KARLINNA S. SANCHES L11 & ALEXANDRITE TOLEAFOA L12 TOGISILI-TUSITALA


O se va’aiga i le tama’ita’i talavou o Karlinna Suluama Sanchez ua ia umia lona fa’ailoga o le tulaga muamua i le Tusitala i le gagana peretania mo le vasega 11 i le teritori. O lo’o ua patipatia le fa’aeaga a lenei tama’ita’i e lona tina Christina Lutu Sanchez ma lona tina matua o Etenauga Lam Yuen - Lutu. [ata: Leua Aiono Frost]

O se vaaiga i le tama’ita’i faia’oga ua avea nei ma fitafita a le AAF ma ua si’itia fo’i lona tofiga i le vaiaso na te’a nei e tautua ai i le vaega au. O ia lea ua tutu fa’atasi mai ma Capt. Leo, Dimata o se tasi o lona aiga, sa fa’apineina o ia. [ata: foa’i]

UA mae’a ona faia le fa’ai’uga o togi na ausia e le fanau a’oga sa fa’aulu a latou tala tusia i le gagana peretania i vasega uma a le Matagaluega o A’oga ma ua lautogia ai nisi o le fanau a’oga.

 

O le tama’ita’i ua ia mauaina le fa’ailoga muamua i le Vasega 11 o Karlinna Suluama Sanchez mai Samoana High a’o le togisilia i le Vasega 12 ua maua lea e le tama’ita’i o Alexandrite Toleafoa o Fa’asao Marist High i lenei tausaga.

 

O le vasega 10 ua maua le togisilia e Travis Gingras mai le a’oga a South Pacific Academy, a’o le togisilia mo le vasega 9 ua maua lea e le alii o Uelese Patu mai le South Pacific Academy fo’i.

 

Mo le vasega 8 ua maua le togisilia e Avril Regis mai St Theresa Elementary school i Leone, ma le togisilia i le Level 7 ua tula’i mai ai le susuga Fola Fa’ita mai le Samoa Baptist i Happy Valley, Tafuna.

 

O le togisilia i le vasega 6 ua maua e Baelin King o le South Pacific Academy ma le togisilia o le vasega 5 ua maua e le susuga Erin Gebauer mai le South Pacific Academy. O le togisilia i le vasega 4 ua maua e Tafailagi Toelupe mai Aua Elementary School  ae o le tulaga muamua i le vasega 3 ua maua e Tuahine Rapoza mai le South Pacific Academy.

 

O nei tulaga uma ua fa’ao’o mai e le Ofisa o le Curriculum a le Matagaluega o A’oga i le Mataupu o le Fa’a-Peretania. E i ai lava tauvaga fa’alemasina e faia, peita’i o le aotelega lea o nei tauvaga uma, ua fa’alauiloa atu.

 

Na faia tufatufaga o fa’ailoga ia Aperila 12, 2017.

 

SAILELAGI MANU - SI’ITIA TOFIGA I LE MILITERI

 

O le tama’ita’i o Sailelagi Manu mai ler afioaga o Afonotele, ua fa’ailoa lona fiafia ua avea nei o ia ma Satini [SGT] i le vaega a le Aviation i le Air Force (AAF), ma ua fa’afiafiaina ai o ia ma lona aiga atoa ae maise o si ana fanau ma ona matua.

 

O ona matua Manu Mika Aoelua, ua maliu o ia, ma o lona tina o Sailelagi Manu, lea ua fa’agae’etia i le taumafaiga ua au a si ona alo a’o tautua nei i le Station Wheelers, AAF i Hawaii. O ia o se tasi e naunau i lana tapua’iga Ekalesia Fa’apotopotoga Kerisiano i Amerika Samoa i Afonotele, ma o lo’o tinou lava o ia i lana ekalesia e pei ona amata mai ai lona olaga i si ona aiga i Amerika Samoa nei.

 

Na amata mai le soifua tautua o Sailelagi o avea ma faia’oga ma e 14 tausaga o lana tautua i le Matagaluega o A’oga, i lona tofi o le Faia’oga i le potu a’oga, mai le tausaga 1997 - 2005. Ona avea ai lea o ia ma Math Coordinator mo le matagaluega o A’oga, ae maise fo’i sa galue feso’ota’i ma le Kolisi Tu’ufa’atasi a Amerika Samoa i le fa’atulagaga o Kosi mo le Numera mo fanau a’oga i lana lea tatua. O sana tautua lea sa amatalia i le 2006 seia oo i le 2011.

 

Peita’i, o lana tautua i le militeri fa’ato’a amata i le 2012 seia oo mai i le taimi nei. “O la’u fa’afetai e si’i i le Atua ona o lona alofa e le mavae lea i le ola taumafai o lo’u sui fa’atauva’a, aua e le’i faigofie ona matu’u atu le fanau ma le aiga pele, ae maise o matua ma le ekalesia ma tofiga sa galue ai, ona o le manatu ina ia sailimalo i nei fo’i tautua, fa’afetai ua ia talia lelei le mana’oga fa’atauva’a sa molia i talosaga i aso fai so’o. Fa’afetai i le tapua’iga mau a lo’u aiga, le fanau ma matua ae maise o le Ekalesia ma le afio’aga pele o Afonol,” o se tala mai lea a le tama’ita’i o Sailelagi Manu.

 

Na mua’i a’oa’oina o ia i le Kolisi ma fa’au’u i le 1999 i le fa’au’uga o le vasega fa’au’u 1999, ma taua’aoina ai lona fa’ailoga AA Arts. Si’itia le taumafaiga e a’oa’oina i UH Manoa ma maua ai lona fa’ailoga Bachelor in Education i le tauaga 2002. Soso’o ai ma lana taumafaiga ia maua sona fa’ailoga maualuga atu, ma toe fa’au’u ai ma le Masters in Education lea ua umia nei a’o ululale atu i le militeri.

 

O lo ua i ai nai ona alo fa’atasi ma ia i lana galuega i Hawaii ma ua mafuta fo’i ina ia fa’amanuia ma patipatia le taumafaiga a le tina ua si’itia lona tulaga e galue ai mo le Aviation Air Force [AAF] O i latou o Jr. Vaiuli, Jennifer, Eddie ma Clinton.

 

O se tasi o alo o si ona uso o lo’o i le militeri fo’i, Capt. Leo, Dimata sa avea ma sui o lona aiga e fa’apineina lona lea si’itaga.

 

Na fa’ato’a maua le suiga o le nofoaga a le Militeri e tautua ai i le tausaga ua mavae, ae fa’afetai o lea ua si’itia ai lona tofiga e tautua ai, a’o latalata mai i le tatou nei malo, aua o lea o lo’o tautua i le Aviation Unit i Honolulu, Hawaii talu mai Iuni 2016. O ia o lo’o galue i le Automated Logistics.

Comment Here