Ads by Google Ads by Google

Fuafua le malo e fausia le Maketi o i’a i Fagatogo


Se vaaiga atu lena i le nofoaga lea ua fuafua le malo e fausia ai le Maketi fou mo i’a i se taimi e le o toe mamao. [ata AF]
ausage@samoanews.com

Ua fa’alauiloa e le Fa’atonusili o le Matagaluega o Fefa’atauaiga ma Alamanuia ia Keniseli Lafaele, le sauni o le malo e fausia se maketi fou mo i’a i tafatafa lava o le vaega o lo o i ai le maketi a le malo i Fagatogo.

 

I le iloiloga sa faia i luma o le Komiti o Fa’atoaga a le Senate i le vaiaso na te’a nei, na fa’alauiloa ai e le afioga i le ali’i Fa’atonusili lea fa’amatalaga i afioga i Senatoa, ina ua fesiligia le mafua’aga e to’atele ai tagata fai faiva e fa’atau solo a latou tau i’a i tafatafa o le alatele, ae le fa’aaoga le fale i’a lea ua fausia i le pito i tua o le maketi i Fagatogo e fa’atau ai a latou faiga faiva.

 

Saunoa Keniseli e fa’apea, o le vaega o loo paka ai ta’avale i tafatafa o le maketi fou a le malo i Fagatogo, lea e sosoo ma le auvai i le itu e aga’i atu i le faleva’a a le afioaga i Fagatogo, ua fa’amoemoe e fausia ai iina le maketi fou o i’a, ina ia mafai ai ona maua le avanoa o le aufai faiva e aga’i atu ai i se nofoaga se tasi ma fa’atau ai a latou i’a.

 

“O le fuafuaga atoa lenei na fa’atula’i e le afioga i le ali’i kovana ia Lolo Matalasi Moliga, ona o le manatu ia maua se nofoaga se tasi e aga’i uma atu ai lava le aufai faiva e fa’atau ai a latou i’a, sa i ai fo’i le fuafuaga a le malo e fausia se fale fogafale lua, e maketi o i’a le pito i lalo ae o luga e fa’aaoga mo Ofisa, ae talu ai le taugata o lea galuega, ua manatu ai e fausia loa se faletasi ina ia fa’atinoina ai le manaoga”, o le saunoaga lea a Keniseli.

 

O le maketi o i’a e pei ona i ai i le pito i tua o le maketi i Fagatogo, e ui o lea ua mae’a ona fa’apitoa mo le aufai faiva, ae foliga mai e le o i ai lava ni isi o le aufai faiva o naunau e fa’aaoga lea nofoaga.

 

Na taua e le afioga i le ali’i Senatoa ia Faiivae Iuli Godinet, o ia fo’i lea na fa’atula’iina le mataupu e fa’atatau i tagata fai faiva o lo o fa’atau a latou i’a i tatatafa o le alatele e fa’apea, o le popolega o loo i ai, o le soifua maloloina o tagata o lo o fa’atauina tau i’a i tafatafa o le auala, ona o lea o loo maitauina, e atoa lava le aso o fa’atau tau i’a nei, ae o isi fo’i taimi e vaaia ai le fa’atautau i fafo i le la ma le pefu.

 

“E i ai isi taimi e pasi atu le ta’avale ua vaaia foliga mago o tau i’a, ae te’i i le toe pasi atu i le isi taimi ua toe susu mai fo’i foliga o tau i’a, lona uiga e na o le avatu lava ma toe fufui i le kula vai ma toe aumai ai ua fa’atau, ae sa tatau ona silasila toto’a poo lelei le tau i’a mo le tausami a le atunu’u”, o le saunoaga lea a Faiivae.

 

Sa fesiligia fo’i e le afioga i le ali’i senatoa ia Faiivae le Fa’atonusili o le Ofisa o le Soifua Maloloina sa i ai i le iloiloga, susuga Motusa T. Nua, pe fa’ataga ona fa’aaoga kula o loo tu’u i ai taga aisa e fa’amalulu ai tau i’a, ae poo le a fo’i le umi e tatau ai ona fagota mai le i’a mai le sami ma fa’aaoga ae le toe aoga loa i se tausami.

 

Saunoa Motusa e faapea, e le fou lenei mataupu e fa’atatau i fa’asea fa’asaga i le aufai faiva o loo fa’atau a latou tau i’a i tafatafa o le alatele, ae o le mea moni e pei ona manino, e leai se tulafono e fa’asa ai i latou nei mai le fa’atauina o a latou tau i’a i tafatafa o le auala, e pei lava fo’i o le aufai fa’atoaga o loo i ai a latou tama’i maketi o lo o fa’atau ai fua o a latou fa’atoaga i le atunu’u.

 

“O le faigata lena o le mataupu lenei, o le mafua’aga fo’i lena e leai ai se malosi i la matou ofisa e taofia ai le aufai faiva mai le fa’atau o a latou i’a i tafatafa o le alatele, pau la matou vaega o loo faia, o le asia lea e la’u aufaigaluega o le aufai faiva ma fa’amanatu i ai le tatau lea ona i ai se kula ma ni taga aisa e tu’u i ai tau i’a, ae aua le toe fa’atautauina i fafo ma le a’afia i le pefu poo le lagi fo’i”,o le saunoaga lea a Motusa.

 

Saunoa atili le ali’i fa’atonusili e fa’apea, o le to’atele o le mamalu o le atunu’u o lo o faia tulaga o le fa’atau o a latou tau i’a i tafatafa o le alatele, o nai aiga lima vaivai, e le gata o loo nofo le Tama o le aiga e fa’atau a latou tau i’a i le pito i luma, ae o le fale tapoleni o lo o i le pito i tua o loo tapua’i atu ai le Tina ma le fanau, e fa’atalitali le taimi e maua ai se tupe mai le tau i’a ae ave e fa’atau ai se meaai o le afiafi.

 

O ni isi o tulaga sa fa’aalia i ai popolega o afioga i Senatoa, ina ne’i le taulia tau i’a i le aso atoa, ona ave lea ua tu’u i le aisa ma le fa’amoemoe e toe aumai i le isi aso e sosoo ai e toe fa’atau i tagata, ae na saunoa Motusa e fa’apea, o tulaga uma lava ia o lo o mata’itu e lona Ofisa ina ia mautinoa e le tupu lea tulaga.