Ioe tama’ita’i Leoleo sa galue JDC umia faasolitulafono fualaau faasaina

ausage@samoanews.com

O le tama’ita’i leoleo lea e to’afa i ai leoleo na taofia ma molia i le faia o gaioiga faasolitulafono i totonu o le Falepuipui o Tamaiti (JDC) i Tafuna i le 2016, ua ia ta’utino i le fa’amasinoga maualuga e moni ma fa’amaoni tu’uaiga fa’asaga ia te ia.

 

Na ulua’i tu’uaia e le malo ia Alofagia Letuli i moliaga eseese e aofia ai lona umia faasolitulafono o vaega o le pauta fa’asaina o le aisa, fesoasoani i le fa’asosolaina i tua o pagota, atoa ai ma moliaga mama o le faia o gaioiga e ono lamatia ai le saogalemu o fanau laiti sa taofia i le JDC.

 

A e i lalo o se maliliega na sainia e le ua molia ma le malo ma ua talia fo’i e le fa’amasinoga maualuga i le vaiaso nei, ua tali ioe ai Letuli i le moliaga e tasi o le umia faasolitulafono o vaega o le pauta faasaina o le aisa. I le talia ai e le fa’amasinoga maualuga o le tali ioe a Letuli, na talosaga ai loa le malo ina ia solofua isi moliaga o lo o totoe ai i le pepa o tagi sa latou fa’aulu.

 

O se tasi o tuutuuga o le maliliega i le va o Letuli ma le malo, o lona ioe lea e molimau ma le fa’amaoni mo le itu a le malo, i le taimi o le fa’amasinoga autu o isi leoleo o lo o tu’uaia fa’atasi i latou i lenei matupu, o i laua ia o Okesene Alo ma Olataga Wilson.

 

I le tali ioe ai o Letuli i le moliaga e pei ona ta’usala ai o ia, sa ia ta’utino ai i le fa’amasinoga e faapea, i se taimi o le va o Aperila 1 e oo atu ia Iulai 31, 2016, a o galue o se leoleo i le Falepuipui o Tamaiti i Tafuna, sa ia umia fa’asolitulafono ai vaega o le pauta fa’asaina o le aisa. O lea gaioiga sa ia faia sa le tusa lea ma ala o le tulafono.

 

E to’afa leoleo o lo o tu’uaia e le malo i lenei mataupu. O ia leoleo e aofia ai Letuli, Alo ma Wilson ua i luma o le fa’amasinoga maualuga a latou mataupu, faapea ai ma le susuga a Junior Utuga, o lo o i luma o le fa’amasinoga faaitumalo lana mataupu, ona o lo o tu’uaia o ia e le malo i moliaga mama.

 

O tu’uaiga fa’asaga i leoleo e to’afa mai le JDC, na alia’e mai ina ua faila e le Pule o le JDC sana ripoti i le Ofisa o le Komesina o Leoleo i le 2016, e tusa ai o gaioiga fa’asolitulafono o lo o masalomia le faia e i latou nei i totonu o le JDC.

 

O ni isi o ia gaioiga faasolitulafono e aofia ai le tatala i tua o tamaiti pagota e o i tua i o latou aiga e aumai tupe e faatau ai fualaau fa’asaina, fa’ataga tamaiti pagota latou te ula ula fa’atasi i fualaau fa’asaina, atoa ai ma le faia o gaioiga mataga faafeusuaiga i tama’ita’i laiti sa taofia i le falepuipui.

 

Na taua e se tasi o ali’i talavou i leoleo e faapea, o se tasi o po sa ia vaaia ai Letuli, o Okesene ma Wilson o lo o ula a latou fualaau fa’asaina i totonu o le umukuka i totonu o le JDC.

 

Na taua e le isi tamaititi pagota i leoleo e faapea, i se tasi o po ao taofia o ia i totonu o le JDC, sa ia vaaia ai se ta’avale ua alu atu i totonu o le lotoa, i le taimi lea o lo o tiute ai Letuli. Na alu atu Letuli ma loka o ia i totonu o le potu, ae maua ai le avanoa e mafuta ai Letuli ma le ave ta’avale i totonu o le ofisa mo le silia i le 2 e oo atu i le 3 itula. Faatoa tatala lava o ia ina ua alu ese le ta’avale mai totonu o le lotoa.

 

O lo o taofia pea Letuli i le toese i Tafuna ina ua le mafai ona totogi le tupe e $50,000 na faatulaga e tatala ai o ia i tua, e fa’atali ai le aso lea ua fa’atulaga e lau ai lana fa’asalaga.

 

O le ali’i loia ia Michael White o lo o tula’i mo Letuli, ae o le tama’ita’i loia ia Christy Dunn mai le ofisa o le loia sili o lo o tula’i mo le malo.

Comment Here