasinoga sana poloaiga e saili mai ai fa’amaumauga mai le Ofisa o Femalagaaiga, e le toe mana’omia se sui o le Ofisa e oo mai, a ia oo mai le Pulesili o le Ofisa o Femalagaaiga, poo le Loia Sili fo’i pe afai e le avanoa le Pulesili o le Ofisa”, o le saunoaga fa’ai’u lea a Kruse na tu’uina atu i le loia a le malo e uiga i lenei mataupu, ma malolo ai loa le fa’amasinoga mo le iloiloina o se fa’asalaga mo le ali’i o Fa’aaliga.