Ads by Google Ads by Google

Fuafua le fausiaina o Ofisa o isi lala o le faigamalo i Manu’a


Kovana Itumalo o Manu’a, afioga i le Fa’atui ia Laolagi Fonoti Savali Vaeao. [ata AF]

Le Ta’ita’i o le Ofisa o le afioga i le tama’ita’i faipule o le Konekeresi ia Aumua Amata i Amerika Samoa, susuga i le Matua ia Pulu Ae Ae Jr. [ata AF]
ausage@samoanews.com

E ese mai i le Ofisa tutotonu o le malo lea ua mae’a tatala aloaia i le Faleluanu’u i Ofu ma Olosega/Sili, ua fautuaina e le afioga i le ali’i kovana ia Lolo Matalasi Moliga le tatau lea ona fausia ai fo’i ma Ofisa o isi lala o le malo, ina ia fa’a faigofie ai tulaga o galuega fa’atino mo le itumalo o Manu’a.

 

I le taimi o lana saunoaga i le sauniga e tatala aloaia ai le maota o le malo i Ofu i le vaiaso na te’a nei, lea ua fa’aigoaina “Afioga Misaalafua Tausulu Palega”, na saunoa ai Lolo i le taua o le i ai o se Ofisa mo isi lala o le malo, ina ia atagia mai ai tulaga manuia i atina’e mo Manu’a.

 

“Ua mae’a ona ou fautuaina le Fa’atonusili o le Ofisa o Galuega Lautele a le malo ia Faleosina Voigt, ina ia fausia se Ofisa o le tatou Faipule i Uosigitone i Manu’a nei, ina ia fa’a faigofie ai ana galuega i soo se taimi e fia malaga asiasi mai ai i le itumalo, aua e le mafai ona fa’atinoina galuega pe afai e leai se Ofisa e taula’i mai i ai fuafuaga ma atina’e”, o le saunoaga lea a le ali’i kovana na fa’alogoina ai le tau fai pati o le to’atele o tagata o le itumalo o Manu’a sa maua le avanoa latou te molimauina ai le tatalaina o le maota fou o le malo i le vaiaso na te’a nei.

 

E le gata i se Ofisa mo le Faipule i Uosigitone, ae na taua fo’i e le ali’i kovana le tatau lea ona i ai se Ofisa mo isi lala o le faigamalo e aofia ai ma le Fono Faitulafono.

 

“O le taua o atina’e fa’apenei, e mafai ai ona unaia vaega eseese ia o le malo e aga’i mai i Manu’a e sailiili i auala e fa’aleleia atili ai le auaunaga i le atunuu, ma o se tulaga lelei fo’i pe afai ae mafai ona fausia se Ofisa o le Fono Faitulafono i totonu o le itumalo”, o le saunoaga lea a le ali’i kovana.

 

I lana saunoaga e fai ai ma sui o le Faleluanu’u e fa’afetaia le malo mo le galuega tele ua mae’a ona fausia i Manu’a, na talosagaina ai loa fo’i e le afioga i le Kovana Itumalo o Manu’a, le afioga i le Fa’atui ia Laolagi Fonoti Savali Vaeao le tatau fo’i lea ona i ai ma se Ofisa o Mataupu Tau Samoa ae fa’apitoa mo le Ofisa o le Kovana Itumalo o Manu’a, ina ia mafai ai ona fa’a faigofie le fa’atinoina o galuega mo le itumalo.

 

Na lagolagoina e Laolagi le finagalo o le afioga i le alii kovana, i le tatau lea ona fausia ni Ofisa a isi lala o le faigamalo a Tutuila ma Manu’a i Manu’a, e le gata e atagia mai ai tulaga o atina’e mo le itumalo, ae o se la’asaga talafeagai fo’i lea mo ona tagata.

 

Na taua e le Failautusi o le Ofisa o Mataupu Tau Samoa i le Samoa News, le afioga i le Maoputasi ia Mauga Tasi Asuega lona lagolagoina o fuafuaga fa’ataoto a le malo mo le atunu’u.

 

Ina ua fesiligia pe tatau ona fausia se Ofisa o le faigamalo fa’alotoifale i Manu’a, na saunoa ai Mauga e fa’apea, “E tatau ona malamalama le atunu’u, o Tutuila ma Manu’a e eseese uma lava taimi na sainia ai a la feagaiga ma le malo tele o Amerika, e tatau fo’i la ona aia tutusa uma Tutuila ma Manu’a i soo se atina’e ma galuega o lo o fausia mo le manuia o ona tagata, aua afai o se mea e lelei mo Tutuila ma ona tagata, e tatau fo’i ona lelei mo tagata o loo alala i le itumalo o Manu’a”.