Fuafua le isi malologa a le Fono Faitulafono mo le vaiaso e tasi

Se vaaiga i le Fale Samoa a le Fono Faitulafono lea ua fa’amoemoe e tatala aloaia i le amataga o le masina fou o Oketopa 2016.  [ata AF]
ausage@samoanews.com

E tasi le vaiaso lea ua fuafua le Fono Faitulafono e faia ai sana malologa puupuu, ona toe fa’aauauina loa lea o ana galuega mo le fa’amae’aina o aso fa’atulagaina o lana tauaofiaga mulimuli mo lenei nofoaiga lona 34.

 

I le iugafono malilie fa’atasi a le maota o sui lea na pasia i le taeao aanafi, o lo o taua ai le tatau lea ona faia se malologa a maota e lua mo le umi e tasi le vaiaso.

 

E pei ona manino i le tino o le i’ugafono malilie fa’atasi e fa’apea, i lalo o le Vaega II o le Maga 11 o le Fa’ave Toe Teuteuina a Amerika Samoa, o lo o aiaia ai maota e lua o le Fono Faitulafono e faia sana lava malologa, ae le mafai ona malolo se maota e aunoa ma le malilie i ai o le isi maota, pe afai o se malologa e sili atu i le 3 aso.

 

Talu ai ona ua mae’a le vaega tele o le galuega sa fa’ao’o mai i le Fono Faitulafono, ma, ona o le fia fa’asaoina ma le fa’aaogaina tatau o aso fono, o lea ua talafegai ai ona fa’amalolo le Fono mo se taimi le tumau, ina ia lava saunia mo galuega i ni isi o mataupu e toe fa’aopoopo mai i lana kalena.

 

O le taeao nei lea ua fa’amoemoe le maota maualuga fa’atoa fa’aulu ai lana iugafono malilie fa’atasi, e aloaia ai le malologa a le Fono mo le vaiaso e tasi.

 

O le aso Faraile nei lea ua fa’amoemoe e mae’a ai galuega a le Fono, ona fa’atoa toe a’e mai lea o lana malologa i le aso Lulu, Oketopa 12, ma fa’aauau ai loa ana galuega se’ia mae’a aso fono e 3 o lo o totoe mo lenei tauaofiaga, ma tapunia aloaia ai loa galuega a le Fono Faitulafono i le aso Faraile, aso 14 Oketopa 2016, o le aso fo’i lea ua fa’amoemoe e fa’apaia aloaia ai le Fale Samoa a le Fono Faitulafono lea ua toeititi lava mae’a lelei lona fausiaina.

 

Na fa’ailoa e le peresetene o le Senate ia Gaoteote Palaie Tofau i luma o le maota maualuga i le taeao ananafi e fa’apea, ua mae’a ona faia sa laua polokalame ma le fofoga fetalai o le maota o sui, tofa Savali Talavou Ale, o le aso Lulu, 14 Oketopa e faia ai se “fiafia la’ititi” a le Fono Faitulafono, e taualuga ai le galuega mo le Fale Samoa lea ua mae’a.

 

Sa ia fa’afetaia le afioga i le ali’i kovana ia Lolo Matalasi Moliga, e tusa ai o le fesoasoani mai o le malo i le fausiaina o le Fale Samoa mo le fono faitulafono a le atunu’u, ina ua tula’i mai le tele o tulaga fa’aletonu e aofia ai ma le tutulu o le fale.

 

I lalo o le Polokalame Fa’apitoa a le kovana mo le tausaga tupe fou 2017, o lo o fa’atulaga mai ai le aofaiga o le tupe e $700,000 ua fa’amoemoe le malo e fesoasoani ai i le fono faitulafono mo le fausiaina fa’amae’a lea o lana Fale Samoa.

 

E pei ona talanoaina i se tasi o felafolafoaiga a afioga i faipule o le maota o sui i le 2 vaiaso talu ai, o le a fa’aaoga le Fale Samoa a le Fono Faitulafono e fa’atautaia ai tauaofiaga masani a maota e lua pe afai ae tauaofia galuega a le fono mo le nofoaiga lona 35 pe a tatala aloaia i le amataga o le tausaga fou, ona o le fa’aiuga o le tausaga lea ua fa’amoemoe e amata aloaia ai le galuega mo le fausiaina lea o le maota fono fou a le atunu’u.

Comment Here