Ads by Google Ads by Google

GALEA’I: Aua ne’i toe fa’aluaina fa’aletonu sa faia faigamalo a Togiola ma Faoa

 Le taimi na lulu aao ai le afioga i le Senatoa ia Galea’i M. Tu’ufuli ma le Ta’ita’i o le Ofisa o le ali’i kovana, tofa Fiu Saelua i le mae’a ai ona iloilo e le Komiti Soofaatasi o le Paketi a le Fono Faitulafono o le paketi o polokalame fa’apitoa a le ali’i kovana.  [ata AF]
ausage@samoanews.com

Ua taoto atu nei se fautuaga mo le faigamalo a Lolo mai Lemanu, mai le afioga i le ali’i Senatoa ia Galea’i M. Tu’ufuli i le taeao ananafi, e fautuaina ai ta’ita’i o le malo ina ia aua ne’i toe tula’i mai le fa’aletonu lea sa fa’atinoina e le faigamalo a Togiola ma Faoa ua mavae atu, o le totogiina atu lea o tupe mo totogi fa’ai’u ia i latou sa tofia e le kovana e avea ma fa’atonusili, e aofia ai fo’i ma le kovana ma le lutena kovana ae le tusa ai ma le tulafono.

 

Na fesili Galea’i ia Fiu e fa’atatau i le $1 miliona lea ua fa’atulaga mai e le kovana ia Lolo Matalasi Moliga i lana Polokalame Fa’apitoa, po o ai uma i latou e aofia ai le fa’atupeina o latou totogi fa’ai’u i le vaega tupe lea, ae na saunoa Fiu e fa’apea, e aofia uma ai lava i latou na tofia e le kovana e fa’afoeina le malo e pei o Fa’atonusili, atoa ai ma i latou o lo o galulue i le ofisa o le ali’i kovana, fa’apea ai ma ni isi o sui fa’atonusili.

 

Na toe fesili Galea’i ia Fiu, po o aofia ai fo’i ma totogi fa’ai’u o le kovana ma le lutena kovana i le tupe lenei, ae na tali le tofa Fiu, “o lea lava”.

 

Na fa’afetaia e Galea’i le fa’aiuga poto ua faia e le faigamalo, e fa’atulaga ai le tupe e fa’atupe ai totogi fa’ai’u o i latou uma sa tofia e le kovana e galulue mo le fa’atautaiga o le faigamalo, peita’i i lona talitonuga, e le tatau ona aofia ai le kovana ma le lutena kovana i fa’amanuiaga nei o totogi fa’ai’u, ona o a laua totogi o lo o fa’atulafono mai e le tulafono a le malo, o i laua fo’i sa palotaina e le atunu’u e fai ma ta’ita’i.

 

E o o lava fo’i i fa’atonusili e pei ona saunoa Galea’i, e le tatau ona agava’a ai fo’i i latou i fa’amanuiaga nei o totogi fa’ai’u, ona o i latou sa tofia fa’apitoa e le kovana, e le o i latou o ni tagata faigaluega tumau a le malo.

 

“Ou te le fa’atuiese i le fuafuaga ua fa’atula’i e le faigamalo, ae o le fautuaga e fia tu’uina atu i le kovana ma le faigamalo, ina ne’i i ai se taimi o i luma e faia ai e se tagatanu’u se tagi fa’asaga i le faigamalo, ona o fa’aiuga o lo o faia e le tusa ma le tulafono, e le gata i lea, ia aua ne’i toe tula’i mai le fa’aletonu sa tula’i mai i le taimi talu ai i le faigamalo a Togiola ma Faoa, ua maua a laua fa’amanuiaga i totogi fa’ai’u, ua pei lava i laua o isi fo’i tagata faigaluega tumau a le malo, o le fautauga lena, ia e talanoa i le ali’i kovana i le mataupu lenei, e lelei lava le mulimulita’i i luga o le tulafono, e le tatau ona faia fa’apena galuega fa’atino a le tatou  malo, ina ne’i su e se isi le malo, ona toe i’u mai lava lea i le Fono Faitulafono e talosaga mai i ai mo se tupe e totogi ai ni isi mea e tutupu mai i le lumana’i”, o le saunoaga tu’u sa’o lea a Galea’i ia Fiu.

 

I le mae’a ai o le iloiloga, sa toe fautuaina ai e le afioga i le Fofoga Fetalai ia Savali Talavou Ale le tofa a Fiu, ina ia fa’ataua le fautuaga ua tu’uina atu e le afioga a Galea’i, o le fautuaga atoa lava lea a le Fono Faitulafono i le faigamalo.

 

O le fa’aletonu na taua e Galea’i na tula’i mai i le faigamalo a Togiola ma Faoa ua mavae atu, o le fa’aaoga lea o le silia i le $1 miliona e aunoa ma le tu’uina mai e pasia atu e le Fono Faitulafono, e fa’atupe ai totogi fa’ai’u o i latou sa tofia e galulue i le faigamalo ua mavae atu.

 

O ni isi o i latou ia sa galulue i le faigamalo a Togiola ma Faoa, o lea ua avea nei ma Senatoa o a latou itumalo, e pei o le afioga ia Magalei Logovi’i lea sa avea ma Teutupe, ma le afioga ia Soliai T. Fuimaono sa avea ma Komesina o le Ofisa o Palota a le malo.