O le vaiaso nei na tofia ai e le afioga i le ali’i kovana ia Lolo Matalasi Moliga se Komiti Fa’apitoa, latou te iloiloina le toe fa’atulagaina o totogi mo le Vaega o Tausima’i a le Matagaluega o le Soifua Maloloina a le malo.

I se poloaiga na sainia ma tu’uina atu e le ali’i kovana i Fa’atonusili ma Fa’auluuluga o Matagaluega ma Ofisa Tumaoti uma a le malo, o lo o ia fautuaina ai i latou i le Komiti Fa’apitoa e pei ona ia tofia, ina ia vaavaai ma silasila toto’a i lenei mataupu taua.

O i latou o lo o i totonu o lenei Komiti Fa’apitoa e aofia ai Fa’atonusili e to’alua, faapea ai ma sui o le Matagaluega o le Soifua Maloloina.

O sui o le Komiti Faapitoa e aofia ai Le’i Sonny Thompson, le Faatonusili o le Ofisa o Tagata Faigaluega a le malo, poo sona sui fo’i na te filifilia, o Catherine Saelua, o le Faatonusili o le Ofisa o le Paketi a le malo, poo sona sui na te filifilia, o le Ta’ita’i o Vaega Tausima’i a le Soifua Maloloina ia Margaret Sesepasara, o le Sui Fa’atonusili o le Soifua Maloloina ia Faraitoafa M. Utu, o Simamamao Tuato’o, o le Sui Peresetene o le Asosi o Tausima’i a le Falema’i o le LBJ, o Dr. Mikaele Etuale, o Otomalesau J. Ah Sue, ma Iu J. Pereira.

Na taua e Lolo i lana tusi i fa’atonusili ma fa’auluuluga o matagaluega ma ofisa tumaoti a le malo e fa’apea, o le tofa a Iu lea ua tofia e avea ma sui o le Komiti Fa’apitoa, ina ia fa’a faigofie ai ona tu’uina atu fautuaga ma ripoti a le Komiti i lona ofisa mo lona iloiloina i totonu o le 30 aso, talu mai le aso na ia sainia ma tu’uina atu ai lenei poloaiga.

O le faia o si’itaga i totogi o le Vaega Tausima’i a le Soifua Maloloina faapea ai ma le LBJ, o se tasi lea o mataupu na saunoa i ai ta’ita’i o le atunu’u i le aso na fa’amanatu ai le atoaga o le 100 tausaga talu ona i ai i le atunu’u le tautua a le Vaega o Tausima’i i le masina o Iulai na te’a nei, lea fo’i na fa’amanatu fa’atasi ai ma le sao o Tausima’i i le atunu’u, ina ua fa’ailoa e ta’ita’i o le atunu’u i le Vaega o Tausima’i le tatau lea ona fa’atulaga a latou totogi, fufaua i le taua ma le aoga o le latou tautua.

Na fa’ailoa e le afioga i le ali’i kovana ia Lolo, i le Vaega Tausima’i i lana saunoaga fa’apitoa i le aso na fa’ataua ai le sao o Tausima’i i le atunu’u, e tatau i le malo ona ave la latou fa’ataua i soo se tautua i totonu o le atunu’u e aofia ai ma Tausima’i, ina ia lagona e tagata faigaluega uma le taua o le latou sao o lo o fa’atinoina mo le atunu’u i aso ta’itasi.

Ae na taua e le Peresetene o le Vaega o Tausima’i i Amerika Samoa ia Tofiga Tufele e fa’apea, e ui e taua le faia o si’itaga o totogi mo soo se tagata faigaluega, peita’i o le galuega fa’a Tausima’i, e le o le tupe e taua, ae o le soifua maloloina o le atunu’u ina ia mautinoa o lo o tausia lelei.

I se fa’atalatalanoaga a le Samoa News ma le Fa’atonusili o le Vaega o Tausima’i a le Soifua Maloloina ia Seseparasa i le masina o Iulai na te’a nei, na manino ai le tele o tiute tauave o lo o fa’atinoina e le Vaega o Tausima’i a le Soifua Maloloina i le atunu’u, e aofia ai le polokalame o lo o asia ai tagata gasegase ma tagata matutua i tua i maota ma laoa.

E silia i le to’a 60 Tausima’i o lo o galulue i le Soifua Maloloina i le taimi nei, ma o ni isi o i latou nei o lo o umia tulaga maualuluga i totonu o le matagaluega, e aofia ai le faletua ia Utu lea o lo o avea ma Sui Fa’atonusili o le matagaluega, o ia fo’i le ulua’i Tausima’i ua ia filifilia e avea ma sui fa’atonusili o le matagaluega o le Soifua Maloloina a le malo.