Ads by Google Ads by Google

HOSA - 220 totino fou tapena tomai mo faluega fau fa'afoma'i


Fanau i le launa pito i tua ma matua ma aiga, na auai i le fale laumei i Utulei e fa'aulufale sui fou o le HOSA i A'oga maualuluga e 6 ma le Kolisi Tu'ufa'atasi a Amerika Samoa. [ata: Leua Aiono Frost]

O fanau aoga mai aoga maualuluga ma le Kolisi Tu'ufa'atasi sa fa'aulu i le Polokalama a le HOSA na fa'atumulia ai le Gov, Rex Lee Auditorium i le aoauli o le aso Lulu. Sa fa'atasi ai ma sui ua mae'a avea ma totino o le HOSA, matua ma aiga ae maise sui o le Matagaluega o A'oga a le Malo.

 

O le aofai o i latou na fa'aulu e 220, peita'i o sui tuai na atoa i ai le 300+ o le fanau a'oga i le Kolisi Tu'ufa'atasi ma a'oga maualuluga e ono ua tu'utoina latou taumafaiga i a'oa'oga maualuluga, ia fa'aagaaga mo avanoa faigaluega e tautua ai mo le tausiga o le soifua maloloina ma togafitiga o gasegase.

 

Ua tolu ai nei o tausaga talu ona amata mai lenei faamoemoe, ma o le tausaga muamua na fa'aulu ai le to'a 115 fanau aoga i le HOSA, o le tausaga lona lua e 175.

 

Peita'i o nisi e to'a 18 o i latou mai le 220, o lo ua fa'aauau nei ona tauavea mataupu e agava'a ai i so'o se vaega lava e fa'aautu i le tautuaina o le soifua maloloina e aofia ai le avea ma Tausima'i, Foma'i, tagata su'esu'e fa'asaeanisi i gasegase ma vaifofo i gasegase, tausiga o le soifua Maloloina ma Mea'ai Paleni ma isi lava ituaiga o tautua e faia sona vaega i le tausiga o le soifua maloloina.

 

O nisi nei o fa'amaumauga ua mafai ona fa'ailoa mai e i latou o nafa ma le taumafaiga o le Polokalama a le HOSA i le tatou Matagaluega o le Soifua Maloloina.

 

I le polokalama fa'asolo i le aso Lulu, sa auai le Fa'atonu o Aoga ma tima'i i le fanau ma fa'ailoa fo'i le naunauta'iga o le Matagaluega ina ia a'oa'oina i latou i nei ituaiga o tomai e agava'a ai mo le tausiga o le soifua Maloloina ma togafitiga o gasegase.

 

"Ia tua fo'i le tatou Malo ia i tatou lava i le lumana'i, ina ua outou agava'a i nei tomai mo'omia ma toe fa'aalu ai le tele o vaega tupe a le Malo e totogia ai nisi mai fafo e togafitia o tatou tagata. O se mana'oga sili lea ona fia maua e le Malo,” se vaega lea o lana tima'iga a Dr. Ruth Matagi-Tofiga.

 

Na ia fa'amalo i le filifiliga ua faia e le fanau, e fa'ailoa ai, o lo'o manatu i latou i le lumana'i o tatou tagata fa'atasi ai ma le tatou Malo.Fa'afetaia e ia le au galulue o i latou o fa'aautu i ai le HOSA i totonu o le Kolisi, ma ua soloa'i mai ai i le vasega o tatou a'oga maualuluga e lima ma le a'oga tumaoti e tasi, le South Pacific Academy.

 

O le fofoga fa'apitoa o le aso, na tu'uina i se tasi o na latou amata maia le HOSA i le Kolisi Tu'ufa'atasi, o se sui o le Komiti Fa'afoe o le HOSA - ASCC, Dr. Robin Faumuina, na ia fa'ailoa, "Afai e te taumafai i se suiga, amata mai ia te oe, le foliga e te va'aia i taimi uma i lau fa'aata."

 

"Suia mai lou uiga, tamau ai i lou agaga, avea ma 'auga o au taumafaiga, e le vale lou taui, ae maua sa'o lava 'ai o au taumafaiga na e mana'o i ai! Fa'afetai ia te outou ua faia le filifiliga amata, taumafai e amata ona a'oa'o tonu mai i mataupu ma tomai mo'omia e avea oe ma se tasi e galue i so'o se vaega o galuega e aga i le tausiga o le soifua maloloina. Ua avea oe ma totino o le HOSA i le aso nei ma le lumana'i."

 

"E le o fa'aitiitia le tele o gasegase tumau ua maua ai le aotelega o tagata o le tatou atunu'u, ua si'isi'i pea i luga le aotelega o i latou ua a'afia, ae peita'i, ua atili ai ona mo'omia foma'i ma tausima'i ma tagata e sailia vaifofo mo nei gasegase i tomai fa'asaeanisi fa'apitoa. E ao ina tau paleni mai lea fua fa'atatau i ona itu e lua."

 

"Pe afai ou te mafaia, e mafai fo'i e oe. O tatou e soifua i le olaga, o le va'ai i se tasi ua manuia taumafaiga, ma una'ia ai lou tagata e taumafai atili ia e maua fo'i pe sili atu oe i lena tagata. Oso ai le ala lena, e le vale lou taui."

 

"Fuafua fa'alelei lou taimi ina ia fa'atulaga au galuega tau le a'oa'oga, tau le taimi mo fe'au a le aiga, ae maise o sou sao mo le galuega a le Atua, lea e te lua lelei ai ma lou Atua, e foa'i mai ai mealilo o fa'amanuiaga va'aia mulimuli mai,” o le fa'amalosi lea a Dr Faiumuina i le fanau.

 

Na tula'i le na fai ma sui o le Kovana ma le faigamalo, Fa'atonu o le DHSS, Taeaoafua Dr Meki Solomoma ma na toe fono fa'apipi'i i le mau ua pa'u i le fola o finagalo o le fanau a'oga, "O fea o le a tatou aga atu i ai i le lumana'i? Alu ai i le ala lena ua mae'a e amatalia i le aso, savali ai ma lou iloa o lo'o i ai lou aiga e fa'amalosi'au, ma le Atua e tatalo i ai ia fai ma ou tapasa i mea ua e le va'aia i le lumana'i, ae o e mana'o e te ausia. E faamaoni le Atua, e lelei lava o ia i aso uma mo i tatou uma!"

 

"O le tamaititi lelei lava ia e lelei lona taunu'uga. Peita'i, o le tamaititi ua iloga ua amata ona le lelei, ona ua se'ese'e malie ese mai mea na a'oa'oina ai ma fa'atonu a'i e savali ai. E mafua ona se'e ese, ona ua a'afia i mea sese ua luluti mai o le olaga, ae ua le savali i le ala na e mana'o i ai mai le amataga o lau taumafaiga."

 

Sa ia toe fa'aopoopo, "Ua mae'a ona e lavalava i mea lelei, taumafa lelei ma ua e malosi, ua e nofo i se fale na tapena e nai ou matua, o se mea ua la'ua mafaia i le vaivai sa ola a'e ai, a'o o oe e te tapena le lumana'i ma fa'aleleia atili nei mea uma, pe afai ua e fa'amuamua le sini o au taumafaiga o lau tausiga o ou matua ma le aiga, o lou naunau e toe fa'afo'i sau taulaga i lou Atua, ma e fa'aea nai ou matua i au taumafaiga uma, o le tamaititi lena ua fa'amanuia i ai le Atua. O'o i ai i i'uga lelei.”

 

O aoga maualuluga ua fa’aulu sui fou e aofia ai, Tafuna, Samoana, Leone, Fagaitua, Nuuuli VocTech ma South Pacfic Academy.