I’u manuia fonotaga Vaega o Soifua Maloloina i le atunu’u


Ni isi o foma’i ma aufaigaluega a le LBJ ma le Soifua Maloloina na auai i le fonotaga a le Vaega o le Soifua Maloloina lea na fa’atautaia mo le lua aso i le vaiaso na te’a nei i le Fale Laumei i Utulei. [ata AF]
ausage@samoanews.com

Na fa’ai’u ma le manuia le fonotaga a le Vaega o le Soifua Maloloina lea na fa’agasolo mo le lua aso i le fa’aiuga o le vaiaso na te’a nei, ina ua mafai ona fetufaa’i foma’i ma i latou uma o lo o galulue i le tausiaina o le soifua maloloina o le atunu’u, i auala e mafai ona foia ai le fa’atupulaia o i latou e a’afia i gasegase tuga o le tino.

 

Na taua e le Pulesili o le Falema’i o le LBJ i le Samoa News e fa’apea, o le fa’aiuga o lenei fonotaga taua, ua mafai ai ona tatala ni isi o faitoto’a i auala e mafai ona foia ai le tele o fa’ama’i o loo aafia ai le atunu’u.

 

“O se tasi o vaega sa mafai ona fa’asoa i le va o foma’i ma i latou uma o lo o galulue i le tausiaina o le soifua maloloina o le atunu’u, o le fautuaina lea o le atunu’u ina ia vave faia siaki i le falema’i ina ia iloa ai le gasegase o lo o a’afia ai ma vave fai ai loa se togafiti, aua o le to’atele lava o tagata, seiloga lava ua tigaina ona fa’atoa alu lea e vaai le foma’i, ae o le fautuaga muamua, ia vave alu e vaai le foma’i manu e te le i ma’i”, o le saunoaga lea a Taufete’e.

 

O le autu tonu na mafua ai ona fa’avaeina lenei fonotaga e pei ona fa’ataunu’uina ai i le vaiaso na te’a nei le fonotaga lona lua, o le taumafai lea e fa’asoa fa’amatalaga i tagata faigaluega o lo o galulue i le tausiaina o le soifua maloloina o tagata, i auala e mafai ai ona foia le to’atele o tagata e a’afia i gasegase o le tino, ma maua ai le avanoa o sui o Ofisa eseese o le malo, aemaise lava Faalapotopotoga o loo galulue mo le puipuia o le soifua maloloina o le atunu’u, e fetufaa’i ma fa’afofoga ai i auala eseese e fa’aleleia ai la latou tautua.

 

Na taua e le tama’ita’i foma’i ia Dr. Monita Adip e faapea, o fa’amaumauga sa mafai ona fetufaa’i ma fa’asoa i le taimi o le fonotaga, ua avea lea ma auala e fesoasoani malosi ai i le si’itia maualuga lea o le auaunaga a Vaega uma o lo o galulue i le puipuia o le soifua maloloina i le atunu’u.

 

O le Foma’i sili a le LBJ ia Dr. Iotamo Saleapaga na saunoa i le tapunia aloaia o lenei fonotaga, lea na ia fa’afetaia ai sui uma na mafai ona auai i le fonotaga, i le taua o fa’amatalaga sa mafai ona latou fetufaa’i ua maua ai le avanoa e fesoasoani atili ai i le galuega o le tausiaina o le soifua maloloina o tagata.

 

“O le fautuaga masani lava e pei ona faasoa i lenei fonotaga, ia vave ona vaai se foma’i i soo se taimi e fa’alogoina ai suiga i le tino, ae sili ai i lo lena, e tatau ona lelei le tausiaina o le soifua maloloina i soo se taimi aua afai e lelei le tausiaina o le soifua maloloina, e mautinoa fo’i e maloloina le tino ma le mafaufau”, o le saunoaga lea a Dr. Adip.

 

I le silia ai i le tausaga ma le 10 masina talu ona galue Dr. Adip i le LBJ, sa ia taua ai lona molimauina pea o le to’atele o le atunu’u o lo o a’afia i gasegase, o ni isi e mafua mai i le fa’atamala, ae o ni isi e mafua mai i le fa’atalitali seia oo i le taimi mulimuli.

 

O le po anapo na toe fo’i atu ai ni isi o foma’i na malaga mai i Hawaii mo lenei fonotaga taua.

Comment Here