Ioe se ali’i sa galue i le Ofisa o Tiute i tu’uaiga a le malo


[ata: SN]
ausage@samoanews.com

O le ali’i talavou lea na galue i le Ofisa o Tiute a le malo na tu’uaia i lona taumafai e aumai fa’anana vaega o fualaau fa’asaina i le atunu’u, ua ia ta’utino i le Fa’amasinoga Maualuga e fa’amaonia tu’uaiga fa’asaga ia te ia.

 

I le ta’usala ai o Titifalaula Siaumau i le moliaga e pei ona ia tali ioe i ai, ua fa’atulaga ai loa le aso 2 Fepuari 2018 e lau ai lana fa’asalaga. O lo o tumau pea tuutuuga o lo o tatala ai Siaumau i tua mai le toese i Tafuna e fa’atali ai le aso lea ua fa’atulaga e lau ai lana fa’asalaga.

 

Na ulua’i tu’uaia e le malo ia Siaumau i moliaga mamafa e 2, o lona taumafai e fa’aulufale fa’asolitulafono mai i le atunu’u vaega o le laau fa’asaina o le mariuana, atoa ai ma lona fesoasoani e tufatufaina atu ia fualaau fa’asaina. Ae i lalo o se maliliega na sainia e le ua molia ma le malo, na tali ioe ai o ia i le moliaga o le taumafai e fa’aulufale fa’asolitulafono mai i le atunu’u mariuana, ae solofua ai e le malo le isi moliaga o loo totoe ai i le pepa o tagi sa latou fa’aulu.

 

I le tali ioe ai o Siaumau i le moliaga e pei ona ta’usala ai o ia e le malo, na ia ta’utino ai e fa’apea, i se taimi o le masina o Mati o le tausaga nei, na ia taumafai ai e fa’aulufale fa’asolitulafono mai i Amerika Samoa vaega o le laau fa’asaina o le mariuana, e ui mai i le malae va’alele fa’avaomalo a Pago Pago e aunoa ma se faatanaga.

 

Na ta’utino atili le ua molia, o lana gaioiga sa faia i lea aso sa le tusa lea ma ala o le tulafono, ae sa ia faia ona o lona mana’o i ai.

 

E tusa ai ma fa’amaumauga a le fa’amasinoga, o se afifi na aumai i le malaga a le va’alele o le Hawaiian Air i le po o le aso 27 Mati 2017, sa fa’atuatusi mai i le igoa o le ali’i o Felix Penerosa. O Penerosa o se tagata faigaluega i le kamupani la’u uta a le CLS Cargo Services, lea na avea ma molimau autu a le malo i le ulua’i iloiloga o lenei mataupu.

 

Na taua e Penerosa i le ulua’i iloiloga o lenei mataupu e fa’apea, i se taimi o le masina o Fepuari o le tausaga nei, na alu atu ai Siaumau ma talanoa atu ia te ia, e mana’omia sana fesoasoani i le aumaia o lana afifi mai Kalefonia o lo o aumai ai sana sipika.

 

I totonu o le afifi ina ua maua e Leoleo, sa maua ai se sipika o loo nana ai, i totonu o le sipika na maua i ai lau mamago o le mariuana e tusa ma le 5 pauna lona mamafa, tusa lea e $20,000 lona tau pe a fa’atauina atu i tagata lautele.

 

Na taofia e Leoleo ia Penerosa mo le 48 itula a o fa’agasolo suesuega i lenei mataupu, mulimuli ane na toe tatala o ia i tua e aunoa ma ni moliaga na faila fa’asaga ia te ia. Sa ia taua fo’i i luma o le fa’amasinoga le fa’amalolo o ia mai lana galuega sa galue ai i le CSL Cargo Services.

 

Na taua e le malo i a latou fa’amaumauga e fa’apea, o le sikipa lea sa maua i ai mariuana, na lafo mai e se tagata e igoa ia Toese Asiata mai Sacramento i Kalefonia. E le gata i lea, sa fa’ailoa fo’i e se sui o le Ofisa o le Puipuiga o le Saogalemu Lotoifale a Amerika ia Mack Marco i le Ofisa o Leoleo a le atunu’u, o le amataga o le tausaga nei na malaga atu ai Siaumau i Saramento ma se tinoitupe e $12,000 sa ia te ia.

Comment Here