Ads by Google Ads by Google

Galulue fa’atasi malo fa’amalosia le fa’afo’i o tagata ua ova aso


[ata: SN]
ausage@samoanews.com

I le avea ai o le mataupu i tagata mai fafo o lo o ulufale mai ma nonofo fa’asolitulafono i Amerika Samoa, o se tasi o fa’afitauli o lo o fa’aauau pea ona fetaia’i ma le malo talu mai le tele o tausaga ua mavae, ua fa’atulaga ai loa e le faigamalo se isi auala fou ina ia mafai ai ona foia lenei fa’afitauli, ae mafai ai ona toe fa’afo’i i latou nei i o latou atunu’u na malaga mai ai.

 

Na faamanino e le Loia Sili i se iloiloga sa faia i luma o le Komiti o Tulafono ma Fa’amasinoga a le maota o sui i le vaiaso nei e fa’apea, o le auala lea ua amata galulue fa’atasi ai le malo, o le fa’alauiloa lea o le lisi o tagata uma ua ova aso ma faalauiloa i le nusipepa, atoa ai ma le tuu atu i le Ofisa o Leoleo, ina ia fa’a faigofie ai ona maua i latou nei ma toe fa’afo’i i o latou atunu’u.

 

Na taua e ni isi o afioga i Faipule sa auai i le iloiloga ma le Loia Sili e fa’apea, o le fa’afitauli i tagata mai fafo o lo o nonofo fa’asolitulafono i Amerika Samoa, ua avea ma avega mamafa i le malo, ona o lo o alu pea tupe ma auaunaga a le malo mo i latou nei ma o latou aiga, ae le o i ai sa latou sao mo le malo i tulaga o lafoga ma soo se atina’e.

 

O le afioga i le ali’i faipule ia Manumaua W. Wilson na fesiligia le Loia Sili, poo ai e gafa ma le totogiina o le pasese a le tagata ua maua o lo o ova aso e toe fo’i ai i lona atunu’u, ae pe i ai fo’i se mafua’aga e ala ai ona faigata le toe fa’afo’iina atu o i latou nei i o latou atunu’u.

 

Na taua e Talauega Eleasalo Ale e fa’apea, o le fa’afitauli e mafua ai ona faigata le sailiina o i latou ua ova aso o lo o nonofo ai i le atunu’u, e le o lava le aufaigaluega latou te fa’atinoina lea gaioiga.

 

Talu ai la le to’a laiti o le aufaigaluega, ua mafai ai ona galulue faatasi le Ofisa o Femalagaaiga, Loia Sili, Ofisa o Leoleo, Ofisa o le Puipuiga o le Saogalemu Faalotoifale, aemaise ai o le Ofisa o Mataupu Tau Samoa, i le tau sailiina mai lea o i latou ua ova aso ma toe faafoi i o latou atunu’u.

 

O ni isi o fuafuaga ua amata ona fa’atulaga, o le a saunia se lisi mo i latou uma lava e mae’a le aoga o pemita na malaga mai ai i masina ta’itasi, ona fa’asalalau lea i luga o le nusipepa ina ia faigofie ai ona silasila i ai le atunu’u ma fa’ailoa atu nuu ma nofoaga o loo nonofo ai i latou nei.

 

O lea gaioiga o le a mafai ai ona galulue fa’atasi ma Pulenu’u o afioaga taitasi, i le sailiina lea i latou ua faalauiloa suafa i totonu o latou afioaga pe le o nonofo ai, ina ia mafai ona toe fa’afoi i o latou atunu’u.

 

E le gata i lea, o le a aga’i atu fo’i Leoleo e saili mai i latou nei i soo se vaega o le atunu’u, ona o le naunau lava ia mafai ona fa’aitiitia lea fa’afitauli.

 

E 2 ituaiga tagata ua ova aso o lo o mafai ona molimauina i le atunu’u i le taimi nei, e pei ona taua e le Loia Sili i lana molimau. O i latou ua mae’a le aoga o pemita na malaga mai ai ae o lo o nonofo pea i le atunu’u, ma i latou ua mae’a le aoga o ID, ae ua musu le sponsor e toe fa’afou ona pepa nofomau.

 

Saunoa Manumaua e fa’apea, o le isi lea fa’afitauli ua maitauina i le taimi nei, o le tele o i latou o lo o a’afia i ni isi o solitulafono matuia e pei ona maua mai i fa’amaumauga a le fa’amasinoga, o tagata o lo o nonofo fa’asolitulafono i le atunu’u.

 

Na taua e le afioga i le ali’i faipule ia Vesi Talalelei Fautanu lona lagolagoina o suiga ua faia e le Kovana, ina ia tuu atu ai le malosi i le Loia Sili na te fa’asoasoa mai ai uiga i le tulaga o le faamaonia o pemita e ulufale mai ai tagata mai fafo, atoa ai ma le pu’eina o ID o tagata mai fafo, ina ia mafai ai ona taofiofi tulaga fa’aletonu e pei ona molimauina i le Ofisa o Femalagaaiga i le taimi nei.

 

Na faamanino e Talauega i lana molimau e fa’apea, o suiga e pei ona faia i le Ofisa o Femalagaaiga i le taimi nei, e pei ona avea ai le aso Lulu o le aso e pu’e ai ID mo tagata mai fafo, o lo o i ai le faamoemoe e toe faia i ai ni nai suiga i se taimi o i luma, e le o ni suiga tumau fo’i o lo o fa’agasolo i le taimi nei.