O le ali’i talavou, ua silia ma le 18 ona tausaga, lea na tu’uaia e le malo i moliaga o le faomea, e mafua mai i le fa’alavelave lea na ia osofaia ai ni faleoloa se tele i le fa’aiuga o le tausaga na tea nei, ua ia ta’utino i le fa’amasinoga maualuga i le vaiaso na te’a nei e fa’amaonia tu’uaiga uma fa’asaga ia te ia.

E 9 moliaga mamafa o le faomea i le tulaga muamua na ulua’i tu’uaia ai e le malo le ali’i o David Fo’a, ae i lalo o le maliliega lea na latou sainia ma le malo, lea fo’i ua toe tolopo lona fa’aauauina i le aso Tofi o le vaiaso nei, ua malie ai le malo latou te toe faia se suiga i ulua’i moliaga sa latou faila fa’asaga ia te ia.

O le maliliega e pei ona sainia e le malo ma Fo’a, ua malie ai le ua molia e tali ioe i le moliaga mamafa e tasi o le faomea i le tulaga lua, ma le tuutuuga o le a toe teuteu e le malo isi moliaga e 8 o loo totoe ai i le pepa o le tagi sa latou fa’aulu, ina ia suia ai moliaga mamafa ia e 8 o le faomea i le tulaga muamua i le moliaga mama o le gaoi.

I le tali ioe ai o Fo’a i le moliaga mamafa e tasi o le faomea i le tulaga muamua, atoa ai ma moliaga mama e 8 o le gaoi, ua ia ta’utino ai i le fa’amasinoga i lona osofaia lea o ni faleoloa se 7 i taimi eseese ma le fa’amoemoe e fa’atino ai le solitulafono o le gaoi.

Na ta’utino le ua molia e fa’apea, i le po o le aso 13 Tesema 2016, sa la aga’i atu ai ma Fa’ai’i Auapaau i se faleoloa i Malaeimi ma le fa’amoemoe e osofa’i lea faleoloa, ma ao la i ai i totonu, sa ia fa’aaogaina ai se tama’i fana e fa’afefe ai le fa’atauoloa, ae o Auapaau na alu atu ma aveese mai le masin itupe o lo o i ai le $260 i totonu ma la o ese loa.

I le po o le aso 28 Novema 2016, na alu to’atasi ai na o le ua molia i se faleoloa i Nu’uuli, ma ia fa’aaoga ai se naifi ma se ma’a e fa’afefe ai le fa’atauoloa ae gaoi mai le silia i le $100 mai totonu o le masini tupe.

I le aso 30 Novema 2016 i se taimi o le po, na o ai Fo’a ma se ali’i talavou i totonu o se faleoloa, ona fa’aaoga lea e le ua molia se naifi ma se ma’a e fa’afefe ai le fa’atauoloa, ae gaoi le $170 mai totonu o le masini tupe atoa ai ma pepa sikaleti e 4.

I le aso 1 Tesema 2016 i se taimi o le po, na aga’i atu ai Fo’a ma se tamaititi talavou i se isi faleoloa i Nu’uuli, ma fa’aaoga ai e le ua molia se ma’a ma se naifi e fa’afefe ai le fa’atauloa, ae aumai faagaoi ai le $160 mai totonu o le masini tupe.

I le po o le aso 2 Tesema 2016, na aga’i atu ai Fo’a ma se tamaititi i se faleoloa i Iliili, ma la faaaogaina ai se naifi ma se ma’a e fa’afefe ai le fa’atauloa, ae ave fa’agaoi le $35 mai totonu o le masini tupe.

I le po lava lea o le aso 2 Tesema, na toe aga’i atu ai fo’i le ua molia ma se tamaititi i se faleoloa i Pava’ia’i, ma fa’aaoga ai e le ua molia se naifi ma se ma’a e fa’afefe ai le fa’atauoloa, ae ave fa’agaoi le tinoitupe e $360 mai totonu o le masini tupe, fa’apea ai ma katuni sikaleti e 2.

I le po o le aso 3 Tesema 2016, na aga’i atu ai na o Fo’a i le faleoloa i se tasi o faleoloa ma ia fa’aaoga se naifi ma se ma’a e fa’afefe ai le fa’atauoloa, ae gaoi fa’amalosi le silia i le $400 mai totonu o le masini tupe.

O le po o le aso 11 Tesema 2016, na alu ai na o Fo’a i totonu o se faleoloa ma ia fa’afefe le fa’atauoloa i le naifi ma le ma’a, ae gaoi fa’amalosi ai le $175 mai totonu o le masini tupe, faapea ai ma ni pepa sikaleti.

Ma le po o le aso 14 Tesema 2016, na alu ai na o Fo’a i se faleoloa i Petesa ma ia fa’aaoga se naifi ma se ma’a e fa’afefe ai le fa’atauoloa ae gaoia le tinoitupe e $210, ae ina ua taumafai tagata faigaluega e taofi o ia, sa ia taumafai ai e tui le lima o le isi tagata faigaluega.

O le taeao o le aso Tofi o le vaiaso nei lea ua fa’atulaga e toe fofogaina ai le maliliega a Fo’a ma le malo, ma o lo o taofia pea le ua molia i le toese i Tafuna e fa’atali ai le aso lea ua fa’atulaga e toe valaau ai lana mataupu.

O le afioga i le ali’i fa’amasino sili ia Michael Kruse ma le Fa’amasino Lagolago ia Fa’amausili Pomele o lo o iloiloina le mataupu a Fo’a.