Na fa’amaonia e le Loia Sili a le malo i luma o le fonotaga a le Kovana ma le Kapeneta i le vaiaso na te’a nei, le i ai lea o se fuafuaga e tu’uina atu se pili mo se tulafono taufaofi i luma o le Fono Faitulafono, ina ia tau taofiofi ai le fa’afitauli i tulaga o fualaau fa’asaina lea ua sasao fa’aafi i le atunu’u i le taimi nei.

O le saunoaga mai ia Talauega Eleasalo Ale e tusa ai o le tulafono lea ua fuafua e tu’uina atu i luma o le Fono Faitulafono, na afua mai lea ina ua tula’i le Pulesili fou o le Ofisa o Fesootaiga a Amerika Samoa (ASTCA), le afioga i le ali’i Faipule ia Puleleiite Tufele Li’matua Jr ma talosaga i le kovana ma le kapeneta, i se gaioiga e fausia ai se tulafono e fa’amalosia ai puipuiga i le fa’afitauli o fualaau fa’asaina e ala lea i le faia o suesuega o fualaau fa’asaina i tagata faigaluega a le malo.

Saunoa Puleleiite e fa’apea, talu ai le tulaga saoasaoa ua i ai le fa’afitauli o le fualaau fa’asaina, ua mana’omia ai le tatau lea ona galulue fa’atasi Ofisa eseese uma a le malo o lo o galulue i le fa’amalosia o tulafono, i le sailiina lea o se auala e taofia ai loa tulaga o fualaau fa’asaina.

“O lo o matou galulue mo le tau tusiaina o le tulafono e tu’uina atu i luma o le Fono Faitulafono, ina ia tau fesoasoani ai i le tau taofia o le fa’afitauli i fualaau fa’asaina ua fai sina televave i le atunu’u i le taimi nei”, o se vaega lea o le saunoaga a Talauega.

I le taimi o le fa’auuga o Leoleo fou mai le Vasega lona 25 a le Ofisa o Leoleo i le vaiaso na te’a nei, na avea ai le mataupu e fa’atatau i le fa’atupulaia o fualaau fa’asaina o se mataupu na tele i ai saunoaga a ta’ita’i o le atunu’u na maua le avanoa e tulei saunoa ai i le taimi o le fa’auuga, ae i le taimi o le fonotaga a le kovana ma lana Kapeneta na sosoo ai ina ua mae’a le sauniga o le fa’auuga a Leoleo, sa toe aofia ai fo’i i le saunoaga a le ali’i kovana le mataupu lava fo’i lea e tasi e fa’atatau i le fa’afitauli i fualaau fa’asaina.

Na taua e Lolo le saoasaoa o le ulufale mai i totonu o le atunu’u o fualaau fa’asaina, ma ua tatau ona galulue ta’ita’i e saili se auala e taofia ai.

“Ua tele mea ua tutupu i lo tatou atunu’u i le taimi nei e le o oo i ai lo tatou malosi, ua vaaia le televave o le sau i totonu o fualaau fa’asaina, atoa ai ma isi ituaiga solitulafono ua faatupulaia, ma ua tatau ai ona moomia le faia o ni fonotaga a ta’ita’i o le malo ma sui o le Ofisa o Leoleo, ina ia taumafai e saili ni auala e foia ai nei fa’afitauli, manu e le i a’afia ai fanau aoga ma tupulaga talavou”, o se vaega lea o le saunoaga a Lolo.

Na taua e le Faatonusili o le Ofisa o le Puipuiga o le Saogalemu Faalotoifale (DHLS) ia Samana Ve’ave’a, le ave o lana fa’amuamua i le taumafai lea e foia le fa’afitauli i fualaau fa’asaina.

Sa ia fa’ailoa i Leoleo fou fa’atoa fa’au’u le taua o le galuega o le a latou fa’atinoina, o le ala lea e mana’omia ai lo latou fa’atinoina o le galuega ma le fa’amaoni.

Ae na taua e le Komesina o Leoleo ia Le’i Sonny Thompson le ave o lana fa’amuamua i le a’oa’oina o Leoleo ina ia lava lo latou iloa e fa’atino ai le galuega, atoa ai ma le taumafai e saili auala e foia ai le fa’afitauli i fualaau fa’asaina.

E pei ona fa’ailoa e Le’i i sana saunoaga i luma o le Fono Faitulafono i le amataga o le tausaga nei e fa’apea, o le mae’a ai o le fa’auuga a Leoleo e pei ona faia i le vaiaso na te’a nei, o le a ia tofia ai Leoleo e to’a 8 e galulue i aoga maualuluga eseese i le atunu’u, ina ia mautinoa latou te fesoasoani i faiaoga i le taumafai e foia faafitauli i fualaau fa’asaina lea ua oo atu i totonu o aoga.

I se iloiloga sa valaauina e le Senate ma sui o le Ofisa o Aoga a le malo e aofia ai ma Puleaoga o aoga maualuluga i le atunu’u i ni nai masina e le i mamao atu, na fa’amaonia mai ai e Puleaoga i luma o afioga i Senatoa le tele o tausaga o i ai le fa’afitauli o fualaau fa’asaina i totonu o aoga, ma o lo o latou taumafai pea i se auala e foia ma aveese mai ai i totonu o aoga.