Kanesa, o le gasegase lona lua ua to’atele ai tagata maliliu i AS


[ata: AF]
ausage@samoanews.com

A o fetufaa’i ali’i ma tama’ita’i foma’i mai le Vaega o le Soifua Maloloina fa’apea ai le Falema’i o le LBJ e ala i se fonotaga na tatalaina i le taeao nei, e tau saili ni auala e foia ai le fa’atupulaia o le aofa’i o le atunu’u e a’afia i le gasegase o le kanesa, na taua e le tama’ita’i foma’i ia Dr. Monita Adip mai le falemai o le LBJ e fa’apea, o le gasegase o le kanesa, o le gasegase lona lua lea i le fa’atulagaina o gasegase o lo o to’atele tagata Amerika Samoa ua maliliu ai.

 

I se faatalatalanoaga ma le Samoa News ao lumana’i ai le fonotaga lona lua a Vaega o lo o galulue i le puipuia o le Soifua Maloloina i le atunu’u, lea na tatalaina i le taeao nei i le Fale Laumei i Utulei, sa ia fa’aalia ai le i ai o auala e mafai ai ona fesoasoani i le foia o le gasegase o le kanesa i le atunu’u.

 

“O lo o to’atele lava i latou o lo o popole pe fa’afefea ona maua se togafiti mo le gasegase o le kanesa, ae i lo’u talitonuga fa’a foma’i, e leai se isi auala e sili atu ma lelei mo le puipuiga o le saogalemu mai le aafia i le kanesa nai lo le vave alu i le falema’i e fai sau siaki ma fai se fa’ata ina ia mautinoa ai e te le o a’afia i ‘auga o lenei fa’ama’i, manatua, e sili atu le puipuia nai lo le tau togafitia”, o le saunoaga lea a Dr. Adip i le Samoa News.

 

Sa ia taua le fa’atupulaia o le aofa’i o tagata ua fa’amaonia le a’afia i le gasegase o le kanesa i totonu o le Iunaite Setete o Amerika, e aofia ai setete e 50 ma teritori e to’a 3 e aofia ai ma Amerika Samoa.

 

“Ou te talitonu e tusa ai ma fa’amaumauga ua matou maua mai i le falema’i o le LBJ, e ui i le tele o ituaiga kanesa o loo faamaonia le aafia ai o tagata eseese i totonu o le malo tele, e foliga mai e na o le tasi lava le ituaiga kanesa lea o lo o a’afia ai tagata i Amerika Samoa, ma o le mafua’aga fo’i la lena o lo o matou galulue malosi ai ma le Matagaluega o le Soifua Maloloina, ina ia sailia auala uma e mafai ai ona foia le fa’aopoopo o le aofa’i o tagata e a’afia i lenei gasegase”, o le isi lea saunoaga a Dr. Adip.

 

Mai le silia i le 100 ituaiga kanesea eseese o lo o taua i ripoti tusitusia a le Vaega o lo o galulue e tete’e atu i fa’ama’i le pipisi i Amerika Samoa, o le kanesa o le susu lea ua maua i faamaumauga, o le kanesa lea o lo o pito to’atele tagatanu’u o Amerika ua maliliu ai, aemaise lava i le itupa o Tina.

 

“E ese le ituaiga kanesa o lo o aafia ai ali’i, ese fo’i le ituaiga kanesa o lo o a’afia ai le itupa o tama’ita’i, pau le itu e fia faamanino i le atunu’u, o ituaiga kanesa uma nei e lua, e mafai lava ona foia le oo atu i le tulaga matuia ma i’u ina ma’imau ai le soifua pe afai ae fai fai se siaki ma fai le fa’ata i le falema’i, ona mafai ai loa lea ona tu’uina atu e le falema’i isi la’asaga e fesoasoani ai i le soifua maloloina o le atunu’u, ae o le i o o atu i le tulaga e sili atu ona matuia”, o le saunoaga lea a Dr. Adip.

 

I fa’amaumauga sa mafai ona tu’ufa’atasia e le LBJ ma fa’asoa i luma o le fonotaga i le aso ananafi, o lo o taua ai e fa’apea, i le gasegase lava ia o le kanesa, o le kanesa o le susu le gasegase ua to’atele tama’ita’i ua maliliu ai, ae o le kanesa o le mama (lungs) lea ua to’atele ali’i ua maliliu ai i le tausaga e 2015.

 

Ae i le tausaga e 2013-2014, o le kanesa o le susu le kanesa na pito sili ona to’atele tagata Amerika Samoa na a’afia ai i lea fo’i tausaga, sosoo ai ma le kanesa o totoga, mulimuli atu ai i tua le kanesa o le mama, ma fa’asolo atu ai lava i isi ituaiga kanesa ua mafai ona a’afia ai tagatanu’u o Amerika Samoa.

 

“Ua manino i fa’amaumauga ma suesuega a le falema’i, o le itupa o ali’i i Amerika Samoa, o le kanesa o le mama le ituaiga kanesa lea o lo o to’atele ali’i ua maliliu ai, sosoo atu ai ma le kanesa o vaega o le totoga, fa’apea ai ma le kanesa o le pa’u, ma o nei mau gasegase uma, o lo o galulue pea le falema’i i le tu’u fa’atasia o auala uma e mafai ai ona fesoasoani i le fa’aitiitia o a’afiaga e maua mai i nei gasegase matuia”, o le isi lea saunoaga a Dr. Adip.

 

O le afioga i le ali’i lutena kovana ia Lemanu Peleti Mauga na saunoa e fai ma sui o le malo, i le tatala aloaiaina o le fonotaga e fetufaa’i ai sui o le Vaega o le Soifua Maloloina i auala e foia ai le tele o gasegase o lo o a’afia ai tagata o le atunu’u, e aofia ai le kanesa, zika virus ma isi lava gasegase mata’utia i Amerika Samoa.

 

Na tu mo ni nai sekone le afioga i le ali’i lutena kovana ua tau le mafai ona fa’aleo lana saunoaga, ina ua aofia i le ulua’i vaega o lana saunoaga lona laei sa su’i e lona faletua ia fai i lagi le folauga, ona o a’afiaga i le gasegase o le kanesa.

 

Saunoa Lemanu e fa’apea, so o se atunu’u lava o le lalolagi e pei fo’i o Amerika Samoa, e tele naua luitau tau i le soifua maloloina o lo o latou fetaia’i, peita’i o le itu taua e tatau ona silafia e le to’atele, e le mafai ona foia fa’afitauli tau i gasegase o lo o aafia ai tagatanu’u, pe afai e le fa’atinoina galuega a i latou ua tu’u atu i ai le galuega e fa’atino.

 

“E taua la outou galuega o lo o fa’atinoina i aso uma, e le gata o lo o outou su’esu’e auala uma e mafai ai ona foia lenei gasegase, ae o lo o outou taumafai fo’i e saili ni isi metotia e fesoasoai ai i tagata ua a’afia i ituaiga gasegase eseese e pei o le kanesa, lea ua to’atele soifua ua ma’imau ai”,  o le saunoaga lea a Lemanu.

 

“Afai la ua tatou iloa le matuia o lenei gasegase o le kanesa, o le fesili la ua tula’i mai i lenei aso, o le a sa tatou galuega e tatau ona faia ina ia foia ai le toe alia’e mai o lenei fa’ama’i, ou te iloa, e leai se isi auala e sili atu ona faigofie nai lo le tatou galulue fa’atasi e fetufaa’i fa’amatalaga, auala ma metotia e fesoasoani ai i le foiaina o lenei gasegase”, o le saunoaga lea a Lemanu.

 

Na taua e le lutena kovana i lana saunoaga se tasi o tama’ita’i ua tele tausaga o la masani i le atunu’u, lea fo’i sa faigaluega i le falema’i o le LBJ, lea ua ia maua tala ua a’afia o ia i le gasegase o le kanesa, ma o lo o i ai nei o ia i le setete o Hawaii mo ana talavai.

 

“O le uiga o le feau o lo o o’u taumafai e momoli atu, e le fa’ailogaina e le gasegase poo ai oe a o ai fo’i a’u, tusa lava poo oe o le foma’i, pe e te faigaluega fo’i i le falema’i poo le soifua maloloina, poo a’u fo’i o le lutena kovana, e le avea na auala uma e ‘alo ai le a’afia o tatou uma i lenei gasegase, pau la tatou vaega e fai, o le sailiili i auala e foia ai nei mau fa’ama’i ua avea ma to’atuga i soifua o nai o tatou aiga”, o le saunoaga fa’ai’u lea a le afioga i le lutena kovana.

Comment Here