Na fa’atasia le Ofisa Va’ai Tau i Tafuna ma ana a’aga fa’apitoa, o i latou ua mae’a sainia maliliega e galulue fa’atasi e fa’alauiloa fesuia’iga o le tau, i so’o se taimi i tagata lautele, ae maise lava i taimi ua a’afia ai le atunu’u i ni afa, galulolo, lologa, mafui’e ma matagi malolosi.

Na aofia i latou i le faletalimalo o le Tradewinds’ Naumati Room e fa’amautu le galulue fa’atasi mo lea fa’amoemoe, ia le ave seseina le fe’au fa’alaua’itele. ae ia fa’autagia e le mamalu lautele.

O ala o feso’ota’iga o le a matua fa’aleleia lava i le va o le Ofisa o Va’ai Tau ma ana pa’aga. Ua i ai le latou Facebook e maua ai feso’ota’iga ma ua fa’alauiloa ia i latou uma, ia fa’afaigofie ona va’aia le tala o le tau, ma fa’aaogaina i le taimi e tutupu ai fa’alavelave fa’afuase’i.

“O lenei ala o feso’ota’iga e fa’aleleia atili ai so’otaga ia vave maua mai tala tau le fesuia’iga o le tau ma ia tali mai fo’i pa’aga, po’o i ai nisi mea e fia fa’afesiligia e fesoasoani atu ai mo le mamalu lautele. Na fa’atula’ia fo’i lenei so’otaga, ia fa’aaoga tatau, ma ia iloa e pa’aga, o lo ua mau fa’atuatuaina fo’i i latou mo le fesoasoani ia fa’ailoa atu le tulaga tonu o i ai le tau i tagata e to’atele o mafai ona o’o i ai o ia,” o se tala lea a Elinor Lutu McMoore mai le Ofisa o Va’ai Tau.

“Ua fa’aau’upegaina le Ofisa o le Va’ai Tau e ala i meafaigaluega fa’aonaponei e mafai ai mataituina le fesoua’iga o le alapeau o le ea, fa’apea le sousou o le vasa, ae maise tulaga i mafui’e e tutupu i lea mea ma lea mea o le lalolagi.”

O pa’aga ua galulue fa’atasi ma le Ofisa o Va’ai Tau e aofia ai le tele o matagaluega o le Malo, vasega o le au fa’asalalau - e aofia ai televise, leito ma le nusipepa - ae maise pisinisi ma fa’alapotopotoga tuma’oti.

Ua gafatia e le Ofisa o Va’ai Tau ona si’itia le latou tautua e talafeagai ai masini Komipiuta ma polokalama ua latou fa’aaogaina ma le polokalama ua fa’aaogaina e Hawaii ma isi vaega o Amerika.

O le susuga Charles Woodrum mai le Ofisa autu o le Va’ai Tau i Honolulu sa oo mai, ina ia latou molimauina lenei faigapa’aga i Amerika Samoa.

O taimi uma lava, o latou lipoti ua mae’a fa’atulagaina taimi e suia ai le lipoti i lea aso ma lea aso, peita’i o le taimi lea e afatia ai le atunuu, o le ituaiga popolega lea o loo taumafai i ai le Ofisa o Va’ai Tau. Taimi o le le mautonu lelei o tagata ma le vevesi aua ua tulata ona fa’ateteleina le a’afiaga o lotoifale i matagi malolosi po’o se galulolo fo’i, pe o se mafui’e.

“Ia tu’u mai lo outou mau fa’atuatuaga, o lo’o matou avatua le tala sa’o e ao ina nofo sauni mai i ai i tatou uma, ina ia le mao sasalu i tatou, ae le o’o mai se afa, pe le a’afia fo’i i tatou i se galulolo,” o le tima’i lea a Lutu-McMoore.

Saunoa ia Woodrum, “Masalo ua masani le mamalu o tagata Samoa i le tulaga o afa, aua ua maua so’o ai i tatou, ae o le tulaga fo’i o mafui’e ma lologa, o mea fo’i ua o’o so’o i ai i tatou, peita’i, o le isi ituaiga o fa’afitauli fa’anatura lea ua amata ona lutia ai le atumotu ma e fou tele, o le fa’afitauli tau Uila Emo ma Faititili.”

Ua fa’ailoa mai, e le masani ai, ae tatou ona nofouta i ai, aua ua tele na’ua fo’i mea sa le masani ai, ae ua iloga mai lava, ua tutupu ma e sili lava fo’i le mao tapenapena, nai lo le o’o mai ae le mailoa tonu se mea e fai.

“O le Uila emo e mafai ona eletisea ai le tagata, pe afai o e tu latalata ane i se mea tau pa u’amea ma isi ituaiga o mea e mafai ona latou miti’ia le eletise. A emo mai le uila ona ulufia lea o se la’au o lo’o ola, e mu atoa lau o lena la’au ma e le toe ola, afai o e i ai i lalo o lea la’au, ua fa’apea fo’i ona e aofia atu ai ma oe i le tulaga eletisea fa’atasi ai.”

“O se mea lava e tasi e tutu ia oe, pe afai o e tu i se vaivai ae emo mai le uila malosi tele, ua eletisea fa’atasi ai oe ma le vaivai, e emo mai le uila mai luga i ao o le lagi ma toe fo’i atu i ao o le lagi,” o se fa’amatalaga lea e tusa o le uila emo.

Pe afai e va’aia ua amata ona emo mai uila malolosi ma matua malolosi lava fo’i le papa o faititili, e ao ina fa’apotopoto uma tagata i totonu o le fale, ma ‘aua nei toe feoa’i i fafo o le fale, e tele a’afiaga o le tagata soifua i le uila emo pe afai e maua o tutu na’o ia i se timuga, po’o tafatafa o se vaita’ele e ono eletisea fa’atasi atu ai.

O i latou uma ua mae’a tufa ane i ai le tomai i le taeao ananafi, ua fa’aigoaina i latou o Pa’aga a le Ofisa Va’ai Tau, ua latou fa’alatalata ane ia i latou nei, ina ia avea i latou ma fesoasoani e fa’alauiloa atu fesuia’iga o le tau i le lautele o mafai ona avea e i latou ma nisi e fia fesoasoani i ai, pe a o’o mai faigata.

Sa saunoa Lutu-McMoore e tusa ai o le eseesega o latou fa’asalalauga o le Tau ma ituaiga o fa’asalalauga i Samoa, “O tatou uso i Samoa, e amata loa ona tau malolosi mai matagi pe tusa o le 35 maila i le ituta, oso loa le latou fa’asalalauga nofouta o mataga malolosi e o’o atu ina afa. Peita’i o i tatou iinei, e le faia lea ituaiga o fa’asalalauga se’i vagana ua o’o le malolosi o matagi i le 45maila i le itula. O le isi lea afuaga e le vave ai ona faia e i matou se fa’asalalauga tau matai malolosi, peita’i, o le mea taua o lo’o fautuaina lava le mamalu lautele e i matou e tusa o fa’atulagaga o fa’asalalauga mai le Malo tele.”

I luga fo’i o ituaiga o telefoni lea ua fe’avea’ia e le toatele i lenei vaitau, ua i ai le isi polokalama fou e fa’aigoaina o le Quake App, afai fo’i e te fa’aaogaina, ma e fa’atulagaina le malosi o se mafui’e e lulu ona tatagi lea o lau telefoni, e faia fo’i lena tautua e le telefoni o ia te oe. Afai la ae maua le so’otaga e se tasi ua avea ma Pa’aga a le Ofisa o Va’ai Tau, e mafai ona fa’afeso’ota’i loa le Ofisa ma fesiligia po’o maua ane le mafui’e lea pe le ono afaina ai le tatou Malo i se galulolo.

Nisi o i latou ua avea ma pa’aga a le Ofisa o Va’ai Tau e aofia ai: Ofisa o Mataupu Tau Samoa, ASPA, ASTCA, Ofisa o A’oga, Ofisa o Homeland Security/TEMCO, Ofisa DOC, Ofisa o le Water Sports, ma le vaega fa’asalalau i le atunu’u - leitio, televise ma le Samoa News.