Ads by Google Ads by Google

Fuafua le isi aoga faapitoa sailia ai Leoleo fou e to’a 25


Sui o le Vasega lona 25 o Leoleo fou i le taimi o a latou aoga sa fa’atautaia i le nofoaga autu a Fitafita Tuai i Tafuna. [ata AF]
ausage@samoanews.com

E 3 masina le umi o le isi Vasega mo Leoleo fou a le Matagaluega o le Puipuiga o le Saogalemu Lautele, lea ua fuafua e amataina i le aso 3 Oketopa, mo le fa’amoemoe e a’oa’oina ai Leoleo fou e to’a 25 e fa’aopoopo i le galuega fa’a Leoleo.

 

I se faatalatalanoaga ma le Samoa News i le vaiaso na te’a nei, na fa’amaonia mai ai e le Komesina o Leoleo ia Le’i Sonny Thompson le sauni o le Matagaluega e tatala avanoa mo le isi Vasega o Leoleo fou, ona o lo o fa’aauau pea le manaoga mo ni isi Leoleo e fa’aopoopo i le fa’atinoina o galuega a le Ofisa.

 

“E ui o lea fa’atoa mae’a atu le Vasega lona 25 o Leoleo fou, ae o le mea moni le atunu’u, o lo o matua mana’omia pea ni isi Leoleo e fa’aopoopo mai i totonu o le matagaluega, o le mafua’aga lena ua fuafua ai le Vasega lona 26 e amataina i le aso 3 o Oketopa o le tausaga nei mo le umi e 3 masina, ina ia mafai ai ona fa’atumu avanoa o lo o mana’omia pea i le taimi nei”, o le saunoaga lea a Le’i.

 

Pe a fa’atusatusa i le tulaga ua i ai le faitau aofa’i o le atunu’u i le taimi nei, lea ua silia i le 65,000, ma Leoleo e na o le to’a 123, na taua ai e Le’i le to’atele o Leoleo e tatau ona mana’omia e fa’atinoina le galuega o le puipuia lea o le saogalemu lautele o le atunu’u, ma saili tagata o lo o fa’atinoina solitulafono eseese ina ia molia ma fa’asalaina.

 

Afai e fa’atusatusa le aofa’i o leoleo ma le faitau aofa’i o le atunu’u i le taimi nei, pe tusa ma le to’a 500 ma ona tupu tagata i le Leoleo e to’atasi, o se numera e matua le talafeagai lava e pei ona saunoa Le’i.

 

“Ua fa’atupulaia le faitau aofa’i o le atunu’u ae o lo o tumau pea le numera o Leoleo, o le mafua’aga lena ua a’e ai se manatu ina ua mae’a ona feutana’i ma le afioga i le ali’i kovana ia Lolo Matalasi Moliga, faapea ai sui o le Feterale sa malaga mai i le atunu’u, aemaise ai le Faatonusili o le Matagaluega o Puipuiga o Solitulafono i le atunu’u (CJPA), tofa Leseiau Laumoli, ma faia ai loa le maliliega o le a fa’amatu’u mai i le Ofisa lea se vaega tupe e totogi ai Leoleo fou o le a fa’au’u mai i le aoga ua fuafuaina nei”, o le saunoaga lea a Le’i.

 

E silia i le $370,000 mai le Ofisa a le CJPA lea ua faaavanoa e fesoasoani i le fa’atupeina o le Vasega lona 26 a Leoleo.

 

O se tasi o manaoga o lo o sili ona maualuga i le finagalo o le Komesina ua mafua ai ona naunau e fa’aopoopo pea Leoleo i le matagaluega, o le taumafai pea lea ina ia foia le fa’afitauli o fualaau fa’asaina lea ua sosolo atu i totonu o aoga ma a’afia ai tupulaga talavou.

 

Mai le lata i le to’a 40 o ali’i ma tam’aita’i Leoleo fou ia fa’au’u mai i le masina o Iuni o le tausaga nei, o le to’a 8 o i latou ia ua tofia e tiute i totonu o aoga maualuluga eseese uma i le atunu’u i taimi o aoga, e fesoasoani lea i le taumafaiga e foia le ulufale atu o fualaau fa’asaina i totonu o aoga.

 

O ni isi o ripoti o lo o maua e le Ofisa o Leoleo, ua taua ai le vaaia o ni isi o tagata tua e aga’i atu i totonu o lotoa i taimi o aoga, ma o lo o masalomia o ni isi o i latou nei o lo o fesoasoani i le kilivaina atu lea o fualaau fa’asaina i ni isi o fanau aoga.

 

“O le fa’anaunauga a le Matagaluega o Leoleo o lo o i ai, ia taula’i lava le vaai i aoga maualuluga, ona o lea ua fa’amaonia mai i ripoti le to’atele o fanau mai aoga maualuluga ua masalomia lo latou avatu i totonu o aoga o fualaau fa’asaina”, o le saunoaga lea a Le’i.