Ads by Google Ads by Google

Komisi tete'e fuala'au fa'asaina i Amerika Samoa

O le taeao o le aso Gafua na aofia potopoto ai le Malo atoa i lana taupulega i le Fale Laumei mo le fa’alauteleina o porokalama a le Komisi e tete’e atu ia fualaau fa’asaina a Amerika Samoa (American Samoa Drug Control Commission), o se komisi sa filifilia e Kovana Lolo Moliga ona o le fitaituga o lo'o a'afia ai le atunu’u ae maise fanau talavou ona o vaiala'au ma fuala'au fa'asaina.

 

O lea Komisi fa'apitoa, na fa'atulaga ai ina ia ofu le lanu mumu, ma le lipine mumu e fa'ailoa ai ua e sauni e tula'i ma sapaia le fa'amoemoe maualuga, ia tete'e malosi i fuala'au ma vaia'au o'ona i le atunu'u.

 

"O lo'o ia i tatou lava le tali, e le tau tulia ia saili se tasi e aumai e na te faia mai ni polokalama pe fa'atula'ia Koalisi ina ia latou tima'ia le atunu'u, ua tatou iloa uma lava mea e le tatau ona faia e le aoga fo'i i le soifua o tatou fanau, ae ua le mafai ona tatou faia i ai se galuega?” o le fetalaiga lea a Lolo i le fa’atasiga.

 

"E le masani ona sulu atu le Malo i tagata lautele ina ia fesoasoani mai, pe fesiligia fo'i se fesoasoani a le vasega o Ekalesia uma ua aofia i le atunu'u, peita'i, ona o le fa'afitauli ua iloga ua ogaoga, e tatau ai ona saili le Malo i se fesaosoani mai e fa'amama le avega aua ua faigata ona toe taofia i le taimi nei le fa'aaogaina e le fanau a'oga maualuluga o nei mea fa'asaina, tapa'a, marijuana, aisa, ava o'ona ma le pia. Ua fa'atetele ma ua tatau ai ona tutu fa'atasi uma aiga, nu'u ma afioaga, ekalesia ma le malo ia matua faia se suiga i lenei fa'afitauli, a'o le'i to'atele ola o le fanau e maumau ma le aoga."

 

I le poloa'iga fa'alaua'itele a le Kovana ua fa'amaite ai lenei komisi, sa fofogaina atoa e le afioga le Kovana Itumalo i le Manu'atele Laolagi Savali. I lea poloa'iga ua augani ai le Kovana ina ia tula'i mai Matua, le afio'aga ma Ekalesia e auau fa'atasi ma le Malo ia a'oa'o ma fa'atonu fanau ia popoto ma ia i ai agava'a e ta'ita'ia ai le tatou malo i le lumana'i.

 

Ua fa'ailoa fo'i, o le vaiaso atoa lenei ua savalia, o le a fa'alauiloa atoatoa i fanau a'oga, amata mai i a'oga tulaga muamua se'ia o'o i a'oga maualuluga uma, e ao ina autova'a mai se'i fa'amalamalama ma tima'ia e le aufaigaluega a le Malo, ia iloa le leaga ma ia le toe ola i se olaga e sa'oloto mai soligatulafono matuia ona o le tagofia o vaila'au ma fuala'au o'ona ma le ulaula tapa'a o'ona.

 

Na fa'asolo tula'i sui iloga o vaega ta'itasi o tautua a le malo o le a latou fa'atinoa folasaga i le Malae o le Suigaula a le Atuvasa, ma sa mua'i tula'i ai le Sui Fa'atonu o le Matagaluega o le Soifua Maloloina, Farah Malaepule Utu. "O le mau a le soifua maloloina, ia tausia lou soifua Maloloina aua o le tino o le malumalu lea e afio ai le Atua. Aua ne'i fa'aleagaina lea malumalu ona o a'afiaga o le ulaula tapa'a o'ona, inumia o vaila'au o'ona ma le ava malosi, po'o le tagofia fo'i o fuala'au fa'asaina."

 

O le vaega a le DHSS sa tula'i ai le Fa'atonusili Taeaofua Dr Meki Solomona ma sa ia fa'ailoa fo'i, le tele o taumafaiga ale latou vaega ina ia taofia le tagofia e fanau talavou e le'i mae'a le pule a Matua i le pia, ava malosi ma Fuala'au fa'asaina. "Ua iloga ona tele a'afiaga e o'o i mafaufau vaivai o fanau talavou, ona ua vave tagofia nei mea leaga, ma ua a'afia ai latou fa'aiuga faia, ae o lo'o ua fa'aa'e e le Malo lenei tautua lautele, ia toe fa'asaosao mai ai latou fa'ailoga ma latou mafaufauga i mea e ao ina faia, ia toe feso'ota'i ma latou aiga."

 

O le vaega a le Falema'i i le LBJ i Faga'alu sa o'o ane ai Dr Annie Fuavai e saunoa ona e le o iinei le afioga Faumuina John Faumuina le pule sili o le falema'i. Lea sa ia fa'ailoa mai ai, "O i matou nei o foma'i, ua ia i matou le agavaa ma le iloa, e matou te iloa ai tiga o lo'o feagai ma le tagata ua i ai gasegase tumau, ma e tatau ona fa'atulaga ni fuala'au malolosi e inumia ina ia mafai ona fa'ate'a le tiga a'o soifua i latou."

 

"Peita'i o nei fuala'au o lo'o ua matele ina fa'aaogaina sese e fanau talavou, ma ua fai ma latou fuala'au e lele ai, lea la ua ala ai ona fa'ailoa atu, e tatau ona va'ai toto'a matua i le aofai o latou fuala'au e tala atu ma inumia, a sese ona tu'u i se tamaititi talavou, e ono avea ma mea e a'afia ai lo latou ola."

 

O le aso Faraile ua fa'atulaga mo le Ofisa ole Puipuiga Fa'alotoifale, ma ua fa'ailoa fo'i e le fa'atonu o lea matagaluega, Ve'ave'a Samana, "Ia asiasi mai, ia iloa lelei mea ua matou sailia, afai o e iloa o i ai i lou fale, e o'o i le taimi matou sofa'ia atu ai ma ave'ese mai, ae afai e leai lava ni fuala'au ma vaila'au fa'asaina i lou maota, e leai fo'i la se aoga o le matou tautua ia te oe."

 

O le taeao ananafi, na va'aia ai le tele o fale'ie ua maea fa'atutuina i le Malae o Suigaula ma ua fa'aofi ai le anoanoa'i o tautua lautele. E amata mai i le Matagaluega o le Soifua Maloloina se'ia pa'ia le matagaluega o le Saogalemu Fa'alotoifale, ma le Matagaluega o le Puipuiga o le Saogalemu Lautele, ma le Matagaluega o Alamanuia mo Tagata Lautele o le atunu'u.

 

O tima'iga fo'i tau le gasegase o le Kanesa o Susu, po'o le Kanesa o le Fa'autama mo tama'ita'i ua mae'a fa'atutuina fo'i latou tautua, ae maise o le vaega ua fa'atuina e tama'ita'i Tausima'i a le tatou malo, ina ia siakia ai le toto maualuga ma le ma'i suka pe asiasi atu nisi i le latou fo'i fale'ie.

 

Manatua o nei tautua uma e toe amatalia fo'i i lenei taeao, ma e sili ona fa'aavanoa sou taimi ina ia o'o ane mo sou malamalamaga atili i nei a'afiaga e taua ona iloa, aua o matua lava e tatau ona mua'i iloa ni foliga va'aia o le fa'asua'ava o lau tama, pe o lele fo'i.