Fuafua Ofisa o Fa’atoaga e toe fa’ataga le taro mai Samoa

ausage@samoanews.com

Ua i ai le fa’autaga i le Fa’atonusili o le Ofisa o Fa’atoaga a le malo o Amerika Samoa, e pei ona fa’ailoa i le Fonotaga a Samoa e Lua i le vaiaso nei, o le masina o Mati o le tausaga fou 2018 lea ua fa’amoemoe e tatau ona o o atu i ai, ua toe fa’ataga le fa’aulufaleina mai o le taro mai Samoa i laufanua o Amerika Samoa.

 

A o le i usuia le Fonotaga a Samoa e Lua i lalo o le ta’ita’iga a Ta’ita’i o malo e lua, le afioga i le ali’i Palemia, susuga Tuilaepa Lupesoliai Sailelei Malielegaoi ma le afioga i le Kovana o Amerika Samoa, tofa i le Tootoo ia Lolo Matalasi Moliga, na maua le avanoa o Faauluuluga o Ofisa ma Matagaluega a malo e lua e fono ai, mo le talanoaina o mataupu e si’itia ai le tautuaina o tagatanu’u, lea fo’i na fono ai Ta’ita’i o Ofisa o Fa’atoaga a malo e lua.

 

I lea fonotaga, na faailoa ai e sui o le Ofisa o Fa’atoaga a Samoa lo latou sauni e mulimulita’i i tulafono tau fa’atoaga a le malo o Amerika Samoa, ina ia mafai ai ona toe fa’ataga le fa’aulufale mai o le taro i le teritori.

 

O lo o fa’atali se ripoti mai le Ofisa o Fa’atoaga a Samoa, e tusa ai o le fa’aiuga o le suega sa auina atu i Peretania i le amataga o le tausaga nei, mo le su’esu’eina o le fa’ama’i lea na masalomia le a’afia ai o le taro i Samoa.

 

O le mae’a ai ona malilie o Ofisa o Fa’atoaga a malo e lua i le tulaga o le a oo i ai le taro mai Samoa, na fa’ailoa aloaia ai loa lea faaiuga ina ua usuia aloaia le Fonotaga a Samoa e Lua, lea na faailoa ai loa e sui o le Ofisa o Fa’atoaga a le teritori sa latou fuafuaga ua i ai, i le i ai lea o le avanoa e toe tatala ai le fa’aulufaleina mai o le taro mai Samoa i le masina o Mati 2018, pe afai e o o atu i ai ua ausia uma tulaga e pei ona moomia, e aofia ai ma le ripoti i le suega sa auina atu i fafo.

 

O le faaiuga e taofia ai le toe auina mai o le taro mai Samoa mo se taimi le tumau, na faia ina ua alia’e mai se fa’ama’i na a’afia ai se vaega o le fa’atoaga taro i Samoa, ma taofia ai loa ina ia puipuia ai le ono maua o lea fa’ama’i i fa’atoaga i le teritori.

 

E le o se mataupu laititi le mataupu i le faaiuga na faia e le Fa’atonusili o le Ofisa o Fa’atoaga a Amerika Samoa, susuga Rev. Filifaatali Michael Fuiava e taofia ai le toe auina mai o le taro mai Samoa.

 

E le gata na matua fa’asea ma muimui ai le to’atele o le aufai pisinisi sa latou la’uina mai lea matai’ai a le atunu’u, ae na oo lava fo’i i afioga i Senatoa ma Faipule, ua latou tu’u fesili i le mafua’aga ua fa’auliulito ai le finagalo o le Fa’atonusili o le Ofisa o Faatoaga a le malo, ae le toe tatala loa le taro mai Samoa.

 

Ae na faamanino e Filifa’atali i se iloiloga sa faia i luma o le maota o sui i le tausaga nei e fa’apea, o lona tiute i lalo o le tulafono o le puipuia lea o fa’atoaga a le atunu’u, mai le a’afia i soo se ituaiga fa’ama’i, e aofia ai fa’ama’i e ulufale mai i fua o fa’aeleeleaga mai fafo e fa’aulufale mai i le atunu’u.

 

Na faamanino atili e Fuiava i le feiloaiga ma afioga i Faipule, o le taimi lava e faamaonia mai ai e le Ofisa o Samoa e ala i le faaiuga o le suega sa auina atu i Peretania, e le o aafia faatoaga taro i Samoa i le fa’ama’i, ona toe iloilo loa lea o le faaiuga ua faia, ma toe fuafua ai loa le toe auina mai o le taro i le atunu’u.

Comment Here