Ads by Google Ads by Google

Iloilo Faipule talosaga Komesina mo se tupe fa’aopoopo Ofisa OMV

ausage@samoanews.com

Ua taoto atu nei i se fa’aiuga a le maota o sui o le Fono Faitulafono se talosaga na fa’aleo e le afioga i le Komesina o Leoleo i le vaiaso nei, mo se avanoa e si’i ai i luga le tupe lea e maua e le Ofisa o Ta’avale Afi (OMV) a le Matagaluega o Leoleo, e fesoasoani ai i le fa’aleleia o lana auaunaga mo le lesitalaina o ta’avale ma fa’aleleia masini.

 

O le vaiaso na te’a nei na fa’ataunu’uina ai le iloiloga a le Komiti o le Puipuiga o le Saogalemu Lautele a le maota o sui, i lalo o le ta’ita’iga a le afioga i le Taitai Komiti ia Manumaua W. Wilson, mo le talanoaina o le pili a le Senate e suia ai le leistalaina o ta’avale, ma fa’aee ai se totogi fa’aletausaga ina ia fuafua i le mamafa o le ta’avale.

 

O le afioga i le Komesina o Leoleo, tofa Le’i Sonny Thompson; o le sui teutupe a le malo ia Tina Va’a, ma le Pulesili o le Ofisa o le OMV na molimau e fa’atatau i lenei tulafono.

 

O le tulafono tuai o lo o i ai, e $7 o tupe uma e totogi mo le lesitalaina o ta’avale, o le a tuuina atu lea i se teugaupe mo le Matagaluega o le Saogalemu Lautele, e fesoasoani ai i le fa’amalosia o tulafono atoa ai ma le fa’aleleia o masini mo le lesitalaina o ta’avale.

 

Na talosagaina e Le’i afioga i Faipule, mo se avanoa e si’i ai i luga i le $15, ina ia mautinoa e lava ma totoe se vaega tupe e fesoasoani ai mo le OMV.

 

Sa ia fa’amanino i luma o le Komiti suiga ua i ai le aofa’i o ta’avale i totonu o le atunu’u i le taimi nei, lea ua silia i le 40,000, ae toeitiiti lava atoa le $1 miliona o le tupe o loo ao mai e le OMV i tausaga ta’itasi mai le lesitalaina o ta’avale, ma teu i totonu o le teugatupe lautele a le malo.

 

“E pei ona silafia e le mamalu o le Komiti le tele o galuega e moomia le fia fa’aleleia i totonu o le Ofisa o Leoleo, aemaise lava i le taumafai e si’i totogi o nai Leoleo, ona o lo o tula’i mai lava i se tulaga mataga le maualalo o totogi o Leoleo i Amerika Samoa, pe a fa’atusatusa i totogi o Leoleo mai isi teritori o le Iunaite Setete,” o le saunoaga lea a Le’i.

 

Sa ia talosagaina le Komiti mo se avanoa e si’i ai i luga le aofa’i o le tupe e tu’u atu mo le Ofisa o Leoleo mai le $7 o lo o i ai i le tulafono.

 

Na fesili le Sui Fofoga Fetalai o le maota, afioga Fetui Fetu Jr i le Komesina o Leoleo, pe fia sa’o le aofa’i o le tupe o lo o ia talosagaina e tatau ona si’i i ai, ae na saunoa le Komesina, “A maua le $15 ua manaia tele fo’i lena si’itaga.”

 

Na lagolagoina e Fetui le fa’anaunauga o le ali’i Komesina ina ia si’itia totogi o Leoleo o lo o tautuaina le atunu’u i aso ta’itasi. Sa ia taua atili e fa’apea, o le mafua’aga autu lea na ala ai ona ia alu ese mai le Ofisa o Leoleo, o le maualalo o totogi o Leoleo.

 

Na pau le popolega o le sui fofoga fetalai, ona o lea ua talosaga le Komesina mo se auala e toe sii ai i luga le tupe mo le Ofisa o Leoleo, a o le pili a le Senate lea o lo o latou talanoaina, ua uma fo’i ona pasia e afioga i Senatoa e aunoa lava ma ni suiga na toe faia i ai.

 

Na lagolagoina e le to’atele o afioga i Faipule le agaga o le talosaga a le ali’i Komesina, mo se avanoa e mafai ai ona maua se isi tupe fa’aopoopo e sii ai totogi o Leoleo.

 

Saunoa le afioga a Vailoata E. Amituana’i e fa’apea, pau popolega o lo o i ai, ina ne’i avea se suiga e faia ma pasia e le maota o sui e fai ma fa’alavelave i le fa’aiuga a le afioga i le ali’i kovana, i le taimi na te sainia ai le tulafono ma aloaia loa.

 

Ona o le mataupu e fa’atatau i le si’i i luga o le vaega tupe mo le Ofisa o Leoleo, na mafua ai loa ona fesili ni isi o afioga i Faipule, pe fia se tupe a le malo e maua i le tausaga e tasi mo le lesitalaina o ta’avale.

 

Na taua e le sui teutupe e fa’apea, e lata i le $600,000 le tupe na maua e le malo mai le lesitalaina o ta’avale i le 2017, ae silia i le $600,000 na maua i le 2016.

 

Na fesoasoani atu le afioga i le ali’i faipule ia Vailiuama S. Leasiolagi ma ia saunoa e fa’apea, e tele le vaega tupe e maua e le malo mo le fa’amoemoe e fa’aleleia ai aualatele, pe afai e lesitalaina le silia i le 40,000 ta’avale ua i ai i le atunu’u i le tausaga e tasi.

 

E ese mai ai i le iloiloga o le pili e lesitala ai ta’avale, sa fia malamalama le sui fofoga fetalai, o ia fo’i lea o le faipule mai Manu’a, i le mafua’aga ua le mafai ai ona maua se ta’avale fuimu mo Manu’a.

 

Na taua e Fetui e fa’apea, e 3 fale i Manu’a na a’afia i le mu, e leai ma se fale na mafai ona fa’asaoina, ona e leai se ta’avale fuimu e fa’atinoina le galuega lavea’i.

 

O se tasi o fa’afitauli e pei ona saunoa Le’i o lo o feagai ma le Ofisa o Leoleo, o le leai lea o ni ana tagata faigaluega i Manu’a e i ai le agava’a faapitoa latou te fa’atinoina ai auaunaga e pei ona fesiligia.

 

Sa ia taua le taumafai pea o le Ofisa o Leoleo e saili ni avanoa e maua ai se fesoasoani mo le itumalo i le taimi nei.

 

Ua taoto atu nei lenei tulafono tau fa’aofi a le Senate i se finagalo o afioga i Faipule. O le agaga atoa o lenei tulafono taufa’aofi, o le fa’aopoopo lea o le totogi e $12 i le lesitalaina o ta’avale i le tausaga, ae fuafua lava i le mamafa o le ta’avale.

 

O le 50% o le vaega tupe o le a maua mai i lenei tulafono, o le a teuina lea i lalo o le teugatupe faapitoa, e fa’aagaga mo le fa’aleleia o auala o lo o fa’aleagaina i feoaiga a ta’avale afi i le atunu’u.