O le Tina lea na tu’uaia i lona fa’aaoga fa’agaoi o se vaega tupe tele mai le Ofisa o le Pulega o le Eletise ma le Suavai (ASPA) i le motu o Aunu’u, ua ia ta’utino i le fa’amasinoga maualuga i le vaiaso nei e moni ma fa’amaoni tu’uaiga sa faia fa’asaga ia te ia.

E pei ona taua i le tagi sa fa’aulu e le malo fa’asaga ia Makerita Leituane, e silia i le $18,000 le tupe e le i mafai ona toe maua mai i le gaioiga sa faia e le ua molia, ma o ia tupe, o tupe e totogi atu e tagata Aunu’u mo a latou pili eletise.

Na ulua’i tu’uaia e le malo ia Leituane i moliaga mamafa e 2, le moliaga o lona ave fa’agaoi o ni vaega tupe sa tu’uina atu i lalo o lana vaavaaiga, atoa ai ma le moliaga o le gaoi, ae i lalo o se maliliega na sainia e le ua molia ma le malo ma ua talia fo’i e le fa’amasinoga, na ia malie ai e tali ioe i le moliaga muamua o loo i le pepa o le tagi sa fa’aulu e le malo fa’asaga ia te ia, le moliaga o lona ave fa’agaoi lea o ni tupe sa tu’uina atu i lalo o lana vaavaaiga (embezzlement).

O le moliaga o le ave fa’agaoi o se vaega tupe sa tu’uina atu i lalo o lana vaavaaiga, o le vaega C lea o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, po o le fa’asala fo’i i le salatupe e le silia i le $5,000, pe fa’asala fo’i i fa’asalaga uma ia e lua.

I le talia ai e le fa’amasinoga maualuga o le tali ioe a Leituane i le moliaga e pei ona ta’usala ai o ia e le malo, na talosaga ai loa le malo i le fa’amasinoga ina ia solofua le moliaga mamafa e tasi o lo o totoe ai i le pepa o le tagi sa latou fa’aulu fa’asaga ia te ia.

I le tali ioe ai o Leituane i le moliaga e pei ona ta’usala ai o ia, sa ia ta’utino ai e faapea, i se taimi o le tausaga na te’a nei e oo mai i le amataga o le tausaga nei 2017, sa ia fa’aaoga fa’agaoi ai se vaega o tupe a le ASPA mo ia lava ma le fa’amoemoe o le a le mafai e le Pulega a le ASPA ona toe maua lea vaega tupe tele.

E pei ona taua i fa’amaumauga a le fa’amasinoga, e tusa ma le $18,050 le aofa’i atoa o le tupe a le ASPA e le i mafai ona toe maua mai ona o le gaioiga a le ua molia.

O le mataupu lenei na tofu atu i le Ofisa o Leoleo ina ua faila e le Pulega a le ASPA sa latou tagi fa’asaga ia Leituane, i lona fa’aaoga fa’agaoi o lenei vaega tupe sa tu’uina atu i lalo o lana vaavaaiga, a o galue ai o ia i le Ofisa o le ASPA i Aunu’u, mo le taliina o tupe e totogi atu e tagatanu’u o Aunu’u mo a latou pili eletise (debit meters).

E pei ona taua i fa’amaumauga a le fa’amasinoga maualuga e fa’apea, na avea le fiu o le Ofisa autu o le ASPA i Tutuila nei e fa’atali se ripoti o tupe maua mai le latou lala i Aunu’u ma itu na fesiligia ai loa le ua molia, peita’i sa ia taua le osofa’i e ni tagata gaoi o le Ofisa i le po ma ave fa’agaoi uma ai le tupe sa i totonu o le Ofisa i le aofaiga e $18,050.

A o fa’agasolo su’esu’ega e uiga i lenei mataupu, na manatu ai Leituane e fa’ailoa le mea moni sa tupu, ma toe suia ai loa lana fa’amatalaga sa tu’uina atu muamua, ma ia ioeina ai loa lona fa’aaoga o le tupe mo ia lava, ma ua ia sauni fo’i e toe totogi atoa le tupe, ae ina ua fiu le ASPA e fa’atali le toe totogiina atu o le latou tupe, na manatu ai loa le Pulega e tu’uina atu lenei mataupu i le tulafono, ma mafua ai loa ona molia Leituane i le tulafono.

Ua talosaga le malo ina ia fa’anofovaavaaia le ua molia, atoa ai ma le poloaina lea o ia e toe totogi le tupe sa ia fa’aaoga.

O lo o taofia pea Leituane i le toese i Tafuna e fa’atali ai le aso 4 Aokuso lea ua fa’atulaga e lau ai lana fa’asalaga, ina ua le mafai ona ia totogi le $10,000 sa fa’atulaga e le fa’amasinoga e tatala ai o ia i tua.