Ioe se ali’i pagota i moliaga o le talepe fale

ausage@samoanews.com

O le ali’i pagota lea o loo tu’uaia e le malo i mataupu tau solitulafono eseese e lua, e mafua mai i fa’alavelave e lua ia na a’afia ai o ia i le osofaia lea o fale o aiga ma ave fa’agaoi ni meatotino sa i totonu, sosoo ai ma lona sola ese mai le vaavaaiga a le Leoleo o le toese i le aso na aumai ai o ia i luma o le fa’amasinoga fa’aitumalo, ua ia ta’utino i luma o le fa’amasinoga maualuga i le taeao ananafi, e fa’amaonia tu’uaiga uma fa’asaga ia te ia, i lalo o se maliliega ua mae’a ona latou sainia ma le itu a le malo.

 

O le mae’a ai ona tolaulau i luma o le fa’amasinoga o vaega uma o le maliliega a Melvin Eteuati ma le malo, ua toe tolopo ai nei lana mataupu e toe fofogaina i le aso Faraile o le vaiaso fou, Mati 10 ona o loo i ai ni isi o vaega o le maliliega o loo finagalo ali’i fa’amasino e fa’amanino atili.

 

E pei ona taua i tuutuuga o le maliliega a Eteuati ma le malo lea na tolaulau i luma o le fa’amasinoga i le taeao ananafi, o loo taua ai le tu’uaia e le malo o le ua molia i mataupu tau solitulafono e lua.

 

O le mataupu muamua o loo tu’uaia ai le ua molia i moliaga mamafa e lua, le moliaga o le talepe fale i le tulaga lua fa’apea ai ma le moliaga o le gaoi.

 

Ae i le mataupu lona lua, o loo tu’uaia ai le ua molia i le moliaga mamafa o le talepe fale i le tulaga lua, moliaga mamafa o le gaoi, atoa ai ma le moliaga mama o le fa’aleaga meatotino i le tulaga 3.

 

Ua malie Eteuati e tali ioe i le moliaga mamafa o le talepe fale i le tulaga lua mai le mataupu muamua e pei ona tu’uaia ai o ia e le malo.

 

I lona tali ioe ai i le moliaga e pei ona taua i le maliliega ma le malo, sa ia ta’utino ai e fa’apea, i se taimi o le aso 18 Setema 2016, na ia osofaia ai se fale e mautotogi ai ni tagata ma sa ia gaoia ai le tele o meatotino sa i ai i totonu e aofia ai se laptop, telefoni, iPad, ato, tusi folau atoa ai ma le tele o fa’amaumauga aoga, fa’apea ai ma se ato tupe sa i ai se tino i tupe e $500 i totonu.

 

Na fa’aaoga e le ua molia le tupe e $500 sa i totonu o le ato tupe, ae o isi uma meatotino sa ia alu ma nana i se nofoaga, lea na mafai ona toe maua uma e Leoleo i le taimi na fesiligia ai o ia e uiga i lenei mataupu.

 

Afai ae talia e le fa’amasinoga le tali ioe a Eteuati i le moliaga o le talepe fale i le tulaga lua, ona talosaga loa lea o le malo i le fa’amasinoga, ina ia solofua le moliaga mamafa e tasi o loo totoe i le mataupu tau solitulafono muamua sa latou tu’uaia ai le ua molia, atoa ai ma le solofua uma lea o moliaga o loo i le mataupu tau solitulafono lona lua sa latou tu’uaia ai o ia.

 

Ua malie fo’i le itu a le malo, o le a latou le failaina le moliaga mamafa o le sola ese mai Leoleo fa’asaga ia Eteuati, e mafua mai i le fa’alavelave lea na ia sola ese ai mai Leoleo i le masina na te’a nei ina ua tula’i o ia i luma o le fa’amasinoga fa’aitumalo.

 

E pei ona taua e le malo e fa’apea, i le mae’a ai o taualumaga o le mataupu a Eteuati i luma o le fa’amasinoga fa’aitumalo, na poloaina ai loa le toe taofia o ia i le toese i Tafuna e fa’atali ai taualumaga o lana mataupu, peita’i na oso le ua molia i le fasitepu e aga’i i luga o le foga falelua o le fale fa’amasino ma nofonofo ai i totonu o le faletaele o loo i ai mo se taimi umi.

 

Ina ua iloa e le ua molia ua o ese Leoleo o le toese na momoliina atu o ia, na ia tatala ese ai loa le toniga a pagota sa ofu ai ae savali aga’i i le maketi, ma fa’atali ai le pasi ma aga’i atu loa i lona aiga i Amouli, ae o le taimi lea o loo pisi solo ai Leoleo o le toese fa’apea ai Vaega o Leoleo Su’esu’e (CID) e tau saili solo o ia.

 

Na aga’i atu Leoleo i le fale a le ua molia i Amouli ma latou maua atu ai o ia o loo i ai, ma toe taofia mai loa i le aso lava lea.

 

O loo fa’aauau pea ona taofia Eteuati i le toese i Tafuna e fa’atali ai le aso lea ua fa’atulaga e toe valaau ai lana mataupu i luma o le fa’amasinoga maualuga.

Comment Here